#هند_يوسف تكتب: انتى الطعّم كله

كتب بواسطة: هند يوسف في . القسم منوعات

 

 


ازاى تكتئبى وتحسى دايما انك مقصرة، وانتى وجودك فى البيت هو سر كل حاجة حلوة .. 

ولو محدش محسسك بكده ف انتى عارفه ان الراجل المصرى مبيعرفش يعبر عن إللى شايفه فى الوقت المناسب.

بس انتى متخيله البيت من غيرك شكله عامل ازاى !!!!

وانت ايها الراجل المصرى الاصيل ياريت لو تحسس مراتك شوية ان البيت من غيرها زى السلطة من غير ملح، وانها لما بتروح لمامتها انك بتكون تايه وشوية شوية هتنزل صورتك فى صفحة المفقودين يمكن تتعرف عليك .

بذمتك اوصفلى متعتك وانت راجع من الشغل وشامم ريحة الاكل ومن وانت طالع على السلم ..

طب قولى عن احساسك لما تلاقى كوباية الشاى إللى بالنعناع الأخضر جايلاك كده ومن غير ما تطلب كمان.

طب احكيلى انت عن نفسك لما تكون تعبان وتلاقى مراتك ولا اجدعها دكتور بوصفاتها إللى بعدها هتفط تنط وتقوم زى الحصان .

طب اوصفلى حالتك لما تقعد فى البلكونة وييجوا شوية هوا يطيروا الغسيل وتشم ريحة الداونى إللى هتعملك احلى دماغ .

 

طب بلاش كل ده ..

احكيلى عن رشة شوية معطر بعد لمسات ترتيب جميله فى البيت و كل حاجة فى مكانها، وبعدين تفتحوا التكييف فى اللينفنج وتتفرجوا سوا على فيلم أبيض وأسود .

طب واخدلى بالك من تركيزها فى مواعيد تمارين ودروس الولاد إللى مبتخلصش، وفى الآخر مابتسمعش منك غير انها مش مركزة وامتى هتصحصح كده وتفوق .. مع انها تقريبا مبتفصلش اصلا علشان تفوق !!!!

 

طب احكيلى عن شكل البيت فى كل مناسبة ..

فى رمضان هتلاقى الفوانيس والخيامية والزينه فى كل حتة فى البيت ..
عيد صغير ملايات جديدة وبيجامات جديدة ليك وللولاد .
عيد كبير هتلاقى شوية خرفان بأحجام مختلفه مليين كنبة الصالون .
يعنى هتلاقى فى كل مناسبة جو جميل مالى البيت، وصعب تلاقيه فى اى مكان تانى ..

طب قولى موقفك بعد توليها منصب مديرة أعمالك إللى بدون مرتب، إللى دايما بتفكرك بمواعيدك ومشاويرك وأدويتك واجتماعاتك ومناسباتك وكل ما هو فى آخره ..... اتك ..

وحاجات تانية كتير ممكن نفضل نكتب فيها لغاية بكرة.

 

لو بقى انتى مش موجوده هيحسوا بأي حاجة من الحاجات دى ؟!!!!

اتأكدى انك المفروض عمرك ما تزعلى ولا تكتئبى ابدا، وتيجى على نفسك وبعد كل ده تقولى انك مقصرة !!!

اتأكدى ان وجودك مهم اوى.

اتأكدى انك مش مقصره مع ولادك وانك شايلة كتير ..

اتأكدى ان محدش هيعرف يسد مكانك علشان مكانك كبير اوى ..

اتأكدى ان قوتك بتاخديها من إللى بتعمليه كل يوم مش من كلام مستنيه تسمعيه من حد ..

اتأكدى ان الحياه من غيرك ملهاش طعم يا غالية بالأوى :)

هند يوسف