#هند_يوسف تكتب: مصرى زى ضلى

كتب بواسطة: هند يوسف في . القسم نص الكوباية المليان

 

أحب فى البداية أعرفكم على نفسى وعلى تجربتى مع الكتابة ... وليه بكتب اصلا !!!

أصل فيه اللى بيكتب علشان عايز يشغل وقته ... وفيه اللى علشان موهوب وعايز ينمى موهبته ... لكن أنا كنت حاجة تالته خالص ..

أنا كنت عايزة افضفض .. ايوة افضفض !!

أنا صاحبة مقالات نص الكوباية المليان .. والاسم باين من العنوان ... وهى بتناقش ليه اشوف الفاضى لو ممكن اشوف المليان .. ده كان هدفى من المقالات، انى دايما افكر نفسى بالنص الايجابى، ولو مفيش بفضل انكش لغاية لما الاقيه.

ولما لقيت ان ده بيقوينى قلت لازم انشر الطاقة الايجايية دى لكل اللى حواليا ..

لقيت نفسى اى حاجة اشوفها بعينى واحسها بقلبى اكتبها بقلمى .. وقد كان ..

لقيت نفسى بكتب اى وكل حاجة بحسها، و اللحظات دى بتكون من اجمل لحظات حياتى .. احساسى فيها كأنى بتنفس وبشم الهوا ﻷول مرة فى حياتى .. وبعدها لقيت كلامى اللى بكتبه هو اللى فعلا بيقوينى، وكمان اللى زود قوتى وثقتى فى نفسى هى مجلتى "مصرى"..

"مصرى" بإختصار لو هوصفها فى جملة هقول "مصرى معايا زى ضلى" ..

أولا انا مصدقتش نفسى من سرعة ردهم على مقالاتى وقلت هو فيه كده..

ومصدقتش نفسى من سرعة تصميم اول صورة ﻷول مقالة ... وان بكره اول يوم للنشر .. وقلت هو فيه كده..

ومصدقتش نفسى انى قبل ما اسأل على النصيحة بلاقيها وقلت هو فيه كده ..

ومصدقتش نفسى بالالتزام والمجهود والوقت ... والصراحة كنت بسأل نفسى هى المجلة دى بتنام امتى؟؟!! اصلهم 24/7 تلاقيهم ..

وقلت هو فيه كده :)

شفتوا بقى ان "مصرى" معايا زى ضلى :)

شكراً لمجلتى وعقبال مليون سنة وانتى معانا كلنا زى ضلنا ..

وكل سنة وانتم طيبين

هند يوسف