ألف ليلة وليلة دوت كوم (9): أنا غرضى شريف

كتب بواسطة: Mohamed Salah في . القسم archive 2011

المكان 

الطرف الأول : شاب في التلاتينات، باين عليه طيبة اهل الريف و بساطتهم، اسمر زيهم، عينيه سودا صغيرين وشنبه يقف عليه الصقر، شعره اكرت منكوش ، دقنه عاوزه حلاقه وشين، لابس تي شيرت من بتوع العتبه و بنطلون ترننج و قاعد براحته في اوضته في الموقع اللي شغال فيه ملاحظ انفار في العين السخنه، بيدخن سيجارة كليوبترا و بياكل في شقة بطيخ ... حر بقى .. قدامه لاب توب من بتوع الصين جايبه من على سايبر اللي في فيصل بالقسط ... بس ايه .. ميه ميه و النت فيه رهوان.

الطرف التاني: صورة بروفايل لبنوته جميلة ملامحها اجنبية بس بتتكلم عربي لبلب، ماهو ابوها مش مصري .. شامي من سوريا و مامتها من المنصورة .. احلي بنات بنات المنصورة ... كاتبه في الاستيتس " يا ترى لسه فيه حب؟"

هو : ازيك يا اميره ...وحشتينى موت و اللهي يا ست البنات.....مش حاشوفك بقى؟
هي: لا طبعا..استحاله...حرام..ربنا يحاسبنا
هو: انا باقولك اشوفك بس مش اقابلك في شقه مفروشه...انتى ليه بتفهمي غلط بس؟
هي: صعب و اللهي يا استاذ عباس..اولا انت مسافر الخليج زي ماقلتلي والمشروع بتاعك مايستغناش عنك،ماحبش اعطلك عن اعمالك..صحيح اخبار طنط مامتك ايه..لسه بتزن عليك علشان تتجوز؟

هو : ايوه و اللهي..الحاجه نفسها و منى عنيها...بس انا باطمنها ان اللي حاتجوزها لازمن تيقى ميه ميه..انتى دلوقتى تمنين في الميه
هي: بس؟؟؟!
هو: اشوفك تبقى تسعين فالميه و اسمع صوتك تبقي ميه ميه
هي : ممكن ابعتلك صوره عالموبايل
هو : طيب ماشي..بس حالا ..
هي : بس انا ماعنديش رصيد دلوقتي..ابعتهالك بكره..باي دلوقتي لحسن ماما بتنادي
هو (مكشر) : طيب...سلام

(نفس اليوم بالليل قوي)

المكان : قهوة نعنشه في مدينة نصر ، احمد و باسم بيدردشوا كالعاده
احمد : طب وهي اميرة حتبعتلوا صورتها ازاي
باسم : ماتقلقش...حد قالك عليا مهندس كمبيوتر اونطه ولا ايه
احمد : و بعد الصورة، اكيد حيطلب يسمع صوتها
باسم: و ماله..نسمعه صوتها...بس كلمتين و بس برضه
احمد : بس ده حيطمنه؟ اكيد حيقلق اكتر
باسم : لا مش حيحصل...احنا على وش امتحانات ، و اميره اكيد حتنشغل عن الفيس بوك ...خليه يشتاقلها شويه
احمد: يا خوفي ليزهق و يسيبها و احنا عاوزينه ينشغل بيها على قد مايقدر
باسم : هو لسه حينشغل..مانشغل و اللي كان كان...............

(اليوم اللي بعده ..الساعة سبعة)

هو : اني زعلان منك قوي وواخد على خاطري..فين الصوره؟
اميره : ابعتلي رقمك و انا ابعتهالك
هو : 0175500000
اميره : بس الرقم ده جوه مصر؟!!!
هو : ايوه ايوه..ماهو جوال....مش اي حد ينفع معاه
اميره : طيب ....بعتها....وصلت؟
هو : ايوه يا قمر...ايه الجمال و الرقه دي بس.....اسمع صوتك بقى و النبي...لو ليا خاطر عندك يا بنت الناس
اميره : بس كلمتين و بس ..حاكلمك بكره قبل مادخل الامتحان..ادعيلي يا عبوستي
هو : يا رب تنجحي و تجيبي مجموع كمان ..حاكلمك بكره عشان الحاجه بترنلي دلوقتي..روحي ذاكرى يا عسليه
( بتبان اوف لاين ...و عباس بيقفل الشاشه من غير ما يعمل شت داون )

عباس : الو..ايوه يامه ..خير....حاضر ...حاضر حاكلمهم....هو فيه مشكله....يعني ايه وحشتهم..ايه الدلع المرق ده ... محمد ماله؟ وودته للدكتور....وهو كويس؟ يعني شويه برد تعملوا عليهم هليله .. سلام يامه..حاضر حاكلمهم.
عباس : (يتصل بالتليفون ) ايوه يا سالم....فينك يا عم...وحشتني تفانينك يا با..ما تيجي شويه نتسلى...بقالنا كتير مادخلناش على صفحة المحروسه.

( سالم و عباس قدام الشاشه، فاتحين صفحة بنت اسمها "جموح انثى" )
عباس : هاها...شفت كام واحد بعتين ارقام تليفوناتهم...يا عيني يا عيني..و ديني لوريكي مين عباس...بص بص يا سالم ....الراجل ده باعت عنوانه كمان..ايه رايك نبعتله رساله مولعه ...هاهاها...دي عالم فاضيه يا عم....... دخلت على صورها، و جبتلي صوره منهم؟
سالم : لا ..مالقتش ...بس جبتلك صور بنات ناااااار.......كفايه رقم تليفونها...خليها تتفضح.
عباس : ايوه كده يا وديييع .....افضحها كمان و كمان..انا حاعلمها الادب بنت الـــ............ناس.

(اليوم اللي بعده الصبح بدري)

باسم: الو ..ايوه يا احمد...شفت الكلب عامل ايه على الصفحه...ادخل و بص.....
احمد :خللي اميره تعمل حاجه بقى..ماينفعش كده
باسم : ده اكيد...صبرك عليا يا عباس الكلب

( الساعه 10 الصبح...تليفون عباس بيرن.....بيسيب ملاحظة الانفار و يروح الحمام بسرعه)

اميره : الو..عباس.....انا....انا اميره
عباس : يا دين النبي...اخيرا حنيتي عليا و كلمتيني..ده ايه زقزقه العصافير دي يا ناس
اميره : اسيبك عشان الامتحان....باي (بتقفل السكه )
عباس : الووو...الوووو....بالسلامه يا قمر
( نفس اليوم بالليل.........بتسيبله رساله عالفيس بوك : مش حاينفع اكلمك...ماما شافت رسايلك اللي عالموبايل و بهدلتني و شكلها حتقول لبابا........باحبك )
عباس :" يا ليله سودا..لابوها يعمل فيها حاجه.......و لا تكون بتشتغلني؟.....حاكلمها 
عباس : الو......مين معايا ( صوت غير اميره بيرد )
مامتها : الو ..انت اللي مين..انت الولد اللي شاغل اميره عن المذاكره ...من فضلك ماتكلمهاش تاني....اميره مخطوبه لابن عمها و حتسافر سوريا لما تخلص امتحانات
عباس : بس يا حاجه اني باحبها و حتقدملها
مامتها : بلا حب بلا كلام فارغ..قلتلك انساها (وبتقفل السكه )
( بيرن كتييييييير و بيبعت رسايل كتيييييير و اميره مابتردش و ما بتظهرش عالفيس بوك.....بيزهق...بيكلم سالم)
عباس : ايوه يا سالم ..ماتيجي نتسلى شويه عالبت ..اصلي زهجان و مخنوج
سالم : طب حاخلص الورديه و اجيلك

( بيفتحوا صفحة "جموح انثى " و بيبعتوا دعوات لامة لا اله الا الله ..رجاله و ستات )
(تاني يوم ...عباس بيقرا رساله من اميره على الفيس بوك)

" الحقني يا حبيبي...ماما منعت عني التليفون و النت...انا بابعتلك من على كمبيوتر واحده صحبتي..انقذني "
(عباس بيكبر دماغه...شغل بنات ...بالليل بتجيله رساله من تليفون غريب : اميره حاولت تنتحر.....ايه شغل افلام ماجده ده....بيتصل بالرقم ...بترد عليه واحده......)
عباس : مين معايا؟ 
ساميه : انا ساميه خالة اميره..انت الشخص اللي بتحبه؟
عباس :" بتحبه؟...هي جلتلك كده؟...ايوه انى عباس
ساميه : حبيت اقولك ان اميره بنت ساذجه..عمرها ماحبت و لا عرفت حد...انت عاوز منها ايه؟
عباس: انا غرضي شريف و اللهي..حاتجوزها
ساميه : و انت جاهز للجواز؟
عباس : اه طبعا...انا مهندس و حاجيب اللي تجولوا عليه
ساميه : خلاص..انا حاحاول اقنع باباها و شوف انت تقدر تييجي تتقدم امتى
عباس : على طول ان شاء الله..الاجازه الجايه..كمان عشر ايام....سلميلي عليها جوي و طمنيها و حياتك
عباس (بيتصل بسالم) : تعالى طوالى ، عاوزك في موضوع كده
سالم : خير..جايبني على ملا وشي ليه؟ عاوز تتسلى تاني؟
عباس : لا...دني حاتجوز
سالم : ايه...تتجوز.....ليه...مين...انت ما حرمتش...... و دي عرفتها منين؟
عباس : من عالفيس
سالم : هاهاها...يا اهبل...بنات الفيس دول مش حقيقيين..انا برضو اللي حاقولك؟
عباس : بس بس انت مش عارف حاجه....دنا شوفتها و كلمتها هي و امها و خالتها..البت خام ..و طيبه...و زي القمر
سالم : ربنا يسهلو يا عم......بس حاسب لتقع فى الخيه
عباس : هو انا جايبك عشان تدعيلي؟ انت حتيجي معايا اكنك ابن عمي
سالم : لا يا عم ..انا اكتر من النت و ماليش دعوه بمغامراتك...كفايه اللي عملته معاك في البت اللي رفضتك
عباس : يا سالم انت صاحبي و حبيبي..ما تقلقش خالص..انا قصدي شريف
سالم : شريف ازاي و انت حتكدب عليهم
عباس : يا عم انا اللي حاكدب مش انت

( بعد عشر ايام )
(بيخبطوا عالباب........بيفتحلهم راجل كبير....اكيد ابوها..عم الحاج)

عم الحاج: اهلا و سهلا...اتفضلوا
( بيقعدوا فالصالون...عباس منشكح و فاتح بقه في ابتسامه هبله...سالم متوتر...و الحاج بيبصلهم بنظرات غريبه.....شاب بيدخل عليهم)

عم الحاج : ده باسم....اخو اميره...طالب في هندسه...زيك يا استاذ عباس
عباس : اهلا و سهلا...بس انا هندسة اسيوط...قسم معمار ......هاهاها
باسم : صدفه عجيبه و انا كمان قسم عماره ...دحنا مش حنبطل كلام يا استاذ عباس..ولا اقول يا بشمهندس؟
عباس : انشاء الله ..انشاء الله بس نيجي للمهم....اماال فين العروسه؟
عم الحاج : الصبر بالله يا بشمهندس....احنا لسنا ماتعرفناش
عباس : تحت امرك يا حاج..اامر
عم الحاج : و انت بتشتغل فين فالخليج؟
عباس : الكويت ان شاء الله
عم الحاج : و عندك شقه؟
عباس : حاجيب ان شاء الله على ذوق العروسه
عم الحاج : خطبت قبل كده يا باشمهندس و لا اتقدمت لحد؟
عباس : اتقدمت مره لبنت و طلعت اخلاجها مش كويسه
عم الحاج (بينط من فوق الكرسي و كانه اتلسوع فجأه ) : اخلاقها مش كويسه يا واطي يا ابن الواطي (بيمسك في هدوم عباس)
عباس : ( مندهش...هو عمل ايه....احمد بيدخل ...بيمسك عباس من قفاه ..باسم بيشد سالم..و يكتفه)

عم الحاج : بانا بنت اختي عبير اخلاقها وحشه...ده اللي كنت انت و صاحبك بتعملوه عالنت يا حيوان منك له ..عاوزين تسوءوا سمعتها..دنتوا حتروحوا فداهيه
عباس : ( مندهش و مصدوم ) : عبير ......انت ابو الست عبير.....انا انا مالى ..انا ماعملتش حاجه...انا مش فاهم حاجه
عم الحاج : كل ده عشان رفضتك لما عرفنا انك كداب و لا مهندس و لا حاجه و ان عندك تلات عيال فالبلد؟ هي بنات الناس لعبه و تسليه...انا حاوريك التسلية يا خسيس (بيضربوا بالاقلام على وشه...و باسم بيضرب سالم)
عباس : حجك عليا يا حاج.....ماجصدناش و اللهي....هي حسستني انى صغير ...كرامتى تعبتني....حجك عليا
سالم : انا ماليش دعوه...هو اللي وزني...انا كنت بارد اعتبار صاحبي
عم الحاج : يعني تضيعوا مستقبل بنت و سمعتها عشان كرامتك منك له...و كرامتك ايه يا كداب يا محتال..دنت حتتسحل عالسجن حالا
عباس : مش حتجدر تثبت اي حاجه.....اعلى مافخيلك اركبه و حابلغ انك اتعديت علي فبيتك
عم الحاج : لا يا خفيف ..مانا ماقدمتلكش الملازم احمد....سمع كل الكلام و شاهد عليه....و البشمهندس باسم معاه تسجيل بكل احتيالك عالفيس بوك....ولو حبيت تعرفو اكتر....ده يبقى المحروسه اميره بتاعتك....فضل وراك لما جاب ارارك..بطريقتك برضه.

سالم : يا ولاد الذين...باسم هو اميره...الله يخرب بيتك يا عباس

عباس : " زي اللي مضروب على دماغه" بس دي كلمتني...هي و امها و خالتها....ازاي؟
عم الحاج: دول اخوات عبير يا غبي اللي كنت عاوز تبهدلها من غير ذنب
احمد : امشي قصادي منك له....خللي الفيس بوك ينفعك يا ابو العيال..قال قصدك شريف قال...شريف ده يبقى جوز امك

عباس : بس ماتجبشي سيرة الحاجه !!!!!!!! ( قلم بينزل على قفاه يخللي ودانه تصفر......تيييييييييييييييييييييت )

و يصوت ديك الصباح...فتنخرس شهرزاد عن الكلام اللامباح........مؤقتا برضه ..

هبه هانىء