#أبلة_تفيدة: اصلكوا مدفعتوش

كتب بواسطة: أبلة تفيدة في . القسم منوعات

 

يا مرحب يا مرحب رجعتلكوا تانى مع حكايات ابلة تفيدة. و مع المدرسة صاحبة الصدارة في الاساليب الغير تربوية في معاقبة اولياء الامور عن طريق اولادهم.

يعملوا كده وهم غير منتبهين لنفسية الاولاد و لا مستقبلهم !!

و ده كله ليه ؟؟؟ علشان اولياء الأمور دفعوا القسط الاول من المصاريف بإيصالات غير مختومة، تحت حساب المصاريف اللي زادت ٤٧ % فجأة بدون موافقة الجهة الرقيبة، وبالتالى عاملين شكاوي و مستنين الرد فيها، فطبيعي مدفعوش القسط التاني ، لانه غير مصرح بيه.

مدرستنا المشرقة دي تابعة للقاهرة الجديدة عامة، و موجودة في التجمع خاصة.

هي معهد كان هدفه الغد المشرق لكن قلبوه باسلوبهم دي لغد مظلم.

منعوا الولاد المنبوذين يا عيني من دخول الفصل و سحبوا الكتب و احتجزوهم في غرفة الكنترول !!! (راجعوا المقال السابق) فعلا لها الصدارة في كسر نفسية اطفال ملهمش اي ذنب غير ان اولياء امورهم رفضوا المصاريف الغير مصرح بيها.

حتي لما دخلوهم الفصل، بعد كنية الشكاوي و المحاضر، قام المدرس موزع علي كل الفصل ملازم مراجعة ... و بعدين راح لولد ولد من المنبوذين دول و خد الملزمة منه تاني !!! و يقوله ( انت لا ، اصلك مدفعتش القسط ) !!!

لكم الصدارة يا معهدنا في تصرفات غير تربوية كل يوم بتزيد اكتر و اكتر، و ده لان الهيئة الرقايية مابتخدش اي اجراء ضدهم ابداً و السبب غير معروف !!!!

و تصميما على اذية الاولاد و قهرهم ، وزعوا ورق علي الفصول كالاتي :
"كتب و ملازم الترم التاني حتتطبع بعدد الولاد اللي اهلهم ارتضوا و دفعوا المصاريف فقط وحتتسلم بايصالات السداد :

اترك لكم التعليق

دمتم بخير .. استنونى لسه حنحكى كتير.

ابلة تفيدة