#مطبخ_مروة يقدم: تعرفى البيض مافن؟

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

مين كل يوم فى الفطار أو العشاء بيفكر يعمل أكل جديد غير التقليدى اللى متعودين عليه.؟؟؟؟

طب مين فى وقت المدرسة بيكون مش عارف يحط أكل ايه للولاد. يكون مفيد و شكله حلو عشان الولاد ترضى تاكله ؟؟؟؟

أنا واحدة من دول ... و بصراحة رغم ان البيض مفيد جدا بس ابنى بيرفض ياكله مسلوق أو اومليت، و ببقى عايزة اعمله فطار مغذى.

عليكى بمافن البيض بقى ..

طبعا لو عندك أشكال قوالب مختلفة من بتاعت الكب كيك .. حيكون دا احسن و احلى كمان.

المكونات :
- 3 بيض ، بتطلع 5 مافن
- ربع كوب لبن عشان القيمة الغذائية تكمل
- جبن مبشورة ( رومى - فلمنك - موتزريلا )
- فلفل رومى مقطع أو زتون أسود مخلى. إلى يريحك

ممكن كمان أى بواقى فراخ من غداء امبارح بتكون تحفة و كدة ممكن تكون طبق جانبى كمان فى الغداء.

الطريقة :
- شوفوا الفيديو على اليو تيوب عشان تكون الطريقة أوضح

- حنضرب البيض مع اللبن كويس و ملح و فلفل و نضيف الخضروات اللى موجودة ... انا ضيفت جبنة رومى و زيتون. واحسن تعملى ميكسات مختلفة كل مرة عشان التجديد و القيمة الغذائية لو أكل للولاد فى المدرسة تكون عالية و كافية ليهم.

- هاتى صينبة كب كيك و حطى نقطة زيت فى كل واحدة ... كدة الأكلة بأقل دهون ممكنة. ادهنى بيها القوالب كويس و حطى الخليط فيها و رشى بابريكا فوق الوش للزينة و ممكن من غيرها عادى.

-دخليها الفرن على حرارة 120 فى نص الفرن عشان تستوى فوق و تحت و تنفش. أول ما لونها يبقى دهبى و تكون استوت من جوة طلعيها و شيليها من القالب.

- كدة عندك أحلى و الذ فطار أو عشاء مفيد جداً و جديد جدا جدا ... و جنبه رغيف عيش أو توست او عيش سن للناس اللى عامله دايت.

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى