#مطبخ_مروة يقدم: بيتى فور بيتى واوفر فلوسى

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

كل سنة و انتم طيبين و عيد سعيد علينا.

كنا عملنا سوا بسكوت العيد فى مقالة قبل كدة، و النهاردة حنعمل البيتى فور، و دا أحلى حاجة فى العيد عشان أشكال بقى و مسلى جدا و لذيذ مع كوباية نسكافيه الصبح كدة .

المكونات:
- 2 بيض
- 1 كوب سكر بودرة
- 1 كوب زبدة سايحة
- 4 كوب دقيق
- 1/2 ملعقة صغيره فانيليا
- 2 ملعقة بيكنج بودر

 

للتزيين:
- 2 ملعقة كبيرة شوكولاتة فرمسيان أو جوز هند .
- مربى مشمش
- اى نوع مكسرات مدقوقة

 

الطريقة :
- في طبق، نضرب البيض مع الفانيليا بمضرب البيض.
-نضيف السكر البودرة بالتدريج ، و بعدها الزبدة و فى الآخر البيكنج بودر و نخلط المكونات كويس.
-نضيف الدقيق تدريجي مع العجن بالايد لحد ما العجينة تكون متماسكة وطرية.
- نسيب العجينة لمدة نصف ساعة لترتاح، ونبدا نفرد على رخامة المطبخ بالنشابة بعد ما نرش حبة دقيق عشان مش تلزق .
-تقطعها بأشكال البيتي فور اللى عندنا و ممكن نعمل أشكال من غير قطاعة زى الفيونكة أو السمكة بالسكينة أو الدايرة بغطى بلاستيك من بتوع ازايز المية أو العصير و ممكن نقصها نصين تبقى هلال .يعنى مش شرط القطاعات دى.

نرص الاشكال في صينية للفرن جواها ورق زبدة مدهون زيت بسيط عشان البيتى فور مش يلزق لحد ما يستوى و يكون دهبى.

- نسيبه يبرد و نبدأ نلزق الأشكال سوا بالمربى و نطلع حتى زيادة عشان نلزق فيها المكسرات أو الجوز الهند أو أى زينة على مزاجك.ممكن شيكولاتة سايحة برضو حتكون ظريفة اوى. بس كدة بيتى سوبر لوكس زى ما المحلات ما بتسميها و الكيلو بيدا من 100 جنيه.

يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى