#أبلة_تفيدة: حكاية مناهج المدرسة

كتب بواسطة: أبلة تفيدة في . القسم منوعات

 

 

اهلا بيكم في بقية حلقات مسلسل اوهام المدارس ..

احنا مكملين مع مدرسة ذكية جدا ، راحت غيرت منهج اللغة الانجليزية و زودوا عدد الولاد في الفصل و زودوا المصاريف !!

كل ده مع بعضه فى حركة واحدة.

و عكس كل الوعود الفارغة الي اتقالت .. اتقال ان السبب الاساسي لزيادة المصاريف هو سعر الدولار اللي زاد، و بيشتروا كتب الانجليزي بالدولار، حوالي الف جنيه.

روحنا احنا زي اي ولي امر لسة عنده ثقة بالمدرسة دفعنا الزيادة ... راحوا طالبوا بجزء من المصاريف شهر ابريل !!!!

ليه يا جماعة ؟؟؟ دا عكس كلام الوزارة خالص ... و لسة بدري على القسط !! المفروض ماندفعشي قبل سبتمبر.

قالوا معلش عشان الكتب نلحق نجيبها ( اصلهم يا عيني لسة ملموش فلوس كفاية مننا) ..

المهم دفعنا .

الجديد ان مافيش كتب ... اه والله ... خدوا فلوس كتب و هو مافيش كتاب حيتسلم للولاد.

عملوا كتاب بنفسهم ، بيسموه بوكليت .... بلدي اوي دا يا حسين

وطبعا روحنا نسأل:

* فين الكتاب ؟ .... مافيش.

* فين فلوس الكتب اللي زودتوا بها المصاريف ؟ ... مافيش

* طب عايزين نقابل صاحب المدرسة لان المدير ، والمديرة و الوكيلة الكلام معاهم تضييع وقت ... مافيش.

يا نهار ازرق في كحلي .

طب نعمل ايه ؟؟ ... اخبط راسك في الحيط

و بعد محاولات عرفنا نقابل صاحب المدرسة.

اتكلمنا ووعدنا ان فيه حاجات حتتصلح و اهمها الكتب ... و المفروض الكتب جاية في الطريق.

الواضح انها جاية راكبة جمل او ماشية لانه طلع كلام في الهوا و ماستلمناش حاجة.

قربنا علي شهرين دراسة من اصل ترم ٣ شهور و عشر ايام و ماستلمناش كتب.

وعلي راي المثل ، خيبة الامل راكبة جمل .

فين وعودك فين !!

 

كفاية كدة انهاردة ، و نكمل حكايتنا مع ابلة تفيدة مرة تانية

دمتم بخير .. استنونى لسه حنحكى كتير.

ابلة تفيدة