#هند_يوسف تكتب: العيد كحكة

كتب بواسطة: هند يوسف في . القسم منوعات

 

معظم الناس اليومين دول بقوا يقولوا "احنا مش حاسين بالعيد" ... وبالتالى اليكم بعض النصائح علشان تحسوا بالعيد و العيد يحس بيكم وكلنا نحس ببعض.

العيد يعنى ٣ مراحل مهمين ... لو عديتوا بيهم يبقى كده خلاص انت و العيد بقيتوا قريبين من بعض و حاسين ببعض و لا التوأم الملتصق ..

المرحلة الأولى( تنضيف الشقة )

يعنى اسبوع من قبل العيد شيل ستاير و غسيل سجاد و تنضيف نجف و حيطان، و كأن الشقة كانت مهجورة من آلاف السنين و جه العيد علشان يرجلشها و يفحتنا احنا ..

 

المرحلة التانية ( الخروج من الصندوق )

يعنى تعملوا كل حاجة بتحبوها مهما كانت النتائج ..

نبتدى من يوم الوقفة:

شغلوا اغنيه ام كلثوم يا ليلة العيد آنستينا و هيصوا و شهيصوا ..

استحموا حماية العيد ... و ايه الفرق بينها و بين اى حماية تانيه انا مش عارفة يمكن شوية صابون زياده مثلا ..

البسوا بيجامة العيد ..

اسهروا للفجر .. و لازم تشربوا شوية ماية بعد الفجر حتى لو مش عطشان ..

كلموا قرايبكم و حبايبكم و عيدوا عليهم ..

انزلوا صلوا صلاة العيد مع اصحابكم و ادعوا و اضحكوا من قلبكم ..

ناموا كتير اجازة بقى ..

كلوا كحك و اشربوا شاى بلبن ..

ناموا تانى إحنا ورانا حاجة ..

كلوا رنجا و حطوا برفان بصل و عيشوا حياتكم دى اوقات مبتتعوضش ..

اشربوا سيفن و ماية كتير ..

خلاص هضمتوا يبقى كلوا كحك ..

ادخلوا سينما ..

ناموا تانى ..

نحلى بقى بشوية كحك ..

خدوا انتينال و فلاجيل و اشربوا سيفن ..

الحمدلله ارتاحتوا يالا اضربوا فسيخ

و بعد الفسيخ لازم تناموا شوية ..

قزقزوا لب ..

اتفرجوا على مسرحية المتزوجون ..

كلوا كحك ..

ناموا شوية ..

كلوا كحك تانى ..

ناموا شوية كمان ..

و متنسوش تاكلوا كحك.

 

نيجى بقى للمرحلة التالتة و الأخيرة ..

 

المرحلة الثالثة ( الندم )

مش عملت كل إللى نفسك فيه و خرجت بره الصندوق يالا بقى علشان تدخل الصندوق تانى ..

شوية دايت بقى على حبة رياضة و ان شاء الله خمس ست سنين كده و هترجع زى ما كنت و احلى كمان ..

 

كل سنه و انتم طيبين و بيجامة العيد لابسين و فى اجازة العيد مأنتخين و كحك العيد واكلين و مهيصين

#العيد_كحكة

هند يوسف