 من جريدة "الله يقرفك" السياسية هذا الخبر
إقتحم فار
أسمر صغير البيت الأبيض أثناء إلقاء أوباما لخطابه
(الأهرام)
و قد إعترف الفار بإنتمائه لتنظيم القاعده، و إنه كان
بيحيط ديله بحزام ناسف بغرض تفجيره ... و قد إعترف بدون أى
ضغوط أمام محققة ال CIA النميسة
"بستك ناو" ذات الأصول الشيرازية.
و جدير بالذكر أنه منذ عدة أشهر وقفت ذبابة على إيد أوباما
أثناء إحدى المقابلات التليفزيونية ... فهل هذا مؤشر على
أن القاعدة اصبحت تنوع من هجماتها، أم أن سياسة أمريكا
الخارجية هى اللى بقت ريحتها وحشه.
----------
من وكالة انباء "يا كسوفى" هذا الخبر
الإقتصادى
عزة تصدر
للصين بـ 92 مليون دولار و الصين ترد عليها بـتصدير 979
مليون دولار.
(الأخبار)
و من اللذيذ أن كل صادرات عزة من المواد الخام اللى مالهاش
لازمة، و بالتالى فالصين تبذل مجهودات كبيرة فى تنظيفها و
تجهيزها و تصنيعها ... ثم إعادتها مرة أخرى لعزة خالصة
مخلصة.
و نحن من هذا المزنق نحيى حكومة عزة على تفعيل
إتفاقية "الأنتوخ" الإقتصادية المشتركه ... و ندعو الله أن
تساهم أكتر فى تنمية الإقتصاد الصينى ... عفواً ...
العزاوى.
----------
من مجلة "المفترى" للنقل البرى هذا الخبر
شركة
"اللوا موتورز" الأمريكية تدرس تصنيع ميكروباص للسوق
المصرى. (المصرى
اليوم)
و قد نما إلى علمنا أن الميكروباص الجديد حيكون حافظ كل
الإشارات بتاعة الركاب، و حيقف أوتوماتيكياً عند منزل
الكوبرى، أو بعده أو عند المفارق ... و الكرسى من نفسه
حيقلب الراكب صاحب الإشارة عند محطته.
أيضاً سيجهز بأوبشن يتيح للسائق ان يلم
الآجرة بسهولة، فعند ضغطه على زرار فى التابلوه حيطلع دراع
من كل كرسى، و يايدفع كل راكب الآجره من سكات بدون طلب
الباقى ... يا إما السواق حيشغل الدراع بخاصية ال
Vibration.
----------
من جريدة "إنشلنى شكراً" للإتصالات
شركات
المحمول تنفى نيتها بيع أسهمها و الخروج من السوق المصرى.
(الأهرام)
و قد صرحت 3 مصادر مسئوله فى نَفَس واحد قائله: "هه ...
قال نخرج قال، فيه شركة تلاقى يـَغمه و تقول مش غارفه"
و على الجانب الآخر صرحت شركة "إتكلم أرضى و
النبى" قائلة: "اللى مالوش شوق فيها يروّح و حنخش إحنا ...
دى اليغمة م الأساس يغمتنا".
و قد صرح رئيس جمعية "حماية المسحول" قائلاً:
أحسن حاجة كل عمارة تشترك فى غية حمام زاجل ع السطح، و
نعمل لها نظام برضه، يعنى لما يجيلك حمامة من غير رساله،
يبقى صاحبك بيمسى عليك و بيديك رنه.
----------
من جريدة "الخيار خيارك" الزراعية
لجان تفتيش
على شركات استصلاح الأراضى بالطريق الصحراوى لضمان
التزامها بالنشاط الزراعى
(المصرى اليوم)
و على الجانب الآخر تقدمت هذه الشركات لأعضاء
اللجان بباكورة إنتاجها من "الكوسة" بكميات كبيرة ... و
تعهدت جميعها بإغراق الأسواق قريباً بالبادنجان لتنشيط
فصوص عقل المواطن الغلبان.
---------
من مجلة "شهيصنى" الفنية
نتيجة لقصر موسم العرض الصيفى هذا العام ...
إتفقت سينمات عزة الصيفية على عرض فيلمين من أفلام الصيف
فى الحفلة الواحده ... قبل الإستراحة يتم عرض النصف الأول
من فيلم، و بعد الإستراحة يتم عرض النصف التانى من فيلم
آخر ... على ان يتم الغلوشة بواسطة بياعين الفيشار و
الساقع و الفريسكا.
و سيساعد على نجاح هذه الإستراتيجية أن معظم الأفلام
هرتلية، و بالتالى الفارق بينها بسيط ... و جمهور سينما
الصيف عايز بس يـظـيـط.
----------
من جريدة "خيبة ميرور" القومية
السينما
النيجيرية فى المرتبة الثالثة عالمياً و تعرض افلامها فى
امريكا. و فى الطريق للعالمية السينما الأوغندية
(الأهرام)
و قد تلقى السينمائيون المصريون هذا الخبر مرفقاً ببرقية
قصيرة من مجهول، بها كلمة واحدة من 3 حروف و اولها زى
آخرها.
---------
من جريدة "بورصة الترماى" الرياضية
الزمالك يهدد برفع شكوى للفيفا معلنأ انه يمتلك بحوزته
مستندات تفيد برغبة عدلى القيعى فى الإنتقال إلى صفوفة.
---------
و معنا مراسل النشرة "لبيب الداير" فى تقرير من من أحد
الأسواق العزاوية:
- أيوة يا لبيب ... ده إيه اللى فى الصورة ده؟
سمك بسارية؟
- سمك إيه بس ... ده اللب الصينى، شوف بالذمة
قد إيه.
- إيه ده دى اللبايه بعشّوه.
- و الكيلو منها بـ 4 جنية بس، و يقضيك مسلسل
عربى 30 حلقة.
- 4 جنيه ؟؟؟ و ده بالشاحن و الضمان ولا إيه؟
و دى بتتأزأز ولا بتتقشر ... و لا تكونش بتفقس؟.
- دى حضرتشك تقربها من بقك كده تلاقيها
إتأزأزت على طول ... و ممكن تشيل باقى اللبايه فى الفريزر
و تاكلها تانى يوم عادى.
- و برضة لو الواحد دخل بـ 2 كيلو منه فى اى
زيارة حيعملوا له منظر.
- و على فكرة القشر ما بيترميش، ده ممكن تنجد
بيه مرتبه أو تديه لنجار شاطر يفصل منه كرسى ولا ترابيزه.
- ياسلام ... كنا حنعمل إيه من غير الصين دى،
ناس ذوق ذوق الصراحة، شافونا قاعدين كده أكل و مرعى و قلة صنعه ...
قالوا يسلونا بالمرة.
-----------
أخيراً جاءنا من صديق النشرة
جرجس مصطفى هذا الزجل الآخر نقاوة:
كاميليا ظهرت؟ ... لأ لسه
طب و وفاء؟ ... برضه لسه
طب محمد اللى بقى مرقص
لسه برضه ع الحبل بيرقص؟
و المظاهرات ؟ ... ياترى لسه قايمة؟
ولا بق من حكيم عاقل يقدر يصرفها ؟
يا ناس يا ناس فى كل مكان
المسيحية و الإسلام فى آمان
حتى لو اسلم البابا شنودة
أو شيخ الأزهر بقى فى الفاتيكان
و فقعى
و إلى اللقاء فى حلقة أخرى يوم
الجمعه ... و كل جمعه .. مع عزة و حالها و محتالها ..
و مع أخبار اللى بيحبوها و اللى
بيحلبوها.
فادى رمزى
Share on Facebook
|
