#هند_يوسف تكتب: جو جنان

كتب بواسطة: هند يوسف في . القسم نص الكوباية المليان

 

 

 

اضحك ع الناس وخد طاقة ايجابية من طاقتهم السلبية ..

اقولك ازاى ..

فيه ناس دايما لابسين نضارتهم السودا ودايما بيفترضوا الوحش قبل الحلو ..

الناس دول بقى هما إللى لما تروحلهم بمشكله بيكون دايما ملهاش حل ..

لما تروحلهم وانت متضايق وعلى اخرك بدل ما بيقولوا كلمة تهديك هتلاقى نفسك متضايق اكتر واكتر ..

لما بتكون قربت تنفجر وفاضلك تكة هتلاقيهم جايين معاهم عود كبريت .. وماتقلقش هيقوموا بالواجب ..

لما تشتكى من حاجة تلاقيهم لازم يحلفوا ويقولولك والمصحف وانا كمان زيك بالظبط ويمكن اكتر ... وتلاقيهم حطوا عليك اكتر بمشاكل ومصايب من الشرق والغرب وانت اصلا مش ناقص ..

الناس إللى دايما مبسوطين زعلانين بيشتكوا وخلاص وشايفين فى كل حلو لازم يكون فيه وحش ..

الناس إللى بتكلكع كل حاجة بسبب او من غير سبب ..

نصيحة بقى لوجه الله ... الناس بقى إللى عكس الناس إللى فوق دوول ... إللى دايما بيعافروا علشان يسهلوا كل صعب ويحلوا كل مشكلة ويعدوا كل مصيبة .. انتم إللى زيكم انقرضوا من زمان واوعوا تفكروا لثانية انكم تدخلوا فى الدوامة دى ..

نرجع بقى نتكلم فى ازاى طاقتهم السلبية إللى بتشع من كل مكان تاخدها وتحولها لطاقة ايجابية يمكن يتعدوا منك ..

لما تلاقى حد كده مش هقولك ابعد عنه زى ما ناس كتير بتقول .. لا كده هتساعد ان الفيروس ينتشر اكتر بينا وتقريبا هنتنفسه بدل الاكسجين !!!

أومال تعمل ايه ..
كل ما تلاقى حد جايلك بمصيبة قوله ان كله بيعدي ومتقلقش ..

كل ما تلاقى حد تعبان ومجهد وقرفان قوله معلش ربنا يقويك واديله امثله ان حصلك كده وفى الاخر محصلش حاجة وعدت على خير ..

كل ما تلاقى حد بيحكيلك مشكله فكرله فى حلول وقوله انك قوى وادها وادود ..

صدقنى عن تجربة الموضوع هيفرق جدا معاك ومع إللى بتكلمه ..

معاك هتحس انك قوى ودايما بتبص للنص المليان ..

مع إللى بتكلمه هيحب يتكلم مع إللى زيك ودايما هيروحلك علشان معاك بيلاقى نفسه مش بيتوه من نفسه ..

وياسلام بعد كده مش بعيد تلاقيه هو إللى فى مكانك بيقوى ويشجع غيره ..

بمنطق قانون الجذب:

كل واحد فى ايده يجذب ليه إللى هو عايزة .. لو عايز تشم هوا صافى ونقى هتلاقى ولو عايز العكس برده هتلاقى .. انت إللى بتختار الجو إللى عايز تعيش فيه.

هند يوسف