#مطبخ_مروة يقدم: التيراميسو

كتب بواسطة: مروة فرجانى في . القسم مطبخ مروة

 

 

طبعا لا يخفى على حد يعرفنى ان الحلويات بالنسبالى عشق و مزاج كدة و الاحلى لما تكون معمولة بيتى.

محلات مستلزمات الحلويات انتشرت جدا و دلوقتى نقدر نعمل أغلب أنواع التورتات و التارت بتاعة المحلات و بأسعار أقل من نص سعر برة و يمكن أقل كمان.

النهاردة جبت بسكوت ليدى فينجرز من محل مستلزمات الحلويات و حعمل التيراميسو ... وهى خفيفة اوى و طعمه و كله على البارد.

المكونات :
- 2 طبق ليدى فينجرز. الطبق ب 17 جنيه

- 4 كوب زبادى

- كوب لبن بودرة من المعيار بتاعنا. و لبن البودرة من محل المستلزمات برضو

- تلت كوب المعيار بتاعنا سكر

- نص كوب لبن

- طبق فيها نص كوب مية و عليه 2 معلقة نسكافيه

 

الطريقة:
- الصوص عبارة عن الزبادى و اللبن البودرة و السكر و نص كوب اللبن و نضربها بمضرب البيض سوا لحد ما يكونوا ملمس كريمى.

- هى فكرتها انها طبقات ، فنجيب اى علبة أو بيكرس مثلا غويط.

- ننزل واحدة الليدي فينجر فى الطبق اللى فيه المية و النسكافيه بسرعة و نطلعها. مانسبهاش كتير لأنها هشة جدا و حتبوش. يادوب تتبل بس.

- نرص اول طبقة و نغطيها بالصوص دا و بعدين تانى طبقة و نغطيها بالصوص و هكذا لحد ما نخلص الكمية. 

- ننزل الصوص فى الجوانب عشان كله يتغطى و نزين الوش برشة نسكافيه و بضهر المعلقة نسيحه كدة أى شكل يعجبنا.

- نحطه فى التلاجة من 4 ل 6 ساعات قبل الأكل و بألف هنا .حلو مضمون و بتكلفة نص داستة جاتوه من المحلات

وبألف هنا ومع مطبخ مروة مجتمعين كلنا

مروة الفرجانى