#هند_يوسف تكتب: ياعينى دى ماعندهاش بنت

كتب بواسطة: هند يوسف في . القسم نص الكوباية المليان

 

يا عينى دى عندها 3 ولاد ومجبتش بنت !! ده غيرجوزها كمان .. الله يعينها.

قلبى معاكى .. انتى قادرة على تربية الولاد دوول ازاى؟! دى تربيتهم صعبة اوى ولسه كمان لما يكبروا.

عندك ولاد!!! يبقى هتشوفى ايام بيضة .. هو انتى لسه شفتى حاجة. طب الحمدلله انها بيضة مش حاجة تانية!!!

يا عينى دى كل خلفتها ولاد!!!

يا عينى دى مخلفتش بنت .. اومااااال مين اللى هيشيلها لما تكبر.

اوعى متجبيش بنت!!!

يالا بقى هاتيلنا بنوتة حلوة كده زيك !!!

عندك ولدين يبقى لازم تجربى تجيبى التالت والمرة التالتة دى اكيد بنت وعلى رأى المثل التالتة تابتة !!!

كفاااااااااااااااااااااااااااااااااااااااااااااااااااااااااااااااااااااااااااااية ....

الموضوع ده ابتدى يعصبنى ويشغل حيز كبير اوى من تفكيرى، بما انى أم لولدين، وبينى بينكم كان نفسى برده فى بنت زى كل الناس عشان هى اللى هتشيلنى لما اكبر!!

بس استغربت هو ليه دايماً كل ام نفسها فى بنت، وان هى اللى هتشيلها واللى مجابتش بنت تبقى مخلفتش!!

وليه الأم اللى عندها ولاد مش متطمنة وعارفة انها لما تكبر مش هتلاقى اللى يشيلها!!

ليه يكون عندك بدل الطفل اتنين وتلاته وساعات اربعة، وترهقى نفسك وتكونى عايزة تخلفى تانى عشان تبقى "أم البنت" وان هى اللى هتشيلك!!
انا معاكم ان البنت بتشيل مامتها لما بتكبر، بس مش عشان هى "بنت" ابسولوتلى نووووت .. هى بتشيل عشان اتربت واتعودت على كده.

اقصد اقول ان تربيتنا وثقافتنا ان البنت هى اللى تطبخ وتنضف وترتب وتجيب طلبات البيت لكن الولد لأ عشان عيب وميصحش!!

يعنى المشكله مطلعتش فى بنت هتعرف تشيل لكن لو ولد لأ مش هيعرف!!

ولو كان الولد اتعلم ده من الأول زيه زى البنت كان هيبقى مفيش فرق بينه وبين البنت ... لكن المشكلة طلعت مشكلة عادات وتقاليد مش اكتر..
انا اعرف ام لولدين كانوا بيساعدوها فى كل حاجة من وهما صغيرين عشان هى اللى عودتهم على كده.

عودتهم يرتبوا اوضتهم دايماً.. عودتهم يغسلوا طبقهم بعد الأكل .. عودتهم يساعدوها فى المطبخ وهى بتحضر الأكل .. ولما كبروا بقوا يعرفوا يعملوا كل حاجة وهما اللى شايلنها دلوقتى لما بتتعب..

ولكل اللى بيقول ان مينفعش الولد يعمل كده وانه عيب وميصحش .. ممكن بقى تعرفونا هو ايه العيب فى كده وعيب ليه ؟!!!!!!!!!!!

كل اللى عندها بنت ربنا يخليهاك وعوديها تساعدك من صغرها عشان تشيلك لما تكبرى ولو معلمتيهاش يبقى مش هتعرف تعملك حاجة زيها زى الولد اللى متعودش يساعد عشان ميصحش وعيب..

وكل اللى معندهاش بنت وخلفتها ولاد زيى كده. اوعى تزعلى نفسك وتسمعى لكلام اللى حواليكى، واعرفى ان ولادك دوول نعمة من عند ربنا وسندك وضهرك فى الدنيا وتربيتك ليهم هى اللى هتفرق ... ولو ربتيهم على انهم يساعدوكى وان قلبهم يكون عليكى ساعتها مش هتقولى مش لو كان عندى بنت كان زمانها شايلانى دلوقتى..

"بنت ولا ولد .. مش دى المشكلة!! المشكلة انك هتربى بنتك ولا ابنك ازاى وهتعلميهم ايه"

 

 هند يوسف

#نص_الكوباية_المليان