استغاثة للادارة التعليمية فى أكتوبر

كتب بواسطة: أبلة تفيدة في . القسم منوعات

 

 

اهلا بيكم في بقية حلقات مسلسل اوهام المدارس ..

حال المدارس عندنا ماشي بمبدا "يا فرعون مين فرعنك، ملقتش حد يلمني" و دا بسبب غياب الرقابة من الوزارة وتناول الشاي بالياسمين مع الكيك كفطار صحي طبعا مع الادارة التعليمية، اللي لو بعتت لجنة تشوف الوضع في المدرسة  تلاقي المدرسة عارفة من قبلها باسبوع مثلا.

الورق ساعتها ييتظبط و قوائم اسماء الطلبة بالعدد الصح تتحضر، و الاعداد الزيادة طبعا بيفتكروا فجأة ان القراءة للجميع فبينزلوهم المكتبة ... او العقل السليم في الجسم السليم و بينزلوهم الملعب يلعبوا رياضة ... لحد ما اللجنة تمشي. و كأنك يا ابو زيد ما غزيت.

فين ايام الزيارات المفاجأة اللي كانت بتعرف تمسك المخالفات و تعدلها ، فين ايام الضمير و الرقابة و الفطار فول و نحبس بشاي بالنعناع. الشاي بالياسمين كتر يا اخوانا.

نداء لمسؤولي الادارة التعليمية فرع الجيزة و فرع ٦ اكتوبر ، مش ناويين تعملوا زيارة مفاجأة لمدارس اكتوبر عشان تشوفوا اعداد طلبة الفصول اللي بتزيد ؟؟ و لا المصاريف اللي زادت و اتلمت من اولياء الامور و انتوا لسة موافقتوش عليها.

طب المصاريف المخالفة عن المبلغ اللي نازل في موقع الوزارة الالكتروني دي مين يراقبها. لما المفروض ندفع ١٤ الف و مطالبين ب ١٦ الف لمراحل النقل و ١٨ الف للطالب الجديد ، مين مسؤول طيب نكلمه ؟؟

طب مش عايزين تشوفوا منهج اللغة الانجليزية في مدرستنا الذكية صاحبة الرؤية الفذة اللي ملهوش كتاب ؟؟

اه والله العظيم ، مافيش كتاب.

طب ايه طه ... فكروا كدة ... يمكن تكتشفوا ان دا من صميم وظيفتكوا و الله يباركلكوا تبقي مفاجأة، مش المدرسة تاخد بيها خبر و تظبط اوراقها.

عنصر المفاجأة دا اللي خلانا عبرنا و الله.

و استنوني في حكايات اكتر عن مدارسنا العظيمة ،، ابلة تفيدة

 دمتم بخير .. استنونى لسه حنحكى كتير.

ابلة تفيدة