#مطبخ_مروة يقدم: لانشون فراخ بيتى

كتب بواسطة: مروة فرجانى في . القسم مطبخ مروة

 

 

المدارس و السندوتشات و معاناة كل يوم الصبح.

طبعا الولاد بيحبوا اللانشون بكل انواعه .. بس بسبب قلة الضمير في المصانع و انعدام الرقابة و اللي بنقراه ، خلاص أنا منعته تماما.

دا طبعا عمل مشكلة في السندوتشات لان الاختيارات بقت قليلة و ابني بيزهق من التكرار.

عملت لانشون فراخ في البيت و طلع تحفة ... و كل مرة بجدد في لونه شوية و بهاراته، لانه بيغير الطعم و بيكسر الروتين جدا

حقولكوا علي المكونات الاساسية و طبعا ممكن نغير في البهارات براحتنا وكمان اللون، بمعنى مرة أحط رشة كاري يطلع اصفر و مرة احط رشة بابريكا ... وكله طبيعي و مضمون و طعمه فعلا تحفة ... و طبعا لو عايزة كمية اكتر ، ضاعفي المقادير.

 

 

المكونات:

٢ صدر فرخة

٢ بيضة

٢ ملعقة كبيرة دقيق

٢ جبنة مثلثات

٢ ملعقة كبيرة زيت

رشة بسيطة بصل بودرة و زيها توم بودرة

ملح و فلفل حسب الطعم

رشة ورق لورا و حبهان مطحون

بهارات و دا طبعا حسب الطعم

رشة كاري او ببريكا عشان اللون

قلب ٢ حبهان ، الحبوب السودة دي.

 

الطريقة :

-فرمت كل المكونات سوا و حطيتهم في طاجن فخار. انا شايفة دا آمن من اني احطه في مج لانه ممكن يطرقع، وكمان معنديش ستريتش فقولت استخدم حاجة عندي.

- غطيه بفويل، بس ماتمليش الطاجن غير لنصه بس، لانه لما بيستوي بيعلي .

- قسمي الكمية علي كذا طاجن بس لنصه بس

- علي النار ،مليت حلة ربعها مية مغلية، بحيث ماتوصلش لوش الطاجن لما احطه، تكون لنص الطاجن مثلا، لحد ما استوي علي نار هادية و كل شوية ازود المية لما تقل .... سبته ساعة الاربع بالظبط.

- اختبرته انه استوي زي الكيك ، حطيت سكينة و طلعت نضيفة . سيبيه يبرد خالص و حطيه في التلاجة شوية قبل ما تقطعيه شرائح .

ولادك ياكلوا لانشون بيتي مضمون و مغذي جدا لانه فيه فراخ فعلا مش مكسبات طعم و بيض و غيره و تبقي مطمنة.

 

 و الف هنا و شفا. مع مطبخ مروة مجتمعين كلنا

مروة فرجانى