#مطبخ_مروة يقدم: مهلبيتى

كتب بواسطة: مروة فرجانى في . القسم مطبخ مروة

 

الجو ده محتاج حاجات ساقعة و خفيفة و برضه مفيدة. مش لازم ايس كريم. ممكن مهلبية أو رز بلبن أو كاسترد.

النهارده حنعمل مهلبية بس بطريقتى. تكات و اضافات فى المكونات تخليها زى بتاعة المحلات.

 

المكونات :

- لتر لبن
- سكر حسب المذاق
- كيس كريم شانتيه بودرة
- 2 ملعق كبيرة كريمة الحلو إلى بتبقى فى علب فى السوبر ماركت
- 4 ملاعق مليانة نشا
- كيس فانيليا
- للتزين قرفة و مكسرات

 

الطريقة:

* فى حلة نحط لتر لبن و عليه سكر حسب الطعم اللى يعجبك، و عليه باكو كريم شانتيه بودرة و ملعقتين كريمة بتاعة الحلو دى عشان تدى دسامة القشطة، و كيس فانيليا عليه

*  ندوب كله سوا و نحطه على نار هادية.

 * فى كوباية نحط حبة لبن بارد و عليهم 4 معالق صغيرة مليانة نشا، و ندوبهم و نضيفهم على اللبن اللى على النار.

* نقعد نقلب كويس لحد ما تتقل مع التقليب عشان مش يكلكع. فى أنواع نشا تانية ممكن تحتاج معالق اكتر لحد ما تتقل.

* زودى حبة بحبة و قلبى كويس لحد ما تتقل.

* اطفى النار و املى الأطباق بتاعتك و سبيها تبرد و بعدين دخليها التلاجة.

* كدة خلصت المهلبية و انا زينتها بالقرفة و المكسرات و طعمها روعة.

 

و الف هنا و شفا. مع مطبخ مروة مجتمعين كلنا

مروة فرجانى