#مطبخ_مروة يقدم: بسكوت الشاى للماتش اللى جاى

كتب بواسطة: مروة فرجانى في . القسم مطبخ مروة

 

بمناسبة حدوث تانى حاجة تفرح فى 2017 ... و هو فوز المنتخب على المغرب بعد الفرحة الاولى بالفوز على غانا ... قولت اعمل حاجة سريعة حلوة كدة تتاكل مع الشاى أو النسكافيه قدام الماتش. و هو بالمرة بدل البسكوت اللى بقى عامل زى أقراص الفحم من كتر ما صغروا حجمه و ضاعفوا سعره.

عملت بسكوت شاى يشبه بتاع العيد بس من غير نشادر والمقدار دا عمل كمية حلوة كدة بس خلى الأشكال صغيرة عشان هو بينفش. وشكله بيبقى أحلى و هو صغير.

وياريت تدخلى ولادك يعملوا معاكى الاشكال، حينبسطوا اوى.

 

 المكونات :

 - واحد كوب سكر

- واحد كوب سمنة

- 2 بيضة

- 2 ملعقة كبيرة ممسوحة بيكينج بودر

- رشة فانيليا

- نص كيلو دقيق ابيض

 

 الطريقة : 

- نحط السكر مع السمن ونضربهم كويس بمضرب البيض

- بعدين نضيف البيض والفانيليا ونضرب تانى

 - نبدا نعجن بأيدينا و نحط البيكنج باودر و الدقيق حبة وبعدين نعجن وبعدين نزود حبة و نعجن تانى، لحد ما العجينة تبقى حلوة معانا وماتلزقش فى ايدينا و تلم من الطبق. كدة تبقى جاهزة على التشكيل

 - نشكلها بقى زى ما احنا عايزين ونرصها فى صينية مدهونة زيت بسيط جدا و نحطها فى الفرن على درجة حرارة ١٨٠ لمدة ١٠ دقائق عشان تستوى حلو و تاخد لون دهبى جميل من فوق و من تحت.

 أول ما تهدى، نرصها فى علبة محكمة الإغلاق عشان نحافظ علي البسكوت ويفضل مقرمش و ناعم.

 ألف هنا و مع مطبخ مروة متجمعين كلنا

 مروة فرجانى