#مطبخ_مروة يقدم: سوبيا الرحبانى بس بيتى

كتب بواسطة: مروة فرجانى في . القسم مطبخ مروة

 

 

رمضان كريم و رمضان يعنى كل حاجة حلوة ... قطايف و كنافة بكل أشكالها و سوبيا بجوز الهند تتاكل و تتشرب .

طبعا ملك السوبيا فى مصر الرحبانى .بس مش كلنا بنعرف نروح فقولت طب ما تعملها فى البيت ☺ و قد كانت.

المكونات ل 4 اطباق :

- 1 و نص كوب لبن

- نص كوب سكر

- نص كوب جوز هند

- كوب إلا ربع رز مطحون ... و ده نجيبه من السوبر ماركت مع ركن الدقيق، فيه دقيق رز و دا نستخدمه على طول، وسهل و مش غالى    وينفع مع كوبيبة الرز إلى عملناها قبل كدة يعنى له استخدامات كتير.

-2 كيس فانيليا

الطريقة التانية ... نسلق كوب و نص رز على النار مع 3 كوب مية لحد ما يبوش خالص و يشرب ميته و يبقى زى الكريمة.

 

الطريقة :

* نجيب حلة على النار و نضيف كل المكونات مع بعض مع التقليب المستمر زى الباشميل كدة عشان مش تكلكع.

* اول ما يبدأ يتقل نقفل عليه عشان مش المفروض يكون متماسك زى المهلبية و مش سائل. يبقى وسط و ده السوبيا المسكر.

* تصبها فى اطباق غويطة و نحطها فى الثلاجة. عند الأكل، تزين بقرفة و عين جمل أو عين جمل بس للى مش بيحب القرفة.

هى بتبقى مسكرة و جميلة و فى منها المزز الحنط، و دى نفس الطريقة بس نضيف رشة بسيطة ملح ليمون بس انا حبيتها مسكرة اكتر.

ويجعله عامر وبالف هنا وشفا .. وف مطبخ مروة متجمعين كلنا

مروة فرجانى