#مطبخ_مروة يقدم: التورلى للى بيكرهوا الخضار (بالفيديو)

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

دلوقتى انا لازم اعترف بحاجة ... انا مش بحب الخضار

ايوة والله ... و دوخت ماما فى الغداء كل يوم عشان اكلى نواشف و مافيش خضار، و طبعا محدش يقدر ينكر فوائد الخضار بس نعمل ايه بقى.

المهم اكتشفت بقى لما بقيت أم أن كل الأكل مهم بس الخضار أهم ... و طبعا الاكتشاف دا جه بعد ما السنان بقت ضعيفة و الشعر بيقع و الركب بتزيأ :).

علشان كده قررت أكل خضار بس اغير فيه شوية، و اعمل الأنواع إلى ممكن أكلها سوا اكلة واحدة و خلاص و يبقى فى ألوان كتير تفتح النفس.

و دا بقى التورلى و معاه مكعبات اللحمة بس من غير الصلصة التقليدية اللى متعودين نستخدمها فى الخضار.

المكونات :
- أى نوع خضار بنحبه ... او ممكن نحبه .... يعنى انا بحب احط بطاطس و جزر و بسلة و فلفل ألوان و ذرة و مشروم و بصل. وممكن نحط كوسة و بروكلى.

- مكعبات صغيرة لحمة من وش الفخدة عشان تكون خفيفة و تستوى بسرعة.

- توابلك و بهاراتك بقى و انا بكتر منها عشان تخلى طعم و ريحة الخضار لذيذة، خاصة الحبهان و ورق اللورى المطحون و البصل.

 

الطريقة : 

* الخضار يغسل و يتقطع حتت كبيرة عشان متفقدش القيمة الغذائية.

* صينية فيها معلقة زيت خفيفة و تشوح كل الخضار سوا.

* اللحمة الصغيرة دى حتستوى بسرعة مع بصل كتير و بهارات مية. عايزاها تستوى بس تفضل محتفظة بشكلها عشان لسة حتكمل سوا فى الفرن الخضار.

* اول ما الخضار يبدأ سوا مع التشويح، ننزل اللحمة بالشوربة إلى طلعها منها زى ما واضح فى الفيديو و نقلب بسيط عشان الخضار ياخد طعم اللحمة بكل البهاريز.

و ده الفيديو :

 

* نسيبها على النار 5 دقائق و نحطها فى الفرن على نار متوسطة لحد ما وشها يحمر بسيط.

* كدة الأكلة جاهزة و لذيذة و مفيدة جدا و جنبها طبق رز ابيض و ممكن من غير حاجة جنبها كمان.

يجعله عامر وبالف هنا وشفا .. وفى مطبخ مروة متجمع كلنا

 مروة الفرجانى