#هند_يوسف تكتب: مقاسك مش مقاسى

كتب بواسطة: هند يوسف في . القسم نص الكوباية المليان

 

 

"اللى ايده فى المايه مش زى اللى ايده فى النار" !!!!

يعنى لازم قبل ما تحكم على حد ياريت لو تحط نفسك مكانه الاول قبل ما ترمى اتهامات وأراء من غير حتى ما تفكر تسأل نفسك "انا لو كنت مكانه كنت هعمل ايه" ؟؟!!!!!

ساعات تلاقى حد زعلان من موقف او حاجة معينة والموضوع مأثر فيه اوى فتقول :
ايه ده هو ماله اوفر اوى كده ليه ؟؟
وليه مكبر الموضوع كده ؟؟
وليه واخدها على كرامته اوى كده ؟؟
وازاى يعمل كده ؟؟
وازاى يقول كده ؟؟
و 100 الف ليه وليه وازاى ...

سؤال بقى
حد قالك ان هو زيك ؟؟
حد قالك ان انت زيه ؟؟

اكيد انت بتفكر وتحس وتحكم ع المواقف بطريقتك وهو كمان بيفكر ويحس ويحكم ع المواقف ويزعل او ميزعلش برده بطريقته ..

ولو انت قلبك قلب اسد وتسد فى اى موقف من غير ما تتأثر .. فيه غيرك مرهف المشاعر وممكن حاجات بالنسبالك تكون صغيرة بالنسباله تكون كبيرة .. وده مش عيب ولا فيك ولا فيه ..

ف مش من حقك تحكم عليه طالما انت مش فى مكانه.
ف مش من حقك تحكم عليه طالما انت مش زيه.
ف مش من حقك تحكم عليه طالما هو مش زيك.
ف مش من حقك تحكم عليه علشان ده ميخصكش اصلاً.
ف مش من حقك تقول عليه انه اوفر علشان ممكن اوى تكون انت اللى بالنسباله تكون اوفر !!
دع الخلق للخالق.

 هند يوسف

#نص_الكوباية_المليان