#هند_يوسف تكتب: أنا تهت منى

كتب بواسطة: هند يوسف في . القسم نص الكوباية المليان

 

 

فرحانة ولا زعلانة .. هادية ولا شقية .. راضية ولا متمردة .. ايجابية ولا سلبية .. ذكية ولا غبية .. متفائلة ولا متشائمة .. فرفوشة ولا نكدية .. انا مين ؟ّ!!
اقولك انا بقى ليه كل الأسئلة دى !!!

فى يوم كده كان واخدنى جو انى اكون سبع رجالة فى بعض وانا مش ضعيفة وسلبية انا قوية وايجابية .. زى جو كده انا مش قصير اوزعة انا طويل واهبل ..
وقررت من اليوم ده انى لازم اكون ايجابية فى كل حاجة وبينى وبينكم انا اصلاً بحس انى خايبة فى مواقف كتير او بمعنى ادق كسلانة وبحب الانتخة شويتين تلاته ولكن بعافر علشان اكيد عندى شوية احلام كده ولازم احققها ان شاء الله فى يوم من الايام ..

عندى احساس انى لما اقع انى هقوم يعنى هقوم وفى الآخر بتيجى معايا كده بفضل ربنا وببركة دعا الوالدين ..

وكانت اول خطوة انى اقوم علشان فى الفترة دى كنت واقعة شويه كانت "نص كوبايتى المليان" و اللى كان هدفى فيه انى فى كل مشكله هبص للنص المليان مش الفاضى وكل اللى كنت بكتبه كنت بقوله لنفسى قبل ما اقوله لأى حد تانى ولقيت ان الكلام او التفكير بالطريقه دى بيقوينى وفضلت موقف ورا موقف وانا اقول انا مش قصير اوزعة انا طويل واهبل قصدى انا مش ضعيقة وسلبية انا قوية وايجابية.

نرجع لموضوعنا وليه كل الاسئلة اللى كانت فوق دى؟؟

اصلى مستغربة اوى وساعات بكون تايهه منى اللى هو زى انا تهت منى انا مش عارفنى لعبد الباسط حمودة .. مش عارفة ايه كمية الكآبة والنكد والتشاؤم اللى معيشة نفسك فيه ده يا استاذه هند وكمان من غير سبب .. اه والله وحتى لو فيه سبب بيكون حاجة تافهه متستهلش كل جو الدراما ده .. بقى اللى بتكتب نص الكوباية المليان تكون اول واحدة كوبايتها فاضية كده ؟؟!!!

وبم انى مصممة انى لو دخلت فى جو الاكتئاب اللى بيجلنا مره كل سنه ولازم يحط التاتش بتاعة وينكد على حياتنا انى مش هاخد حبتين منوم علشان انسى ولا مهدىء علشان اهدى .. لأ قررت ان انا اللى هنكد عليه وزى ما اتفقنا هقوم يعنى هقوم ..

بصوا بقى لازم تعرفوا ..

مش معنى ان الايجابية بتقع منك فى كل حتة انك مش هيجيلك وقت وهتكون سلبى لأقصى درجة ممكن تتخيلها ..

مش معنى انك بتكون فاتح بقك من هنا لهنا طول الوقت .. انك مش هيجى يوم والنكد هيكون الزى الرسمى ليك ..

مش معنى انك صبور وحلو ولذوذ .. انك مش هيجيلك وقت وتكون عصبى وغلس ومش طايق عصافير وشك "سورى اصلى مش بحب الدبان"

مش معنى انك طالع نازل وكلك طاقة وحيوية .. انك مش هيجيلك وقت وتبقى مش قادر تقوم من ع السرير ..

عرفتوا بقى ليه كل الأسئلة دى علشان لو مستغرب ان مودك بيتغير كل فيمتو ثانية وزعلان وحيران ومش عارف نفسك انت مين فى دوول .. انت كل دووول ..
شوية كده وشوية كده وعلى فكرة ده عادى ومش انت لوحدك اللى كده واللى انت شايفهم حياتهم فلة شمعة منورة مش دايما كده ساعات الشمعة بتولع فى الذرة وبتكون حياتهم متلخبطة شوية ..

بقولك كده مش علشان تفضل فى جو الاكتئاب وانك تستسلم بس بقولك كده علشان تفكر نفسك ان كله هيعدى وده هيقصر مده حكم القاضى عليك ويمكن يكون مع ايقاف التنفيذ لو انت شاطر ايها القاضى ..

حاول انك تخرج نفسك بأسرع وقت ممكن علشان متغرقش فى دوامة ملهاش لازمة !!

"متغرقش نفسك فى دوامة انا تهت منى انا مش عارفنى، عشان ده بحر مش هتعرف تعوم فيه .. انت عارف نفسك كويس ورايح تاخد غطسين وراجع تانى .. يعنى متهتش ولا حاجه" ..

   

 هند يوسف

#نص_الكوباية_المليان