#مطبخ_مروة يقدم: Fried Banana

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

طبعا مع الأخبار الحلوة اللى سمعناها بخصوص الحكم فى قضية تيران وصنافير كان لازم نحتفل بحاجة حلوة ... بس على اد ايدنا كدة عشان ربط الحزام، بس طبعا بيتى و من مكونات بسيطة موجودة فى البيت.

طبعا الموز فى الشتاء سكر ... والطريقة و المكونات سهلة و مش حتاخد نص ساعة.

الطريقة والمكونات:

- هاتى الموز قطعيه بالنص و بالطول.

- حطى فى طبق ربع كوب لبن و رشة فانيليا. و فى طبق تانى ملعقتين نشا و ملعقتين سكر خشن أو بودرة و 4 ملاعق بقسماط و رشة قرفة.

- ده يكفى 4 موزات .. وممكن تستبدل البقسماط ببسكوت مطحون أو دقيق أو كورن فليكس، اللى موجود فى البيت ينفع.

- حطى الموز الأول فى اللبن و الفانيليا

- بعدين حطى الموز اللى باللبن والفانيليا  فى طبق خليط البقسماط والنشا والسكر والقرفة.

- على طول حطى الموز فى طاسة سخنة على النار فيها ملعقتين زيت و حتة زبدة حلوة كدة و قلبى لحد ما تاخد لون دهبى فظيع.

- بالراحة نطلعها بشيالة المكرونة المبططة او اى معلقة عشان مش تنقطع ... و زينى بقى و كلى و ادعيلى.

- انا حطيت عسل ابيض على 2 منهم و صوص فانيليا على الباقى. و بتكون تحفة مع صوص كراميل (كنا عملناه سوا هنا) وممكن فى الصيف تبقى مع الايس كريم او سادة كمان مع رشة سكر بودرة و قرفة بتكون رهييييبة.

- ممكن كمان نحط عليه ايس كريم و مكسرات و كريم شانتيه ... و فى المطاعم بيحطوه فى الكريب الحلو و عليه شيكولاته.

يعنى حاجة بسيطة و نطلع منها أصناف كتير حلوة و تغيير و التكلفة بسيطة متجيش خمس تمن الجاتوة بأسعار اليومين دول.

ألف هنا و مع مطبخ مروة متجمعين كلنا

 مروة الفرجانى