#أبلة_تفيدة: حكاية فصول المدرسة

كتب بواسطة: أبلة تفيدة في . القسم منوعات

 

 

المدارس والدراسة دول هَم كل ام و أب ... و دايما بندعي اننا نختار المدرسة صح علشان ده استثمار في اولادنا.

وبالتأكيد رؤيتنا المستقبلية لتعليم اولادنا لازم تكون مدروسة و تتسم بالذكاء ... وعلشان كده حنتكلم عن مجموعة مدارس متواجدة في اكتوبر و عن كل غرائب و طرائف المدارس دي.

حصل اني روحت معرض المدارس من كام سنة، و قولت اشوف المدارس و اختار الأفضل و الاذكي و يكون اللى بيديروها اصحاب الرؤية التعليمية السليمة.

طبعا لقيت كلام معسول و وعود عن مستقبل باهر ... و دا كله طبعا طلع اوهام.

المهم عجبتتي مدرسة لسه جديدة ، ارض فاضية و قولنا انا وجوزى نجربها، اهو الدفعة الاولي من اولادنا حيكون ليهم وضع مختلف أكيد، لأن هما الي بداوا المدرسة و سمعة المدرسة حتتربي علي أيدينا.

اتقال لنا ان عدد الولاد مش حيزيد عن ٢٥ ... و قولت هايل

وقيه منطقة العاب اطفال مجهزة بمستوي عالي ... و قولت ممتاز

ونسبة زيادة المصاريف حسب اللي حتقره الوزارة .. و قولت مافيش احسن من كدة.

و هوب ..

كل دا طلع جر رجل الزبون الغلبان اللي هو احنا ..

لقينا كل شوية حاجة تتغير، ولما تسأل تحس في رد القائمين علي الادارة انهم بيقولوا: لو مش عاجبكوا امشوا.

انا بقي حقولكوا الحكاية كاملة في مقالات كتير جاية عن المدرسة ديه، و بعدها حنشوف مدرسة تانية و عجائب جديدة مختلفة

 

النهاردة حنتكلم مثلا عن عدد الولاد اللي اتقال انه مش حيزيد عن ٢٥ ..

اول سنة للمدرسة كانوا فعلا ٢٥ ... و بعدين تاني سنة ٢٦ ... اولياء الامور قابلوا صاحب المدرسة، اللي بالمناسبة مبيرضاش يقابل حد ابدا الا بعد طلوع الروح، يعني لو عايزة اقابل وزير كان حيبقي اسهل.

قال لهم معلهش استحملوني السنة دي فى الولد الزيادة ... و السنة الجاية الدنيا حتتغير.

السنة اللى بعدها الدنيا فعلا اتغيرت، و المدرسة فتحت قسم دولي ، وطبعا الدولي بيدفع اكتر ... قوم ايه ... قوم ياخدوا مبني من المدرسة الناشونال للدولي، لحد ما يخلصوا مباني الدولي ، وكمان يزودوا عدد الولاد من ٢٥ ل ٣٠ !!!

لاو ايه ... سحبوا منطقة الالعاب كمان و ادوها للي بيدفع اكتر ، و سابوا لولادنا منطقة صغيرة بينزلوها بالجدول مرتين في الشهر !!!!!

اه والله العظيم .. اطفال و منطقة العابهم اتاخدت اودام عيناهم و طلعت الوعود كلام في الهوا.

يعنى الفصول قلت و عدد الولاد زاد ... يانهار اسمر

الفصل اتزحم و المدرسات مش عارفة تسيطر علي العدد ... يا نهار بني 

و والولاد مش عارفة تفهم ... و ده كله في مدرسة خاصة بمصاريف خزعبلية !!!!

الحلقة الجاية حنحكي حكاية المصاريف و الشاي بالياسمين.

دمتم بخير .. استنونى لسه حنحكى كتير.

ابلة تفيدة