#هند_يوسف تكتب: زماااان وأنا صغير

كتب بواسطة: هند يوسف في . القسم نص الكوباية المليان

 

لما دايماً يوحشك كل حاجة عدت ومش فى ايديك دلوقتى، مع انها لما كانت فى ايديك مكنتش حاسس بقيمتها وحبك ليها اوى كده..

يعنى لما تبقى فى المدرسة وتشتاق لأيام قبل المدرسة، عشان اللعب ثم اللعب ثم اللعب وبس، ومذاكرة ايه دى اللى بتخلينا منلعبش عشان نذاكر !!!
ولما تبقى فى الجامعة وتقول ياسلام لو يوم من ايام المدرسة وايام اللعب والتنطيط واحنا مستنيين جرس الفسحة، عشان ناكل بقيت السندوتشات اللى اصلاً اكلنا نصها سرقة تحت الديسك عشان الميس متشوفناش.

وطبعاً بعد السندوتشات هتجرى ع الكانتين عشان تشترى اللوليتا وتطلع لسانك لصحابك عشان توريهم ازاى لسانك بقى ملون، وبعدين تستنى المرواح وتجرى قدام المدرسة وتلاقى كل ما لذّ طاب من حمص الشام وغزل البنات وحب العزيز والحرنكش، وتبقى محتار تجيب ايه ولا ايه وانت الفرحة هتنط من عينك..

ولما تخلص جامعة وتشتغل هتقول ياسلام لو يوم من ايام الجامعة وايام المدرجات واللمة الحلوة والخروج مع صحابنا والمذاكرة فى التليفون قبل الامتحانات..
ولما تسيب شغل كنت قرفان منه، هتقول برده بعدها ياسلام لو يوم من ايامه مع انك مكنتش طايقه اصلاً !!!

ولو انتى اتجوزتى وسبتى الشغل، هتقولى ياسلام لو يوم من ايام الشغل .. ولو رجعتى للشغل تانى هتقولى ياسلام لو يوم من ايام قعدة البيت وانى اصحى وانام براحتى !!!

ولما ولما ولماااااااااااااااااااااااااااااااااااااااااااااا ..

الحقيقة بقى انك دايماً بتكون مشتاق لكل حاجة عشتها زمان، يعنى لو انت طفل هتشتاق لسنتين ولا تلاته لما كنت اصغر، ولو انت شاب هتشتاق لزمان لما كنت طفل، ولو انت عجوز هتشتاق لزمان لما كنت شاب.. يعنى دايماً بنشتاق لزمان اللى كان !!!

تقريباً هو ده الواقع ..

بنشتاق لأيام زمان عشان الأيام دى بتكون عدت وخلصت بكل ذكرياتها الحلوة ..

يعنى لو انت لسه عايش فيها مكنتش هتشتاق لها كده زى اشتياقك ليها لما بتعدى وتاخد لقب زمان !!!

"اه بنشتاق لأيام زمان، بس كمان حاول تبسط نفسك دلوقتى ... عشان دلوقتى بعد شوية هيبقى زماااان"

وهو ده النص المليان ..

انك تعيش دلوقتى وتستمتع بكل لحظة فيه و كأنه زماااااااان ..

 

 هند يوسف

#نص_الكوباية_المليان