يا وزير النور ..

يا وزير النور ... محسوبك فلاح من دمنهور
وبسأل جنابك ... ليه قاطعين في بلدنا النور؟؟
واحنا سعادتك ... قربنا ننسى شكل النور

يا وزير النور ..
يا وزير النور ..

ساعات العيال بتفرح وتغني وتدور
ويقولوا
النور أيجه ..
النور أيجه
وبعد شويه الضلمه بترجع ....
وتغطي ع النور
وتنام عيالنا مغمومين من قطع النور

يرضيك تغم العيال
ويناموا من غير نور
يا سعادة جناب سيادة وزير النور

كان عندي تلاجة... شاريها بالتقسيط
أتحرقت جنابك ... وراكنها جنب الحيط
وكان عندي مروحة ...
بتدور بالتخبيط

مكسورة .. ورابط جوانبها بمترين أستك
بعتها لبتاع الروبابكيا ...
بطبق بلاستيك.

وعندي ولاد في التعليم ...
أه والله العظيم.

اللي في مدرسة واللي في جامعة
واللي خلص تعليم.

ليهم نفس يا باشا يبصوا على التليفزيون ..
وصل النور مكتوب فيه مائتان وخمسون
دفعتهم جنابك من لحم الحي ..
وأنا زي التور

ما أنا جنابك طول عمري
وأنا عبد المأمور

رابطني في الساقية وبلف بجزعي المكسور
وهدفع الوصل ... لو حتى مابشوفش النور.

لو قطع النور ماشي عند جنابك بالدور
ليه أحنا اللي ديماً بييجي علينا الدور ؟؟!!

وأن كان النور زي ما بتقولوا مدعوم
يبقه الدعم جنابك بيروح لعلية القوم
وأنا من دعمكم الميمون ... مفطوم
وحقي من الدعم ... الضلمة والنوم

أنا بس نفسي أسأل جنابك سؤال ثقيل

ليه بتسيبوا النور بالنهار وتقطعوه بالليل ؟؟!

تصدق بأيه يا سعادة وزير النور
من كام يوم كان فرح الواد مندور
وجنابك كالعادة ... قطعت علينا النور

والناس كانت بتتعشى في الضلمة وتحسس
والدنيا قايدة نار ومحدش عارف يتنفس

عمرك شفت فرح ومعازيم من غير نور
بس الناس كانت بتدعي لوزير النور
ويقولوا إلهي وأنت جاهي ....
يفضل مستور
ويفضل بيت جنابه مولع ....

 ومنور بالنور

محمد الصادق

Share on Facebook