#مطبخ_مروة يقدم: كفتة الرز

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

كفتة الرز من الذ الاكلات إللى بحبها جدا، لانها كفتة بطريقة مختلفة عن اللى متعودين عليها ... ممكن تكون مكوناتها و خطوات تحضيرها كتيرة بس النتيجة جميلة جدا.

ممكن تتاكل مقلية فى زيت و عليه سمن، و ممكن تعملها تسبيكة زى بتاعة الخضار بس اتقل و يصل زيادة، و ننزل كفتة الرز فيها تاخد غلويتين بس و بتبقى تحفة زى كفتة داود باشا.

المكونات :
- نص كيلو لحمة مفرومة خالية من الدهون تماما.
- 3 ملاعق صغيرة توم مفروم
- 2 بصلة وسط مفروم.
- حزمة بقدونس مغسولة و متقطعة
- دقيق الرز و دا له مصدرين:
* عمله فى البيت بأننا نجيب 2 كوب رز و نقعه فى مية 3 ساعات و بعد كدة فرمة فى الكبة أو عند الجزار لأن عنده مفرمة حجر مخصوصة للرز و دا احسن ، لأن الرز بيسخن موتور الكبة جدا و بتعملى حبة بسيطة و تسببها تبرد و هكذا.

* بيتباع فى السوبر ماركت أكياس دقيق الرز زى بقية أنواع الدقيق إلى فى أكياس ورق و حتشفوا الكيس فى الفيديو.

- ملح و فلفل و بهارات و كمون و دا حسب المذاق.

 

الطريقة :
- لو جهزنا كل المكونات اللى فوق، كدة خلصنا أصعب جزء فى الكفتة.

- حنحوط كل المكونات مع بعض و نفرمها فى المفرمة فى البيت وش واحد أو اتنين حسب درجة النعومة اللى بتحبيها. وش واحد بتكون خشنة و دى انا بحبها اكتر عشان بحس بالمكونات فى الطعم.

- نصبعها زى الكفتة بس ارفع لأن دقيق الرز اول ما بينحط فى الزيت اللى عليه ملعقة سمنة ، بينفش و بيتخن.

-نحمرها من كل الاتجاهات و نطلعها تتصفى على الكلينكس، و ندوق أحلى كفتة رز بيتى. شوفوها قبل ما تتقلى و بعدها فى الفيديو فى أخر المقال.

- ولو عايزاها بالدمعة زى داود باشا يبقى نعمل تسبيكة الخضار ... اللى هى ملعقة سمنة و بصل كتير و نحمرها، و نضيف ملعقة توم صغيرة مفرومة و نضيف مية قليلة و بهارات ...  نسيبها تتقل و نقوم منزلين الكفتة و تغلى حاجة بسيطة جدا عشان مننساش أن فيها رز و ده بينفش، و ناكلها على الرز بتكون طعمة جداا.

يجعله عامر وبالف هنا وشفا .. وفى مطبخ مروة متجمع كلنا

مروة الفرجانى