الثامن و غرابته

كتب بواسطة: Mohamed Salah في . القسم archive 2009

بصوا بقى انا قلت الدورى حيولع يعنى حيولع؛ الدورى حيولع فينا فعلا ... ومابقتش عارفة ليه معظم الماتشات بتجبلى حموضة. وده خلانى احسن مستهلكة لأكياس المالوكس (مضاد للحموضة ورائع عشان بيشتغل خلال 5 ثوانى ) واليكم التفاصيل من غير تفصيل. الخميس اللى فات (22/10) : مباراة عجيبة ... انبى ( يلاحظ انها ب تقيلة؛ P يعنى) وحرس الحدود: الحرس ماحدش عارف ماله. انبى كسب الماتش 2-1 والماتش كان حلو اوى اوى الصراحة، لكن اوحش حاجة فيه كان صدمتى فى الحرس اللى كنت متوقعة منه اكتر من كده. لكن الماتش كان فى مجمله حلو وتحس انه نعنش انبى قبل لقاء الأهلى. الأسبوع الثامن : حوش حوش اللعب حوش ؛ الحق يا عم عشان ناخد اللعيبة الجامدة دى فى المنتخب عشان الجزاير : السبت (24/10): الإنتاج الحربى × الزمالك (3:2) ايه المسخرة دى ؛ الماتش والله ولا مسرحيات محمد صبحى، اللى لازم تقع ع الأرض من الضحك فيها، ايه الضحك ده ؟ دعوة لكل مكتئب ان يشاهد هذه المباراة ؛ عارفين اما تبقوا متضايقين وتروحوا تشتكوا لحد يجى الحد يشتكيلك فتهون عليك بلوتك ... اهو هو ده الماتش. الإنتاج الحربى فريق اكتر من ممتاز، والزمالك اكتر من مجرد فريق محظوظ. حظه كان اكتر من حظ طبيعى ... لكن ربنا بيبعت رسايل للجماهير اكيد عشان الإدارة مابتفهمش ان ميدو ده مالوش لازمة والله، وان هو ماهر جدا فى البلطجة بس لكن الإخلاق والكلام الفارغ ده مالوش لازمة . الإنتاج الحربى استحق ان الناس تقول عليه ان عمل اللى عليه وزيادة لكن ربنا ما ارادش، وان الزمالك يحتوى على عبد الواحد اللى لما بيتعدل وياخد الموضوع جد بيبقى احسن من عصام الحضرى ... بس هى فين الجدية دى اللى بتظهر كل دورى مرة واحدة !!! احسن تعليقات بعد المباراة : 1. لاعبو الزمالك غاضبون :المهم التلات نقط اشمعنى الأهلى اما بيلعب وحش بتقولوا المهم التلات نقط ؟؟؟ عشان الأهلى يا غندور منك ليه مش بيهزأ نفسه ولا جمهوره فى الماتش ويقول ان الأداء كان مش حلو لكن المهم التلات نقط. وعشان اللعيبة بتبقى فيها اللى مستواه قالل واللى مستواه معقول مش كلهم ضايعين ... وعشان الجماهير بتغفر ماتش اتنين تلاتة؛ دورى اتنين تلاتة اربعة ... لكن كل ماتش كده ؟!!! يعنى حتى اما تتمعظموا وتكسبوا يبقى ماتش بالإستفزاز ده !!!! والناس طول ال 90 دقيقة مرعوبة منكم ...منكم لله الصراحة. 2. الزمالك يستعيد ذاكرة الانتصارات: حرام عليكم ؛ بالذمة اما لاعب من الزمالك يشوف العنوان ده حيقول ايه ؟!! اقولكم انا: حيريح التلات ايام الراحة السلبية وباقى الأيام الراحة "الأنتوخية". 3. ميدو للمرة التالتة: انا على استعداد ابقى مع المنتخب ان شالله الم الكور. هو ده الدور الوحيد اللى يصلح ليك فعلاً، بس المشكلة ان حسن شحاته لو خلاك تلم الكور حتطلع بعد الماتش تشتمه وتلعن سلسفيل جدوده، عشان وقفك عند مرمى الجزاير مش العكس. وقليل ان ما سبت لم الكور ورحت فتحتله مطواة. 4. ابو العلا: جماهير الزمالك سبّت (شتمت) لاعب حصل مع الزمالك على 16 بطولة. مش قصدهم يا ابو العلا، دول بيشتموا ويكرهوا اللى يقول امين. انت لاعب مؤدب وهم اكيد زعلانين عشان انت مشيت من الزمالك ... ويا سيدى اكيد لو رجعت برضه حيشتموك عشان ماحدش مش بيتشتم فى الدورى المصرى ؛ده حتى لسه شاتمين العارضة مرتين الأسبوع اللى فات. الجونة × الإسماعيلى (2-2) واصل الإسماعيلي فقدانه للنقاط وتعادل مع مضيفه الجونة بهدفين لكل فريق في اللقاء ... ولا تعليق سوى ان الجونة يستحق التحية الصراحة. الإثنين (26/10): حرس الحدود × بتروجيت (1-3) ماتش حلو اخر حاجة ؛ انا بس نفسى اسأل مختار مختار هو انتوا ليه مش بتكملوا كده؟ ليه بتهجسوا فى الدور التانى؟ واسأل طارق العشرى: مالك يا ابو الكباتين ... انت اتقر عليك والا ايه؟ انا قلت بعد ماتش انبى حتنزل تقطع بتروجيت، لكن تنزل انت شاورمة كده؟ لا والف لا ... بس الصراحة ماتش جميل وسريع ومهارات ويستحق نظرة من حسن شحاتة ؛ و أهداف لوبية اوروبية عالية ... بس والنبى يا كابتن شحاتة بلاش الدبدوب اللى كان وشه حلو ع المنتخب فى الجزاير ده. احسن لسه دبدوب مش قادر يجرى ... ولا الباشا اللى اما بيبصلنا كل الجمهور بيخاف، يا اما خده بس خللى وشه على جمهور الجزاير احنا كده كده مرعوبين. الأهلى × انبى (P فور Pen) الشوط الأول: ايه البواخة دى؛ ولا حاجة تفتح النفس؟ ماتش بايخ ... ماشى يا جماعة حصل خير، انا غلطانة انى باتفرج ع الماتش من اوله. احسن حاجة نتفرج ع الاستراحة. الشوط التانى : اهو معقول شوية ... كل اللى مستغرباه الجون التانى للاهلى ومطالبة بعض الناس انه يكون ضربة جزاء؟!! طب ماهو جه جون مالكم بقى؟ ناس تانية تقولك فضل كان متسلل، طب ماهو جه جون و الأهلى كان كسبان كسبان. بس هو انبى مالهم، شلكهم كانوا شبه الناس اللى كلت كسكسى قبل ماتش الجزاير ... هما الناس مش بتستمر فى الانتصارات ليه؟ والله ما عارفة اقول ايه. يا جدعان والله سيبوا الموضوع على الله بلاش كلام بقى ؛ الحكم اللى لغى ضربة جزاء لأنبى بعدها لغى واحدة للأهلى ... واللى حسب انذار على احمد على ماحسبوش على لاعب انبى ابو اسم غريب ده. ومش ممكن ان الأهلى عمال يكسب كل الماتشات عشان الحكم كان معاه وطرد عمرو زكى ؟!!! بلاش هلفطة وسيبوكوم من التفاهة دى. ويا حسن يا ابو على ؛ كل مقدم فى برنامج بيقولك على لاعب حبيبه ... ف ارجوك لخص كده وما تنساش هه: ميدو حيلم الكور ... ماشى. سماح احمد فايد http://www.youtube.com/watch?v=CspY979Vq7k&feature=related http://www.youtube.com/watch?v=CspY979Vq7k