#مطبخ_مروة يقدم: بسكون بكريمة الباتسرى

كتب بواسطة: مروة فرجانى في . القسم مطبخ مروة

 


بعد الغداء ووقفة المطبخ ببقى عايزة اعمل حاجة حلوة و سريعة طالما المكونات عندى.

جربت دى و طلعت حلوة اوى و ماخدتش 10 دقائق فى تنفيذها، و حطيتها فى كوبايات عشان مقطعشى و اغسل اطباق كل مرة نأكل منها.

 

المكونات :

- أى نوع بسكوت فانيليا متاح.

- كيوى أو فراولة متقطعة مكعبات.

- باتسرى كريم و دى لما نعملها فى البيت أو نجيب من محلات مستلزمات الحلواني.

لو حنعملها فى البيت محتاجين : 1 فنجان صغير سكر و 3 فنجان لبن بودرة و 2 علبة زبادى و 2 مكعب جبنة كيرى و نضرب كله بمضرب البيض.

 

الطريقة ؛

- حنعمل طبقات فوق بعض لحد ما الكوب يتملى.

- نكسر البسكوت خشن قطع كبيرة و نحطه فى الكوب و عليه طبقة كريمة كثيفة و نضغط حبة بالملعقة.

- نحط قطع الكيوي أو الفراولة و نكرر تانى الطبقات لحد آخر حاجة تكون الفاكهة.

- نحطها فى التلاجة ساعتين و ناكلها بالهنا و الشفا.

- ممكن نزين فوق الوش بطبقة مربى فراولة لو عندنا أو كريمة شانتيه الفراولة.

وبألف هنا ومع مطبخ مروة مجتمعين كلنا

مروة الفرجانى