#حكاية_مدمن_هيروين .. بأمر المسئولين

كتب بواسطة: فادى رمزى في . القسم منوعات

 

البوست التالى منشور على صفحة society problems على الفيس بوك ... لا يمكن ان تصفه بانه بوست "كارثى" او "صادم" او تكتفى بعمل شير له وانت تولول على ما آلت اليه الأمور فى البلد .. لان ما به من احداث تجعله يتعدى كل تلك المسميات، وتفرض علينا ان نترك كل ما بأيدينا ونطالب بمنتهى الاصرار المؤسسات الأمنية ... لا ... بل رئاسة الوزراء ... لا ... هذا ليس كافياً ... علينا ان نتوجه للرئيس عبد الفتاح السيسى مطالبين بالتحقيق فى هذا الأمر فورا ... بلا اى مماطلة او تباطؤ ..

على رئيس الجمهورية أن يدع كل ما بيده من ملفات وامور "يظن" انها عاجلة، ويتحقق مما جاء فى هذا البوست، فما به أخطر بكثير جدا مما يجرى فى سيناء او مما قد يتسبب فيه الإخوان من اضرار .. فما به يدمر الدولة من اساسها بأسرع الطرق الممكنة .. تظنون اننى أبالغ، فلتقراوا معى البوست الذى وضعته "بعبله" كما هو:

(انا فكرت كتير قبل معمل البوست دا بس اقتنعت ان لازم اعملة .. اللى فى البوست دا هيكون صدمه كبيرة لناس كتىر وشرح لمعاناة فئة كبيرة انا منهم وشايف ان المجتمع ظلمهم تماما
او مش تماما قوى ......انا مدمن هيروين انا واحد من الناس مدمن الهيروين او اللى معروف باسم (البيسة) انا مش هشرح انا دخلت ازاى هوا لازم واحد ابن ستين كلب المفروض انه صاحبك يقولك خد جرب فتبدا القصة

معظم الاخطاء بتعتذر عنها و تخلص على كدا غلطة وعدت الا الادمان االغلطة مبتعديش بتدفع تمنها بقيت عمرك بمعنى الكلمةاللى اكل من التفاحة مينفعش يرجع بريء كل دا عادى وناس كتير عارفاة اية الجديد الجديد انى اتصدمت صدمة عمرى لما عرفت كمية الناس اللى زى من كل طبقات المجتمع و اشكاله حتى المخترم منه.

الاول كنت بجيب الجرام ب 240 جنية و بيكون اققل من جرام كتيركان لازم ادور و اشوف الناس اللى بتبيع بتجيب منين والسعر التجارى كام وسكتة فين وفعلاا وصلت للاصل و المصدر اللى اكتشفت انة مش خفى عن عين اى حد ولا حتى الدولة و الشرطةوصلت للسحر و الجمال السحر و الجمال دا اسم البلد اللى بيبيعوا فية المكان على طريق العاشر من رمضان والاسماعيلية.

اية رايكم فى هيبر ماركت كل الناس من كل حتة بتروحلة عشان عندة عروض جامدة و اسعار ملهاش منافس نفس الشىء فى السحر و الجمال الجرام هناك على الميزان ب 120 جنية واحيانا اقل, وعشان السعر الخارق دا تروح هناك تلاقى مصر كلها هناك بمعنى الكلمة
كمية العربيات اللى واقفه هناك اكتر من االعربيات اللى واقفه قدام اى مول مشهور تتخيلة
اللى بيبيع بدو وقفين بسلاح ورا تبة.

تخش يسالك عايز شك ولا شد ماهم فى نوعين من الهيرويننوع بيتشد بالانف و نوع بيتشك بالحقن يعنى. المنظر مهول مولد ناس و عربيات بالعبيط و كل واحد واقف مطلع سرنجة وبيضرب لنفسة او للى جنبة . بشر ملهاش عدد عائلات كاملة فى عربية اب بمراتة و اولادة.

اب تشوفه تقول مهندس او مدرس و جايب ابنة عندة 8 سنين شكلة ابن ناس موقفة جنبة فى الطابور على بال ميقضى مناظر تصدم بنات كتير جدا فى وسط الصحراء دى محجبات مش محجبات عادى كلة جوا منهم اللى بيرموا نفسهم على بدو شكله زبالة مستحماش من شهر عشان ضرباية.

انا جالى صدمة عصبية . انا مش مصدق احنا وصلنا للمستوى دا ازاى انا عايزاصرخ واققول ازااااى فوقواااااا . الكلمة هناك بحساب مفيش اسهل من انك تتقتل برصاصة من اى كلب من البدو دول.

المكان بعد كوبرى هايبر و مكدونالد اللى عند العاشر، هتلاقى فى كبرى تانى . من بعد الكبرى دا هتمشى 12 كيلو لحد ماهتلاقى مركب اسمنت فى نص. الطريق بين الحارتين . لو روحت و النور طالع بعد 5 كدا و ركزت هتاخد بالك ان على النحية التانية فى عربيات كتير جدا واقفه دول اللى بيشتروا عينى عينك.

اول قوة امنية بتكون متمركزة عند هايبر وعارفين ان كل اللى بيجى من الطريق دا بيكون بيشترى بيسه .. الشرطة عارفة المكان كويس جدا الجيش عارف المكان كويس جدا. بيخافوا يخوشوا او عندهم اوامر ميخشوش ودا اللى انا متاكد ان كبرات البلد هما اللى مدورين التجارة دى والا مكنش حماعه البدو دول قعدوا بالبجاحة دى

............
دا الجزء الاول

الجزء التانى اللى يخصنى شخصيا هو كالاتى. الدولة فى الكام شهر الاخرنيين منعت الترامادول شحتة فى السوق خالص لحد مالشريط مسك سعر 150 جنية و اكتر يعنى عدى سعر جرام البيسة بزمن اللى بيضرب البيسىة بيلاقى انها قريبة كتير مت الترامادول.

فكان رد الفعل الطبيعى ان الشباب ... بلاش كلمة الشباب ... انا شوفت المجتمع كلة بيضرب بيسة. كان رد الفعل ان كل الناس نقلت الضرب من الترامادول اللى مش موجود للبيسه اللى فى كل حتة .. طب و اية المشكلة فى كدا .

اقولك انا ... مدمن الترامادول لو ملقهوش بينهد حيلة كبيرة بيزعق و هيضطر ينام عشان مش قادر يفتح عينة. ولا هيقتل ولا هيسرق كبيرة قوة يضرب و بدون قوة. تعالى بقا نشوف مدمن الهيروين .. الكلام اتغير خالص لو جات معاد الشكة و ملقاش الشكة هيبيع مراتة بدون اى مبالغة. هيمسكها من ايدها يسلمها لاى راجل تانى تسليم جثث مقابل الشكة.

مدمن البيسة بيقتل
مدمن البيسة بيسرق
مدمن البيسه ملوش امان ولا صاحب بمعنى الكلمه

كدا احنا دخلنا طبقة كبيرة من المجتمع فى سكة ملهاش مخرج .. او ليها مخرج بس الدولة منعاه.

فى دواء بيعالج ادمان اى مدمن هيروين فى 3 ايام بدون اى اعراض انسحاب او تعب الدولة مانعه تداوله مع ان كل دول العالم بتصرفة مجانى للمدنين عندها.

ودا ياكد كلامى ان التجارة دى مدورها الوزراء و المسئولين الكبار فى البلد.

سعر الحباية الواحدة عندنا فى السوق السودا من 300 ل 500 جنية .. المدمن بيحتاج 3 حبيات على الاقل. اسم الدواء السيبكسون سيبوتكس ... دوائين الاتنين بيخلصوا الادمان فعلا.

الاتنين حل فعلى كل دول العالم بتقوم بية الا مصر ... وكان رد وزارة الصحة ممنوعين حتى لا يتم اساءة استخدامهم.

اللى اكل من التفاحة مينفعش يرجع برئ

‫#‏حكاية_مدمن_هيروين)

-------

إلى هنا انتهى البوست الأكثر من كارثى ... فهل سنصمت ام سنتصدى، ولو بالبشير المتواصل لاجبار مؤسسة الرئاسة على التصرف فورا تجاه الأمر؟ لأن مليارات العالم كلها لن تكفى لإخراجنا من الجب العميق الذى يصر الفساد على ابقاءنا فيه، مهما قمنا من ثورات او انتفاضات او اى محاولات اصلاحية فكلها ستكون زائلة مادامت النفوس تقتل حية بهذا الصورة السافلة.

هل يمكن ان نتجاهل تلك القصة؟ ولا نطالب بالتحقيق فورا فيها؟ ... هل نرضى ان نكون شركاء فى تخريب بلدنا بصمتنا؟ ... القصة مفجعة كارثية .. ويجب ان نترك كل ما فى ايدينا ونتوقف عندها .. ده لو شايفين اى امل فى ان بلدنا تنهض من كبوتها.

فادى رمزى