#أمجد_لويس يكتب: لحقت تفكر ؟

كتب بواسطة: أمجد لويس في . القسم منوعات

 

 

عينك تلمح حاجة ف ثانية ... والتفسير ماياخُدش دقيقة
حُكمك يصدر وف لحظتها ... تافِهْ مُجرم صايع بيئة

اللى تشوفه عنيك مش لازم ... حسب الظاهر يبقى حقيقة
دايما خلف الظاهر مخفى ... يِمكِن حاجة عاديّة بريئة

أُقعد بس شوية وفَكَّر... ياما شفت حاجات وحَكَمتْ
حُكم نهائى من غير رَجْعَة ... بسّ إتغَيَّر لمّا سألتْ
وَيَّا حبايبك عين الصحّ ... لو مش عاجبك حاجة وقلت
لكن لو مع حد غريب ... أُعذر واسكت خير مافعلت

مانت أكيد التانى بتعمل ... حاجة ف عُرْفَك تبقى عادية
غيرك لمّا يشوفها يقول ... كدا ميصحِّش لأ مش هىّ
وقبل مايسمع منّك يجرى ... يعمل منها "تويتة" ف ثانية
لو متحبِّش دا يحصلَّك ... فكّر قبل الحُكم شوية

أمجد لويس