| -
مالك؟
- مافيش؟
- بكلمك بقالى شوية و انت مش
معايا خالص
- لا معاكى اهوه ... هو احنا مش
حنتغدى، انا عايز اتغدى و اريح شوية علشان نازل بالليل.
- رايح فين؟
- خارج شوية مع اصحابى.
- إشمعنى يعنى النهارده؟
- يعنى أفك شوية معاهم.
- طب ما تفك معايا؟ ... مالك
بجد؟
- مافيش يا ستى ... جعان و
تعبان. الغدا وحياتك بسرعه.
00000
- بالهنا و الشفا عجبك الأكل.
- أه حلو، تسلم ايدك ... صحينى
الساعه 8
000000
- حتتأخر؟
- يعنى مش عارف.
- لو تقول لى بس مالك ... يمكن
اقدر اساعدك
- هو البنطلون الكحلى فى الغسيل
ولا إيه؟
- حتلاقيه متعلق مع القميص اللى
بتحب تلبسه معاه
- أه ... ماشى
- بص بقى إنت النهارده مش مظبوط
... فيه ايه بس؟
- يعنى كده .. شوية قلق فى
الشغل
- طب ما تقول طيب .. إحكى بس و
قول لى
- ماتشغليش بالك ... ايه الصوت
ده؟
- ده موبايلك بيـ
Vibrate
.. إنت عامله على Silent ليه؟
(ألو، أيوه يا معلم نازل كمان 5
كده ... لا يا راااجل ... فل قوى، هو رجع امتى؟ ... طب روح
إنت بدرى و إحجز ترابيزة حلوة قبل الكافيه ما يتزحم ... و
قول له إنى حعدى عليه آخده ف طريقى ... مش حنتأخر ...
سلام)
- مين ده اللى حتعدى عليه؟
- ده كمال
- كمال مين
- كمال صاحبى
- كمال ... كمال اللى كان معاك
ف المدرسه، اللى بيهرج كتير ده. هو جه من الرياض؟
- أه
- طب كويس يفرفشك شوية.
- مم
- طب قولى بقى ايه القلق اللى ف
الشغل بتاعك؟
- بسيطة ما تقلقيش ... حتتحل
- هى ايه طيب اللى حتتحل دى؟
- ححكيلك بعدين ... انا نازل
بقى، نامى انتى ... أنا شكلى حتأخر.
- براحتك ... أنا حخلص شوية شغل
البيت اللى فاضل و انام ... حتتعشى بره ولا احضر لك ...
(طراخ .. صوت باب الشقه اتقفل)
00000
تررررن تررررررن
- ألو
- مساء الخير أنا كمال صاحب ...
- أهلاً وسهلاً حمد الله ع
السلامة، ده نزل من ربع ساعه كده و سمعته بيقول انه حيعدى
عليك
- الله يسلمك ... أنا عارف انه
حيعدى بس طلعلى مشوار و حروح الكافيه من بره بره ... أنا
كنت عايز آخد منك رقم موبايله. أصل موبايلى باظ هناك،
فمعايا موبايلى القديم و متسجل عليه نمرة بيتكم و نمرة
موبايله هو القديمة.
- أه قوى قوى ...(...)
- شكراً
- لا على ايه
- و على فكرة ما تقلقيش
حنفرفشهولك ع الآخر ... أنا سمعت اللى حصل. بسيطة و الله،
هو اول واحد يعنى يسيب شغله؟ هو مديره كان ابن كلب و
بيقرفه و بيتلكك له ... و اكيد حيلاقى شغلانة تانيه على
طول ...
- شغله ؟؟؟ آآآه ... لا ربنا
اكيد مرتب حاجه كوبسة.
- إن شاء الله، و لو ضاقت قوى
اريحك منه و آخده معايا الرياض، و اهو نونس بعض.
- تاخده معاك أه ... و الله
فكرة ... ربنا يسهل إن شاء الله.
- سلام
- .... مع الـ ... سلامه.
نهى رضوان
Share on Facebook
|
