#مطبخ_مروة يقدم: رز قوس قزح (بالفيديو)

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

مين مش بياكل رز ؟ مافيش تقريبا ...

بس ممكن نكون زهقنا من أنواعه و طرقه التقليدية ... احنا عندنا رز ابيض واصفر بالكاري وأحمر بالصلصة و بنى بالقرفة ... كلها لون واحد ، حنعمل رز ألوان بقى زى بتاع الاوتيلات كدة. اسمه Rainbow rice  ...  ... و شكله لذيذ جدا و بيكون شيك اوى على السفرة و ابن ناس كدة.

احنا بقى حنعمله و نخلى سفرتنا مميزة و جديدة مع مطبخ مروة.

المكونات :
- 2 كوب رز مصرى أو يسمتى
- الوان طعام آمنة: لو بودرة ندوب ربع معلقة شاى من البودرة مع معلقة مية دافية من كل لون ... لو ألوان سائلة حنحط معلقة صغيرة من اللون على طول ودول بنجبهم من أى محل حلوانى ... ولو عايزة ألوان طبيعية يبقى ربع معلقة كركم على معلقة مية للون الأصفر و زعفران للون الأحمر.

الطريقة :
الخطوات مصورة فى الفيديو :


- حنغسل الرز بالطريقة العادية ... و لو كوبايتين، حنحط كويتيين مية معاهم قالب مرقة دجاج البيتى اللى عملناها سوا قبل كده، او شوربة فى حلة و عليهم ملح و فلفل و ملعقة وسط سمن و على نار و تغلى.

- ننزل الرز لما المية تغلى، و نقلب و تسيبه يشرب المية و ننقله على نار هادئة و صاجة ... و كدة احنا نفس طريقة الرز العادية.

- قبل ما يستوى تماما نكون حضرنا الألوان زى ما شرحت فوق ، و نعمل فتحات فى الرز بعدد الألوان اللى عندنا، زى حفرة كدة بس متوصلش لقاع الحلة ويكون لسة فى اخر الحفرة رز.

- نحط الألوان فى الحفر من غير تقليب و نغطى الحلة، و نسب الرز لحد ما يكمل سوا تماما.

- بعد كدة نقفل عليه و نستنى دقائق و هو مقفول و جواه البخار.

- نفتح و نقلب بشويش من تحت لفوق و حتحصل المعجزة:

الألوان حتنتشر و يكون عندك كل رزاية لون، و على اد ماتحوطى ألوان كتير على اد ما الرز حيكون ألوانه و شكله تحفة زى الرينبو كدة.

يجعله عامر وبالف هنا وشفا .. وفى مطبخ مروة نتجمع كلنا

مروة الفرجانى