حابس كابس ... #التحيز #لا_دين_له

كتب بواسطة: فيفيان ظريف في . القسم لا دين له

 المتحيزون، اللهم احفظنا، وهى الكلمة المؤدبة "للمتعصبون" وما اكثرهم فى المجتمع المصرى، وجودهم عرض لمرض بينتشر فى البلاد اللى فيها فساد وديكتاتورية ... وده لان نشر التحيز يعتبر من ادوات سيطرة الدولة اللى من النوع ده على شعبها ... من باب فرق تسد يعنى.

210814 article2 photo2

انواع المتحيزون فى مصر هى:

1- المتحيزون للاخوان

2- السيساوية والمتحيزون للجيش

3- المتحيزون للارثوذوكسية

4- المتحيزون للسنة

5- المتحيزون للشيعة

6- المتحيزون للاهلى

7- المتحيزون للزمالك

واضيف كمان

8- المتحيزون لمبارك .. اصلى ما كنتش واخدة بالى منهم لحد امبارح لما واحد دخل شتم على صفحتى وانا عملتله بلوك.

 

صفات الواحد منهم "ويجعل كلامنا خفيف عليهم" هى:

1- تلاقيه بيتخانق مع دبان وشه وعصبى عنيف جدا فى النقاش وسهل يشتم ويخسرك عشان تحيزه، وممكن لو انت قدامه يضربك.. عشان كدة تلاقينى ببخر طول الوقت احسن يطلعلى حد منهم ويشتم...

2- غير موضوعى ولا يرى غير رأيه وتلاقيه يا حبة عين امه يعانى من ضعف البصر والبصيرة

3- مقتنع تماما انه صاحب الحق الاوحد فاى رأى تانى طبعا غلط، وعايز كل الناس تكون معتنقة لفكره فقط .. واللى مش معانا يبقى علينا.. ويا ويلك وسواد ليلك لو عارضته..

4- ماشى يخون فى خلق الله كلها .. اصل البارونيا "مرض الشك" عنده مادد لسابع جد...

5- تسمع اخبار عن اللى طلق مراته بالتلاته اصلها اخوان او قالت لا للدستور او طلعت سيساوية بنت ال ...

6- تلاقى الشماتة صفة واضحة فيه ومطلع لسانه وحاطط ايه فى وسطه طول الوقت ..

7- أسهل واحد تستخدمه لنشر الاشاعات ... تلاقيه موهوب فى الطبلة بكل انواعها اصله مطبلاتى محترف...

8- ماشى بمثالين شعبيين مهمين جدا .. حبيبك يبلعلك الزلط وعدوك يتمنالك الغلط .. وضرب الحبيب زى اكل الزبيب...

 

دى بعض الاعراض الشائعة ... لو لقيت حد منهم عندك خمس فى وشه عشان ينصرف بسلام.

 

واللى يلاقى عنده الاعراض دى ما يقلقش خالص ... فيه امل فى العلاج باذن الله بس بياخد وقت شوية ..

وادينا اهو بنعمل اللى علينا والباقى على ربنا ..

دستووووور حابس كابس يجعل كلامنا خفيف عليهم..

 

فيفيان ظريف