#هند_يوسف تكتب: ناس ذوق أوى يا خااال

كتب بواسطة: هند يوسف في . القسم نص الكوباية المليان

 

 

كلنا بنسمع كل يوم حوارات و هرى كتير فى مواضيع كده زى مثلاً :

الست الرخمة اللى لما تشوف ابنك او بنتك تقولك ايه ده هو جايب الوحاشة دى منين ..
ايه ده هى سمرا كده لمين !!
ايه ده هو اوزعة كده لمين !!
ايه ده هى شعرها وحش كده لمين !!


وغيررررررها كتير من غير مراعاه لمشاعر الطفل او ليكى او انك شايفة ابنك او بنتك احلى طفل فى الدنيا..

الجديد بقى ....

لما حسوا ان الوعى زاد عندنا والكلام ده مش بيأثر فينا ودلوقتى بكل سهولة ممكن تخلى بنتك شعرها سايح ونايح والولد الاوزعة يلعب عقله ويبقى اطول من خالد سليم بذات نفسه .. ف حبوا يفتكسوا حاجات جديدة اومال يعيشوا ازاى من غير ما يعيبوا على ده وينتقدوا فى ده .. فتلاقى اللى تقولك :

ايه ده ابنك عنده سنه ونص ولسه مش بيمشى يا نهار مش فايت !!!
معلش يا طنط اصله بطة شوية وبكره يخس ويمشى ان شاء الله ..

ايه ده ابنك لسه مبيتكلمش ما توديه لدكتور .. وديته وقالى الجيل ده معظمه كده ولسه وقت القلق مجاش .. متقلقيش انتى بس وخليكى فى حالك ..

ايه ده ابنك فى مدرسة "الايف بى اس" دى مستواها مش اد كده ..
معلش بقى على اد فلوسنا ولا هتشخشخى جيبك شوية وتدفعى انتى .. وحياتك من بكره الصبح انقله فى احسن واغلى مدرسة فيكى يا جمهورية هو انا هحب حد اكتر من ضنايا ..

ايه ده انتى سايبه ابنك يحط ايده فى بقه كده عادى ؟؟ ما تعملى حاجة ؟؟
معلش يا طنط أصله جعان وانا معنديش اكل فقلتله ياكل صوابعه ..

اكيد يا طنطى مامته مش مستنياكى تقولى كده واكيد جربت من اول الصبار والشطة والبن والذى منه لغاية Mavala Stop ومفيش نتيجة ولو عندك حل تانى ياريت تقوليلنا .. ملحوظة : ل اللى مش عارف “Mavala Stop” ده حاجة كده ابشع من الصبار ..

ايه انتى سايبة ابنك ياكل لوحده ؟؟!!
ايه ده انتى بتأكلى ابنك لغاية دلوقتى .. اومال هيعتمد على نفسه امتى ؟؟!!
ايه ده انتى سايباه ينزل الشارع لوحده ومش خايفه عليه ؟؟!!
ايه ده انتى قافله عليه كده ليه ؟؟ ده انتى كده هتعقديه !! انتى فاكراه بنت ولا ايه ؟؟!!
ايه ده انتى ملبسه بنتك ضيق كده ليه هتتعود على كده ولما تكبر مش هتعرفى تحكميها ؟؟!!
ايه ده انتى ملبسه بنتك واسع كده ليه انتى فاكراها قدك ؟؟!!
ايه ده انتى بتدى ولادك دروس من دلوقتى ؟؟!!
ايه ده انتى لسه مش بتدى ولادك دروس لغايه دلوقتى ؟؟!!
ايه ده انتى بتخلى ولادك ياكلوا من بره البيت ؟؟!!
ايه ده انتى كل حاجة لأ لأ حرام عليكى خليه ياكل بره مره من نفسه ؟؟!!
ايه ده انتى بتودى ابنك الدكتور كل ما يكح ؟؟!!
ايه ده ابنك عيان ولسه موديتوش للدكتور ؟؟!!

مش عايزة ادخلكوا فى مواضيع اكتر من كده بس بجد الموضوع بقى اوفر بزيادة ..

 ياريت كل واحد يخليه فى نفسه ودع الخلق للخالق واللى عنده مشكله بيكون عارف كويس اوى و بيكون مش عايز حد يضغط عليه اكتر ما هو مضغوط .. ومفيش حد هيخاف على ولاده اكتر من اهله .. ولو افترضنا انها بنيه صافية وانها نصيحة لوجه الله ، يبقى لازم تفكروا فى طريقة الكلام والجمله اللى هتتقال قبل ما تجرحوا حد بكلامكم اللى الله اعلم هتكون نتيجته ايه ..

وبطلوا بقى قله ذوق وفكروا فى الكلام اقصد الدبش اللى بتقولوه قبل ما تقولوه !!!!

"لو حد قليل الذوق بيقولك كلام يضايق ، اوعى تسكت من غير ما ترد عليه ، وهترد كمان بكل ذوق علشان يعرف قيمته" ..

  

 هند يوسف

#نص_الكوباية_المليان