#غادة_بدر تفتح ملفات الرئاسة "السبايسى" (2)

كتب بواسطة: غادة بدر في . القسم منوعات

 

محدش كان إيجابي ومحدش رد عليا !!!

انتظرت ردود أصدقائي بفارغ الصبر على أسئلة المهندس محمد فى المقال السابق ... استنيت يوم والتاني ولكن لم تصلني اي ردود ... يعني محدش عبرني ... شكلي كده هكون رئيسة خرنج.

الأدهى من ذلك ان بعض من اصدقائي الذين أعتادوا التعليق على مقالاتي امتنعوا عن التعليق على المقال ده بالذات ... وكمان فيه اصدقاء شالوا التاج خالص !!! (كل اصدقائك خانوك يا ريتشارد)

قعدت اكل في نفسي وبعدين حسيت اني بقيت شبهه ... فعلآ أنا شبهة عندهم حق ... حد يرشح نفسه قدام السيسي حتة واحدة ..

قعدت اكلم نفسي وقلتلها/ بصراحة يظهر يا بت ياغادة أنك فعلآ بديتي تلعبي في تعداد عمرك ... ردت عليا نفسي برضه وقالتي، اعتقد كده يا بت يا ريسة ان اصحابك جالهم حالة من الخوف الأستبحسي من الإدلاء بأراء قد تخالف السياسية العليا للدولة الاستبحسية.

تالت يوم الصبح صحيت من النوم قعدت أجري وأنا حافية القدمين بشعر منكوش غجريا مولولة في ردهة منزلنا ... أكيد اصحابي اللي شالوا التاج وامتنعوا عن التعليق مش قصدهم اني شبهه لا سمح الله، وأكيد هيحطوا التاج تاني ... وهيحطوا فوق راسي كمان ... وان السبب الحقيقي لأمتناعهم عن الرد بأنه بالفعل لا توجد لديهم أجابات لأسئلة مهندسنا الفاضل محمد.

لم يكن كل هذا مهمآ ... المهم ان كل اصدقائي الذين واتتهم الشجاعة للرد والتعليق على المقال دارت تعليقاتهم على ان إصلاح هذا الوطن لن يكون الا بأعادة تربية الشعب او على اقل تقدير ... تربية النشء الجديد.

وهكذا اصبح معلوم للكل وعلى عينك يا تاجر اننا ناقصين رباية .. وان الاخلاق عندنا أنعدمت ... طيب وهل هذا الأصلاح في يد أي رئيس ؟؟؟ يعني مثلا لو ربنا سهلها معايا وبقيت رئيستكم وحاولت أربي الشعب من جديد، لولقيت واحد الصبح كسر بعربيته على واحد تاني ماشى في طريقه اخده مثلا اورنيك ذنب ... ولا لو شفت موظف بيرتشي أذنبه واخليه يرفع ايده واقله وشك في الحيط وقفاك ليا ؟!!!

و لو صادفت واحد مزوغ من شغله الصبح املص ودانه ... ولو واحد ركب أتوبيس وفضل قاعد متنح ومرضاش يقوم لواحد عجوز قد جده ... اوقف الأتوبيس وأعبطه قدام الكل ؟!!! 

بالتأكيد هذه حلول لا قيمة لها، ولكن ما في يد الرئيس بالفعل أن يسمح لدولة القانون أن تمارس العدل دون التفريق بين غني وفقير – فعندما سيكون العدل فوق الكل سنجد شعبنا الحبيب كله متربي وأخر حلاوة. قطعآ التربية والتعليم هي من أهم الحلول ... ولذلك فلننادي معآ بتوجيه جزء من ميزانية الدولة للنهوض بالتعليم ... ولكنها حلول طويلة الأمد هتحتاج مننا بالميت عشرين سنة .. طيب هو في حد في الشعب ده عنده استعداد يصبر صبر السنين – أكيد لا.

طيب معنى ذلك نسيب الوطن يخرب ونقول مفيش ردود على أسئلة المهندس محمد؟ بالطبع لا – فهناك ردود والوطن يمكن أصلاحه بخطة ممنهجة على يد أختصاصين. لديك كل الحق مهندس محمد الأنسان هو السر ... إذا صلح حاله صلح كل شئ .. وإذا فسد فسد كل شئ ... وبالرغم من أني لست بمتخصصة ولكن بفطرتي البسيطة وبعلمي الذي أعتبره قليل جدآ أمام الكثير من نوابغ مصر.

ونظرآ لأمتناع الأصدقاء عن الرد على المقال فسأضطر أنا أرد من وجهة نظري البسيطة – سأكتب الأجابات بترتيب الأسئلة وعلى اللي مش فاهم يرجع للمقال السابق لقراءة السؤال بالكامل:

1- الأخوان المسلمين هاعمل فيهم أيه ..
أحكام القضاء نافذه ولا عودة فيها، فأنا لا أنظر وأعبث في كتب الماضي – السيسي هاسيبه لربنا ولشعبه – لأنه لو كان بالفعل إنقذ مصر من الأنهيار الأقتصادي لأصبح اليوم بطلآ قوميآ، وكما تفضلت حضرتك فهو بالنسبة للبعض قاتل ولكن بالنسبة للأخرين بطل قومي أنقذهم من الأخوان.

2- حسني وعز وجمال والعادلي والبارتيته دي كلها ..
كما جاوبت في السؤال السابق أن أحترم أحكام القضاء، فالقضاء بالنسبة لي أساس الحكم ... ولكن سيضاف للحكم أنه ستتم مصادرة جميع أموالهم وعمل بها مشاريع قومية للوطن والمواطنين.

3- الإرهابين في سينا هاتفضلي تحاربيهم وتحرقي الأخضر واليابس هناك ..
الأرهابيين في سينا هحاربهم بمشارع تنمية، هاتخلي أهالينا في سينا هما اللي يخافوا على الأخضر واليابس ويستقتلوا في الحفاظ عليه.

4- الميادين هاتعملي فيها ايه؟؟
الميادين هاعمل فيها أيه يا بت يا غادة - بالتأكيد لن يتفق الشعب كله على إنتخابي، فلم يحدث في هذه الدنيا أن أتفق الكل على شخص، ومع ذلك فسأترك الميادين مفتوحة فأرادة الشعب فوق أي مصالح ولهث وراء السلطة – كما أني أؤمن بسياسة أن الممنوع مرغوب.

5- الشرطه هاتقوليلهم خليكوا زي ماكنتم ايام حسني؟ وأضربوا الناس على قفاها؟ ولا زي أيام الثورة وخدوا على قفاكم؟؟ ولا زي دلوقتي ماتضربوش الناس على قفاها اضربوهم بالشلوت كمان؟
الشرطة لحماية الشعب وليس للفتونة على الشعب، سيكون هناك قانون صارم لأي مخطئ – لماذا نرى المصري في أي دولة خارج مصر منضبط ومشرف؟ وذلك لخوفه من القانون الذي لا يفرق بين عبد وسيد .. ولذا لن تحتاج الشرطة لممارسة بلطجتها مع الشعب.

6- الجيش هاترجعيه ثكناته؟؟
الجيش هارجعه زي أيام أبويا الله يرحمه ... جيش يحمى ويدافع بس ... وعلى فكرة كنا وقتها من أعلى الفئات في مصر وكان الجندي بطل أسطوري في كل منزل – فالجندي الذي يحمي الوطن هو المصباح المنير لهذا الوطن.

7- القضاه اللي حالفين اليمين هاتحيليهم على المعاش ؟..
القضاء والقانون هما أساس أي دولة قوية منظمة، ولذا سأحارب الفساد بكل ما أوتيت من قوة، ليس في القضاء فقط ولكن في كل مؤسسات الدولة.

8- الشعب الغلبان اللي مابيشتغلش وبيحب قعدة القهوه واللت والعجن ؟؟
الشعب لو لقى شغل محترم ومشروع قومي محترم يلتف حوله ... صدقني هيسيب الميادين والقهوة ويجري على لقمة عيش بس تكسب الالافات، مش تكسب ملاليم وخير دليل على ذلك مشروع تاكسي أوبرا وكريم.

9- هاتعملي ايه في المدرسين اللي عايزين حد يدرسلهم لأنهم أصلاً ضعاف ؟؟التعليم أساس المجتمع، ولذا سنوجه جزء كبير من ميزانية الدولة لتطوير المدرس والتعليم - عن طريق مناهج جديدة مستحدثة ودورات تدريبية للمعلمين إلي أخره.

10- البلطجية والشمحطجية وأرباب السجون، الذراع الخفي
هحاول أصلاحهم ولو منفعش السجن موجود وفاتح أيده على مصرعية.

11- مصادر الدولار هاتعملي فيها ايه ؟؟؟
- السياحة هرجعها وما تقوليش متعرفيش – دول كتيرة فيها أقل من اللي عندنا بكتير وبتعمل دعاية تجنن، ده حتى الهند يا أخي عاملة دعاية سياحية تهبل تخليك عايز تنط تاخد أول تكتوك وتروح عندهم.
والأرهاب زي ما قلت أهل سينا بمشاريع التنمية هما اللي هيحاربوا الأرهاب.
بالنسبة لقناة السويس – الناس تاكل وشي أنا ليه – ما تاكل وش اللي عملها وبالرغم من ذلك سيكون هناك متخصصين لدراسة كيفية الأستفادة منها بأقصى درجة.
تحويلات العاملين بالخارج من الناحية دي متقلقش عليه خالص ... أنا خبيرة في الموضوع ده وأعرف كويس أيه اللي يخلي مصريين الخارج ينزلوا ويستثمروا كل دولار داخل البلد – إلي جانب أني أساندك الرأي في هذا الحل، وهو منع أستيراد البضائع اللي ملهاش لازمة اللي ذكرتها في أسئلتك – وذلك لمدة محددة ولتكن خمسة أعوام على الأقل.

12- النقطة دي ملقتهاش في المقال – نطينا على طول على 13 من استعجالنا.

13- اللي هايتهموكي بالكفر والزندقه وحاجه من اتنين يا تتحجبي ياتمشي
قطعآ لدي فكري وقناعاتي فلن يحركني ويغير إفكاري بعض الأشخاص لمجرد أنهم يريديون مني أن أكون نسخة طبق الأصل من زوجاتهم أو أمهاتهم - ولكني سأسعى لأخلق من وطني ماليزيا أخرى، فعلى كل مواطن أن يتقبل الأخر كما هو – وكل ذلك سيتم بالفكر التنويري عبر القنوات الرسمية للتلفزيون المصري ... يعني ناوية أعملهم غسيل مخ من جديد.

14- ها تكمليها قروض ولا ها تمتنعي خلاص كفاية شرفي وسمعتي ؟؟
أه هامتنع خالص عن القروض وهاقول شرف البنت زي عود الكبريت – ومش أستكبار ولا حاجة ولكن لأن المشاريع التنموية والأقتصادية المدروسة من خبرات أستثمارية لن تجعل مصر تحتاج لأي قروض أو شحاته.

15- الإعلام المصري الفشيخ من أمثال احمد موسى ولميس وعمرو والشلة ... الأعلام ده ليس في قنوات رسمية ولكنه أعلام القنوات الفضائيه فلا سلطة عليه، فلندعه يطبل أو يزغؤد أو يلطم على وشه حتى – فالشعب المصري شعب ذكي له ما يلمسه من تغيير على أرض الواقع فلن يسيره مجموعة فشيخ.

16- هاتكملي على الدستور الحالي ولا هاتعدليه؟
قطعآ سيتم تعديل الدستور ...ما تقلقش خالص.

17- اخبار الحريات ايه ؟؟ هاتسبيها بحري ولا هاتحكميها ؟؟ يعني الدين مثلاً.....

نعم سأسيبها بحري فلدينا تجارب كثيرة نجحت حولنا مثل ماليزيا – سيكون شعارنا مثل شعار ماليزيا تلاتة في واحد ... سأشرح لك القصة .... عندما زرت ماليزيا في السابق منذ أكثر من سبعة اعوام وجدت الشعارات تملىء الشوارع كلها مكتوب تلاتة في واحد ... فسألت سائق التاكسي ما هو معنى تلاتة في واحد اللي فلقتونا بيها في كل شوارعكم ...

رد علي بأجابة ظلت ترافقني حتى اليوم انهم كانوا قبلآ ثلاثة شعوب ... ماليزي ماليزي - ماليزي هندي - ماليزي صيني ... صحى رئيسهم يومآ فقرر أذابه هذه الشعوب في بعضها ليصبح تلاتة في واحد كيان واحد ولتحيا فقط ماليزيا ... تجوب شوارع ماليزيا في رمضان تجد المسلم صائم والمسيحي والبوذي فاطر – كل واحد حر - انها الوحدة لأحياء الوطن والمواطنة، ولن تكون هناك وحدة الا اذا كان الكل على نفس المساواه سواء كنت مسيحي بوذي ملحد أنت حر – وليكن شعارنا الدين لله والوطن للجميع وهذا ما سيتم تعديله في الدستور.

18- هاترجعي توفيق عكاشة وقناة الفراعين ولا هاتفضل مقفولة؟؟
طبعآ هارجعه فله شعبيته حتى لو كنت أختلف معه في المضمون والأسلوب – أهو كان مسلي الشعب يا أخي أنت مالك نكدي كدة ليه.

19- انتخابات مجلس الشعب، لو الناس اختارت اللي معاهم فلوس وصوتهم عالي
ما تقلقش على الشعب بعد مشاريع التميه في مصر أعتقد أن الشعب مش هيحتاج رشوة علشان ينتخب حد.

20- هاتعملي ايه في الناس لو فضلوا متمسكين بالكنبة؟؟ هتوصللهم ازاي ؟؟

- أنا مش هاكون محتاجة أوصلهم لأنهم لما يشوفوا عجلة الدولة الأقتصادية تغيير من دفتها – سيتركون كنبتهم ويهرولون للحاق بنا.

21- أيه بقى مشاريعك القومية ؟؟؟ مليون وحدة ولا اتنين مليون وحدة ؟؟

- مشاريعي كلها مشاريع تنموية ستتم دراستها على يد متخصصين – كما سنفتح صندوق الأبتكارات والمشاريع الصغيرة للشياب الموهبين – سيكون هناك صندوق أفكار عظيمة أراها في عيون شباب مصر فلسنا بخانعين متكاسلين فبيننا عباقرة ينتظرون الأنطلاق ... وخير دليل الشاب الذي خطفته دبي صاحب فكرة عمل أعلانات على تذكرة الترام بدل من زبادة أسعارها – فستكون دولتنا دولة مؤسسات بمعنى الكلمة.

22- اخبار الفساد ايه ؟؟؟
أعتقد بعد كل ده مش ممكن يكون في فساد ولا حد محتاج لرشوة المتين جنية

لم تنته أسئلة المهندس محمد بعد ... فلا زالت توجد تسعة أسئلة خاصة بالملف الخارجي وتعاملاتنا مع الدول المجاورة – سأعرضها هنا للمناقشة أيضآ

1- - تركيا والناس اللي فيها وبتشتم اي حد هايحكم غير الأخوان هاتسبيهم يشتموا فيكي شخصياً ولا هاتجبيهمم يحكموا وتطبخلهم ... انتي هتحاربيهم وتفضلي في عداء مع تركيا ولا هاتهادنيهم وتتصالحي مع تركيا ولا هي تركيا مش فارقه معاكي أصلاً.

2- القوى العظمى روسيا وأمريكا هاتخاصمي الأتنين ولا هاتلعبي مع الأتنين ولا هاتشتغلي مع واحده وتلعبي على التانية، ولا هاتبصي لمصلحتك اللي تنفعك اكتر وخلي بالك لو روحتي يمين هاتبقي عميله ولو روحتى شمال هاتبقي برده عميلة.

3- اسرائيل: هتكملي كامب ديفيد ولا هاتلغيها، هاتحاربيها ولا هاتهادنيها ولو هزرت معاكي هزار تقيل شويه هاتستحملي ولا هاتهجمي؟ ولو عرفتي انها بتمول سد النهضه هاتحاربيها ولا هاتحاربي أثيوبيا ولا هاتسيبي السد يكمل ولا هاتروحي اثيوبيا اجتماعات وشاي وقهوه؟

4- هاتفضلي مع السعوديه والأمارات وتسقط قطر ولا هاتغازلي قطر وفلوس قطر، ومافيش داعي نخلي الأخوان زعلانين وأهو نضرب حمارين بحجر واحد ... نخرج الأخوان من السجن وتكسبي قطر وتركيا وماعلش تتعبي نفسك شويه وتتحجبي وعلى فكره في حجابات موضه طحن وبراندات كمان.

5- اخبار فلسطين ايه هاتفتحي المعابر ولا تقفليها حماس وطنين ولا ارهابين هاتسبيهم يدخلوا البلد؟ ولا هاتمنعيهم؟ ولو اسرائيل ضربتهم بالطائرات هاتحاربيها ولا هاتشجبي وتديني هاتخلي السفير ولا هاتسحبيه.

6- أخبار سوريا ايه ؟ انتي مع بشار ولا المعارضة ولو مع المعارضة مع مين فيهم الإسلاميين ولا القوميين ولا القبليين ولا ولا؟

7- وليبيا اخبارها ايه؟ هاسبيها مولعة جنبك ولا هاتودي جيش؟؟ ولا ودن من طين وودن من عجين؟

8- أخبار اليمن ايه ؟؟ هاتحاربي ولا دعم لوستيجي وبس ولا مالكيش دعوه؟

9- أخبار تيران وصنافير ايه ؟؟ مصرية ولا سعودية ؟؟ ولو قولتي مصرية والسعودية بعتت جيش يحررها، هاتحاربي ولا ايه النظام؟؟؟ ولو طلعت سعودية والناس قاموا عليكي عايزين يعزلوكي هاتعملي ايه هاتغيري رأيك ولا ايه النظام؟؟


أصدقائي الأعزاء في انتظار ردودكم على باقي اسئلة المهندس محمد للملف الخارجي ... خليك المره دي أيجابي وحياة أبوك ورد عليا.

غادة بدر