#مطبخ_مروة يقدم: مربى البطيخ

كتب بواسطة: مروة فرجانى في . القسم مطبخ مروة

 

  

الصيف يعنى بطيخ ... وييجى بعده كل انواع الفاكهة.

احنا متعودين ناكل البطيخ الاحمر و نحمص اللب بتاعه و الجزء الابيض و الاخضر بيترموا.

اكتشفنا مؤخرا ان فيه سبحان الله فوائد رهيبة فى الأجزاء الى بنرميها دى. حاجات تجميل للبشرة، يعنى يضرب الجزء الابيض دا فى الكبة و يتعمل ماسك يقاوم التجاعيد و يرطب البشرة، و الاخضر طلع بيتحمص و يطحن و برضو يستخدم ماسكات.

الجديد بقى ان الابيض الى تحت الاحمر دا بيتعمل مربى.

ايوة والله مربى ... و طعمها حلو و اهو بدل ما نرميها نستفيد بيها طالما حلوة و سهلة.

 

الطريقة و المكونات :
- الجزء الابيض دا من البطيخ نقشره من القشرة الخضرة و نقطعها مكعبات صغيرة اوى عشان تستوى اسرع.

_ قصاد كل كوباية مليانة مكعبات البطيخ نحط نص الكوباية دى سكر. يعنى عملتى ٦ كوبيات مكعبات البطيخ تضيفى عليهم نصهم سكر يعنى ٣ كوبيات سكر. و المية بقى قصاد كل كوباية سكر نصها مية.

يعنى لو ٦ كوب بطيخ عليهم ٣ كوب سكر (نص البطيخ) و عليهم كوب و نص مية.( نص السكر)

- نحطهم فى الحلة على النار و نقلب و اول ما يغلوا نضيف عصير لمونة كاملة و كيس فانليا و نسيبه يستوى على النار و يشرب المية بس يكون لسة فى حبة سائل عشان متنشفشى

- المربى شربت المية و السكر تقل كدة.حتلاقى مكعبات البطيخ طريت خالص .نسيبها تبرد و نحطها فى برطمان ناشف و الف هنا.

ومع تحيات حملة "مترميش حاجة تقدر تستفيد بيها"

 ويجعله عامر وبالف هنا وشفا .. وف مطبخ مروة متجمعين كلنا

مروة فرجانى