#مطبخ_مروة يقدم: بودينج موز ببواقى الفينو

كتب بواسطة: مروة فرجانى في . القسم مطبخ مروة

 

 

 

طبعا كلنا، وخاصة فى وقت المدارس، بيكون عندنا بواقى فينو قديمة دايما. عادة بنحمصها و نعملها بقسماط للبانيه او نقطعها شرائح و نحط توم و جبن و يكون خبز بالتوم.

طب ليه مش بنعمل منه حاجة حلوة و تكون مغذية و بيتى و استفدنا منه بشكل جديد.

يالا نعمل بودينج موز من بواقى الفينو. لا سحر و لا شعوذة ...

 

المكونات:

- بواقى فينو مقطع فى صينية صغيرة

-١ و نص كوب لبن دافى محلى بالسكر

- ٢ كيس فانيليا

- ١ بيضة و عليها ربع معلقة قرفة مطحونة

- ٢ موزة

- اى نوع مكسرات. انا حطيت جوزهند و زبيب و عين جمل .ممكن سودانى برضو بيليق اوى مع الموز

 

الطريقة :

* نرص بواقى الفينو بعد تقطيعه فى صينية و عليه المكسرات الى نحبها

* نقطع الموز شرائح و نرصه على الفينو.

* اللبن الدافى تضيف عليه السكر و البيضة و ربع معلقة القرفة.نضربه سوا كويس و نحطه على الصينية و نقلب كويس و نسيبه ١٠ دقائق لحد ما الفينو يشرب اللبن.

* ندخل الصينية الفرن لحد ما الوش يلون. هو مش محتاج سوا جامد. مجرد بس البيضة تستوى و الصينية تاخد لون.

* بس كدة تبرد شوية و تتاكل دافية و فى يومها عشان كدة قولت صينية صغيرة تخلص على طول. لو باتت الفينو حيبوش و يكون معجن.

حلو سريع و اقتصادى و من بواقى فينو و طعمه حكاية و ريحته ملت الشقة من القرفة مع الموز ، عملة ريحة رهيبة .

 

ويجعله عامر وبالف هنا وشفا .. وف مطبخ مروة متجمعين كلنا

مروة فرجانى