#هند_يوسف تكتب: قال طلقة قااال !

كتب بواسطة: هند يوسف في . القسم نص الكوباية المليان

 

فكرت فى مرة تعيش من غير نت كام يوم !!!

طب بلاش دى .. فكرت فى مرة تعيش من غير تليفون ولو ليوم واحد بس !!!

انا قررت آخد حبيتين شجاعة واخوض التجربة والحمد لله جربت .. تعالوا بقى اقولكم ايه اللى حصل لى واحنا عاملين فى نفسنا ايه ؟!!!

أولاً: دايماً بنقول معندناش وقت مع اننا مستعدين نضيع عشرومية ساعة واحنا مبحلقين فى الموبايل ولا اللابتوب.. معلش انت اللى مضيع وقتك علشان تعرف اخبار ده وحكايات دى وفى الآخر دى حاجة متهمكش اصلاً..

ثانياً: مش عارف تشوف أهلك بعد ما كان زمان لازم تتقابلوا ولو حتى مرة فى الأسبوع !! اه نسيت ان بقى فيه اوبشنز تانية اسهل واسرع ، علشان ببساطة بقى الطبيعى رسالة ع الواتساب او الفيسبوك بقى ده اسلوب الحوار والتواصل بينا ف ليه بقى التعب والمشاوير ونزور بعض وكام كيلو موز على كام كيلو يوسف افندى والغرامة دى !!!

ثالثاً: مش عارف حتى تعيش اللحظة وتقعد مع ولادك وتلعب معاهم، علشان طبعاً مشغول وعايز تعرف مين اتجوز ومين غيرت صورة البروفايل بتاعتها ومين دلوقتى قاعد فى كوستا بيشرب الهوت شوكليت بتاعه ومتنساش طيب تسأله الهوت شوكليت طعمه حلو ولا لأ !!!

رابعاً: حاسس دايماً ان الدنيا مملة ومش عارف تستمتع ب اللى بتعمله .. عادى ده الطبيعى ما اانت حتى وانت قاعد مع صحابك اللى يمكن مش بتشوفهم غير كل سنه مره، برده قاعد بتشوف مين خس ومين تخن ومين راح الجيم ومين لسه بيتفرج على ابى فوق الشجرة !!!

ويمكن لو كملنا مش بس هيبقى رابعاً ده كمان ممكن يكون فيه خامساً وسادساً وسابعاً ومليون كمااااااان !!!

ايوه مليون حاجة وحاجة دخلت حياتنا من غير استئذان وللأسف آدمناها وبقت حاجة فى حياتنا وكأنها من الأساسيات وهى فى الأصل السبب فى ضياع حياتنا !!!

جرب بقى كده تسيب تليفونك وانت نازل وقول انك نسيته واستمتع بكل لحظة وانت قاعد مع اصحابك وبص لشكلهم وركز فى حكاويهم اللى اكيد كانت وحشاك من سنين ..

جرب تشيل فيشة الراوتر وقول ايه ده النت فاصل وعايزين نكلمهم نعرف فاصل ليه ؟!! وعيش مع ولادك شوية وشوف ضحكتهم وهما بيلعبوا معاك اد ايه فيها كل المتعة ..

جرب توفر وقت من اللى انت مضيعه فى كل ده وروح زور حد من اهلك كان وحشك وشوف اد ايه هيفرق معاك اليوم ده !!!

جرب تشتغل بكل تركيزك من غير فيسبوك و واتساب وصور مين اللى نزلت على انستجرام ومين سافر ومين مسافرش ..

جرب تبطل إدمان لحاجات ضيعت فرحتنا حتى بأبسط الحاجات اللى فى حياتنا ..

كل حاجة وليها حدود لكن النت دايماً من غير حدود ... وعلشان كده عملوا النت الطلقة ونت من غير حدود لكن انت اللى تقدر تحطله حدود وطلقة ماشى بس على نفسه مش علينا ..

"متخليش اى حاجة تسرق وقتك وحياتك منك .. خلى دايماً وقتك ملكك .. انت اللى بتقسمه صح .. علشان تعيش صح"

 هند يوسف

#نص_الكوباية_المليان