#مطبخ_مروة يقدم: أم على شغل فنادق

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

مين فينا مش بيستنى اى فرح يجيلو عشان يأكل أم على بس من البوفية

انا واحدة من دول ... بحب أم على جدا بتاعة الفنادق لأنها فعلا بتكون تحفة ... انا جربت اعملها و طلعت حلوة و سهلة و ماكلفتنيش غير مبلغ بسيط جدا.

مبدئيا كدة الميلفاى تيجيبوه من اى محل بتاع مستلزمات الحلويات. والطبق عندهم مستطيل كبير و فيه 3 رقات ب 15 جنيه . والرقة تكفى صينية صغيرة ل 4 أفراد و تشيلى الباقى فى الفريزر عادى.

المكونات :
- الميلفاى
- لبن دافى مسكر
- 2 كيس كريم شانتيه أو علبة كريمة الحلو
- جوز هند و مكسرات اى نوع عندك

الطريقة :
- الفيديو حيوضح الخطوات و برضو نراجعها سوا.


- نجيب صينية و نكسر الملفاى خشن و حتت كبيرة.

- نجيب اللبن الدافى المتسكر حسب رغبتنا و نضيفه لصينية الملفاى و نقلب مرة واحدة و نسيبها دقائق تشرب اللبن.

- نضيف جوز هند و مكسرات و نقلب مرة عشان يتوزعوا. لو عايزاها دسمة حتحوطى كريمة الحلو اللى فى العلب على الوش لكن انا بحبها خفيفة فبستخدم أكياس الكريم شانتيه.

- بضرب كيس الكريم شانتيه مع كوب لبن بمضرب البيض و معيار الكوب إلى بنستخدمه على طول من أول طبخة سوا.

- نوزع الكريم شانتيه على وش الصينية و نحوطها فى الفرن على درجة حرارة 120 فى نص الفرن عشان تستوى و تتحمر فوق و تحت.

- خدت لون دهبى جميل ، نطلعها تبرد و ناكلها هنا و شفا.

طيب دلوقتى لو طلعت معاكى ناشفة عشان شربت اللبن كله حسب نوع الميلفاى، حتعملى ايه ؟؟

عادى خودى نص الصينية فى صينية تانية افرديها و ضيفى لبن دافى تانى و كريم شانتيه تانى فوق الوش ... كانك قسمتى الكمية صينيتين.

كل حاجة و ليها حل.

يجعله عامر وبالف هنا وشفا .. وفى مطبخ مروة متجمع كلنا

 مروة الفرجانى