#فادى_رمزى يكتب: مشاكل السيد "ع" مع المشجعين

كتب بواسطة: فادى رمزى في . القسم منوعات

 

فى احد الجروبات التى تجمع عشاق النادى الأهلى دار هذا الحوار التالى، بعد ايام من خروج الأهلى من بطولة افريقيا للأندية الأبطال، والحوار بدأ عندما كتب أحد المشاركين فى الجروب، ولنرمز له بحرف ال "ع" التعليق التالى ..

ع: أداء الأهلى سيىء جدا ... الى متى تستمر الهزائم وهذا المستوى الهزيل. خسارة فيهم الفلوس اللى بتندفع دى كلها .. لعيبة ماعندهاش فكرة ومدرب فاشل وادارة مش عارفه تعمل حاجة.

وجاءت الردود كالتالى:

السيدة "س": الأهلى نادى كبير رغما عن أنف كل الحاقدين (5 لايك)

السيد "ر": يجب ان ندعم الأهلى ونقف وراءه ... الأهلى مؤسسة كبيرة وعريقة (4 لايك)

السيدة "ف": الأهلى فوق الجميع ... دائما يعطى دروس للجميع فى اللعب الجماعى والادارة وعشق الفانلة الحمراء .. فخورة انى اهلاوية (8 لايك)

السيد "م": تحيا الأهلى .. تحيا الأهلى .. تحيا الأهلى ... تحيا الأهلى .. تحيا الأهلى (10 لايك)

السيدة "ز": اتركوا مجلس الادارة يعمل بهدوء .. كفاية بقى حرام كده (26 لايك)

الكابتن "ب": طوال مشوارنا الطويل مع الأهلى كنا ندرك جيدا حجم المسئولية الملقاة على عاتقنا، وكنا نعمل كفريق واحد ويدعمنا مجلس الادارة وكل منا يعرف دوره ويؤديه جيدا (50 لايك)

السيدة "ل": (منشن للكابتن ب) ربنا يبارك فى كل رجال الأهلى الشرفاء الأوفياء .. دايما فى قلوبنا وفوق راسنا (48 لايك)

السيد "ز": تحية كبيرة لرجال الأهلى الذين يوصلون الليل بالنهار للحفاظ على سمعة الكرة المصرية (36 لايك)

السيدة "ط": (منشن للكابتن ب) الله يطمنك يا كابتن ... نحن كلنا ثقة فى الأهلى ورجاله وندعمه بكل قلوبنا .. تحيا الأهلى .. تحيا الأهلى .. ربنا يحميكم من الحاقدين اللى بيحاولوا تشويه هذه المؤسسة العظيمة (30 لايك)

هنا يتدخل السيد "ع" صاحب التعليق الأصلى: الأداء حاليا لا يجب السكوت عليه ... مستوى الأهلى فى النازل منذ بداية الموسم والان نخسر البطولات ... اذا لم يحدث تغيير فى سياسة ادارة الفريق ستستمر الخسائر وسيفقد الاهلى شعبيته عند الجيل الأصغر سنا. (2 لايك)

السيد "ث" : الأهلى اكبر من مجرد فريق كرة .. الأهلى معنى كبير يدركه فقط من يذوب فيه عشقا ويدرك دوره على مدى التاريخ ... للاسف ينظر البعض للامور بسطحية ويروجون للافكار الهدامة (53 لايك)

السيدة "ظ" : اكيد رجال الأهلى عارفين يتعاملوا مع كل المواقف .. ده مجلس ادارة الأهلى يا جماعة مش اى كلام. (35 لايك)

السيد "لام الف": وياريت الناس اللى بتنتقد تقولنا كام نادى اداروه قبل كده وشغلهم فين بالظبط؟ (70 لايك)

السيدة "لام الف برضه": (منشن للسيد لام الف) الله ينور عليك ... هى دى مشكلة بلدنا ان كل واحد يفتى فى اللى مالوش فيه (85 لايك ... منهم السيد لام الف طبعا)

السيد "ش": احنا بنقعد فى بيوتنا نتفرج على الماتشات قاعدين فى السرير ولا على الكنبة، واللعيبة لابسين شورتات فى عز البرد او بيلعبوا فى عز الحر واحنا فى التكييف مستريحين، وشاطرين احنا بس فى الانتقاد والهجوم على مؤسسة وطنية عريقة تستمر فى اسعادنا وامتاعنا باداءها (65 لايك)

السيدة "خ": موتوا بغيظكم .. تحيا الأهلى .. تحيا الأهلى .. تحيا الأهلى (80 لايك)

السيد "ص": وياريت بدل ما الناس تنتقد الأهلى تشوف حال باقى الأندية .. الرجاء ولا النصر ولا المصرى والاتحاد .. ربنا يحمى مجلس ادارة الاهلى اللى بيضحوا بوقتهم وجهدهم حتى ننجو من هذا المصير (90 لايك)

السيدة "ض": مش المعارضين دول اللى كانوا بيقولوا لازم يبقى فيه تداول للسلطة وكفاية مجلس حسن حمدى ... جايين تعترضوا دلوقت (165 لايك)

السيد "ع" يضطر الى التدخل بعد ان انهى اكل بوز اللحاف من الغيظ: يا جماعة الانتقاد مش عيب ولا يدل على سوء النية ... انتم راضيين عن مستوى الأهلى ؟؟ مش شايفين بنخسر قد ايه؟ ... تداول السلطة ده امر صحى وطبيعى ولكن مش معنى كده اننا نقبل اى حاجة من اى مجلس ادارة .. لازم نقول راينا (1 لايك)

السيدة "غ": (منشن للسيد ع) اتفق معك فى اننا لازم ما نسكتش على الغلط ... ومش عيب ابدا اننا نعبر عن راينا .. كلنا بنحب الأهلى ومن عشاقه .. امال احنا فى الجروب ده ليه؟ (1 لايك ... من السيد "ع" طبعا .. وجدير بالذكر ان السيدة "غ" هى كانت صاحبة اللايك الوحيدة على تعليقه السابق)

الكابتن "ب": (منشن للسيد "ع") ... لو كنت حضرتك لعبت فى الأهلى كنت هتفهم طبيعة العلاقة بين الاهلى ومؤسستة وجمهوره وعشاقه ... وعندها ستجد ان كلماتك ليس لها اى صدى .. ارجو ان تترك الأمر لاصحاب الخبرة والدراية واطمئنك ان الحاضر والمستقبل للاهلى كما كان الماضى ... فالاهلى فوق الجميع هذا ما تعلمناه ونبذل حياتنا فى سبيله (178 لايك)

السيد "ع" فى محاولة أخيرة لاثبات اهلاويته: مش شرط اكون لعبت فى الاهلى علشان يبقى لى الحق فى ابداء الراى او انتقاده .... كلماتى تنتقد وضع قائم بالفعل، لو حضرتك مش شايفها دى مش مشكلتى (صفر لايك)

السيدة "ص": (منشن للكابتن "ب") ... انتم دائما ما تسعدونا وتضع فيكم كل ثقتنا ... لا تهتموا بالمغرضين واصحاب الاجندات الخاصة ... تحيا الأهلى ... الأهلى فوق الجميع .. الأهلى فوق الجميع .. احب الأهلى ... الأهلى عمهم حابس دمهم (215 لايك)

الكابتن "ب": يا بخت الأهلى بيكى يا فندم (140 لايك)

السيد "ض": كلنا فدا الأهلى .. تحيا الأهلى (25 لايك)

السيدة "ص": أنا من عيلة اهلاوية عريقة .. وكل عشاق الاهلى تلاقيهم اهلاوية ابا عن جد ... الباقيين بقى اللى مش معروف مين وراهم ولا جايين منين. (80 لايك .. منهم كابت "ب" طبعا)

السيد "هـ": انا متابع حواركم الجميل وحب الاهلى بيزيد مع كل اللى بيكتبه عشاق الأهلى الاصلاء اللى دايما وراه وواثقين فى رجاله الشرفاء ... تحيا الأهلى .. تحيا الأهلى (90 لايك)

السيدة "ن": (شير لنتيجة مباراة الأهلى والنصر والتى فاز فيها الأهلى 3:0) الاهلى يتحدث عن نفسه .. تحيا الأهلى .. فخورة بانى اهلاوية .. الأهلى فوق الجميع (120 لايك)

الكابتن "ب": وستاتى انتصارات اخرى على المدى القريب ... ثقوا فى الأهلى فهو لم لونن يخيب ظنونكم. (200 لايك)

السيد "ع" فى محاولة أخيرة يائسة : حد فيكم شاف مباراة برشلونة وبايرن ميونخ ... شفتم اللعب القوى والكورة اللى بجد .. اكيد نفسنا الأهلى يوصل للمستوى ده (3 لايك .. اصبحوا 1 بعد 5 دقائق)

السيدة "ط": انا لا اشاهد سوى الأهلى .. الأهلى حبيبى ... تحيا الأهلى ... الأهلى بطل الدنيا كلها ... الأهلى نادى القرن ... الأهلى بطل الأبطال (120 لايك)

السيد "هـ": لما كل واحد فينا يقوم بدوره ويراعى ربنا وما يرميش زبالة فى الشارع ويراعى اللى حواليه وم يركنش صف تانى ويعشق عربيته ويؤدى عمله بامانة ساعتها يبقى من حقنا نقارن باندية تانية زى برشلونة (80 لايك)

السيدة "ك": الحقيقة انا ماليش فى الكتابة زيكم بس كلام يا استاذ "هـ" صح جدا ... ومافضلش الا انى اقول .... بحب الأهلى .. يارب وفقه ووفق رجاله وكتر انتصاراته (160 لايك)

--

النقاش استمر على نفس المنوال لأيام طويلة ... وطلعت عين السيد "ع" وندم على انه شارك فى الحوار .. وجارى البحث عنه فى ظل الاقاويل التى تؤكد انشغاله باخبار المصالحة بين تامر حسنى وعمرو دياب لوفرز.

أخيرا عزيزى القارىء هل شاركت فى حوار مثل هذا من قبل؟ .. وبماذا تنصح السيد "ع" مستقبلا ياترى؟

فادى رمزى

من داخل جروب #تحيا_الأهلى التخيلى