#مطبخ_مروة يقدم: القطايف البيتى

كتب بواسطة: مروة فرجانى في . القسم مطبخ مروة

 

 

طبعا رمضان يعنى قطايف و كنافة. كل سنة و انتوا طيبين

والقطايف البيتي لو جربتيها مش حتجيبى من برة تانى .. سهلة و ريحتها جميلة و طبعا مضمونة.

ولا تشيلى و تخزنى من السنة للسنة اعمليها طازة و حتعجبك.

 

المكونات:

-2 كوب دقيق

-كوبايه و نص مياه دافيه (نفس الكوباية إلى استخدمناها فى الدقيق )

- نص معلقه كبيرة خميره فورية.

- نص معلقه كبيرة بيكنج بودر

- ربع كوبايه لبن

- معلقه سكر

- رشه ملح

 

الطريقه:
* ضيفى كل المكونات في الخلاط و اضربيهم كويس.

لما تخلصي ، سبيها ربع ساعة تخمر و بعدين سخني طاسه تيفال كويس و ادهنيها نقطتين زيت و امسحى بمنديل اى زيادة.

 

* هاتى كبشة او معلقة كبيرة غويطة وامليها و انزلى بيها فى الطاسة السخنة ... دقيقتين و اقلبى على الناحية التانية و هكذا لما نخلصى الكمية.


* متحوطيش كتير عشان يكون سمكها حلو و تستوى من جوة كويس.

 

أول ما تبرد، احشيها بقى مكسرات أو كريمة أو شيكولاتة أو مهلبية بالقشطة مكان الكريمة و سويها فى الزيت و بعدين نزليها فى الشربات. 

ويجعله عامر وبالف هنا وشفا .. وف مطبخ مروة متجمعين كلنا

مروة فرجانى