#هند_يوسف تكتب: كله هيعدّى

كتب بواسطة: هند يوسف في . القسم نص الكوباية المليان

 

مش هتحس طعم الحلو غير لما تكون جربت الحادق .. مش هتحس الأمان غير لما تكون جربت الخوف .. مش هتحس الفرحة غير لما تكون جربت الحزن .. مش هتحس الراحة غير لما تكون جربت التعب..

مش هتحس حاجة غير لما تكون جربت عكسها !!!

لما بنتعرض لموقف صعب بنكون فى وقتها حاسين ان الدنيا وقفت وبقت سودا، وان مفيش حاجة حلوة واننا هنفضل كده ومش هنعدى المأساه دى .. بس كل ده بيكون احساس وقتى وبس !!! يعنى هياخد وقته وهيعدى .. كده كده هيعدى بس شطارتك انت بقى انك هتخليه يعدى بعد اد ايه ؟؟!!
بعد يوم ولا شهر ولا سنه ولا سنين ولا بعد ما يكون جاب أجلك خلاص ؟؟!!!!

لو حسيت بجد كلمة "كله هيعدّى" هتلاقى نفسك بتبص لكل موقف بيعدى عليك بمنظور مختلف، وساعتها هتسهل عليك كل صعب وتقصر كل طريق طويل وتبسط كل حاجة مكلكعة جواك .. وبعدها هتلاقى نفسك اتعودت على الأسلوب ده لغاية ما يكون " أسلوب حياة " .. احنا اللى بنختار أسلوب حياة لحياتنا عشان احنا اللى نعيشها مش هى اللى تعيشنا .. ودايماً اسأل نفسك سؤال:

لو صعبت كل حاجة عليا .. هستفيد ايه ؟!!!

لو عشت فى موود النكد دايماً .. هستفيد ايه ؟!!!

لو معدتش اللى المفروض انه يعدّى .. هستفيد ايه ؟!!!

"بلاش تاخد كل حاجة على أعصابك عشان ساعتها انت بس اللى هتتعب وخليك فاكر ان كله هيعدى "

 هند يوسف

#نص_الكوباية_المليان