#هند_يوسف تكتب: والنبى مش أنا خسيت؟!

كتب بواسطة: هند يوسف في . القسم نص الكوباية المليان

 

نفسى اخس .. نفسى اكون رشيقة .. نفسى آكُل كل اللى نفسى فيه وماتخنش .. نفسى انزل اتمشى كل يوم.. نفسى لما اعمل مجهود ماتعبش وافضل انهج بالساعتين .. نفسى آخد بالى من صحتى..

طب وليه لأ؟!! وليه نفسى وبس؟!! وعلامات استفهام وتعجب واستغراب واندهاااااااااش كتيييييييييييير..

ليه شايفين الموضوع صعب ولا هو اللى صعب فعلاً؟؟!

ليه دايماً معندناش وقت للرياضة او لنفسنا عموماً مع اننا بنضيع وقت كتير ع الفيسبوك والنت وحاجات تانية ممكن مايكنش ليها لازمة وبالساعااااااات كمان؟؟!

ليه هاااااااااااااااا ليه؟؟!!!

فيه اللى تلاقيها واخده الموضوع جد وانها لازم تاخد بالها من نفسها ولازم الرياضة تكون جزء من حياتها، ومش هتلاقيها بس كده لأ .. وكمان بتاكل اكل صحى وملهاش بقى فى اكل الشارع والجانك فوود والكلام ده!!!

واللى بتروح الجيم عشان عايزة تخس وخلاص، ولما تخس شوية هتلاقيها رجعت بطة تانى ... ولما تتخن تبقى ترجع تروح تانى ودوخينى يا لمونة دوخينى..
وفيه اللى عايزة تخس ومن اول اسبوع لو ماخستش تكتئب وتقول لأ انا مش رايحة تانى ومش نافع معايا اى حاجة، وتفضل تهرى فى نفسها وتحط همها فى الاكل وتاكل اكتر وتتخن اكتر.

لأ كده اووووفر ... ولازم تعرفى ان اكيد الدهون اللى فضلتى تربى فيها شهور وسنين مش هتيجى فى ساعة ولا ساعتين فى الجيم وهووووبا تروح سايحة..
واللى بتروح غصب عنها وهى مجبرة اصلها دفعت فلوس الشهر كله وازاى متروحش والفلوس تروح عليها، لأ طبعا ... واول لما الشهر بتاعها يخلص محدش هيشوف وشها ولا فى الجيم ولا حتى فى المنطقة كلها..

وفيه اللى عايزة تخس وتلاقيها بتوزن نفسها كل يوم الصبح وبالليل وقبل الاكل وبعد الاكل .. ياحبيبتى لازم تفهمى انك بتقيسى وزنك مش بتقيسى السكر صايم وفاطر!!!

واللى اكتر من كده كمان اللى تلاقيها تقولك انا خسيت فى اسبوع "250 جرام" ياااااااااى مش مصدقة نفسى اصلى بتعب اوى فى الجيم ... وتلاقيها فرحانة ومن كتر الانشكاح اللى هى فيها لازم تتصور سيلفى مع التريدميل وهى ضاربة بوز البطة..

وكله كوم واليوم الفرى كوم تانى ... تلاقيها ال 24 ساعة بتاكل ولما تسألها مش انتى عاملة دايت وهارية نفسك فى الجيم تقولك اصل النهارده "اليوم الفرررررررى". اووووووووووووه يا شيرررررررى

واللى تقولك ده انا حياتى كلها دايت ورياضة ورياضة ودايت وفى الآخر تطلع زى "مى عزالدين" فى فيلم "حبيبى نائماً"..

خلى الرياضة زى فنجان القهوة اللى بتشربيه عشان يظبطلك يومك، يعنى مش عشان تخسى وبس ومتركزيش بقى فى الربع ولا النص كيلو اللى خسيتهم ... وخلى الرياضة هى البنزين اللى بيحركك عشان تبقى كلك نشاط وحيوية ودايماً فى مووود حلو وعاملة احلى دماغ..

"الرياضة لازم تكون جزء من حياتنا ولو بصيت فى المرايه وحبيبت شكلك وانت كلك حيوية ونشاط هتعرف فعلاً انها لازم تكون اسلوب حياة"

 
صباحكم رياضة X رياضة

 

 هند يوسف

#نص_الكوباية_المليان