سيناريو فيلم: الدورى خط أحمر

كتب بواسطة: فادى رمزى في . القسم منوعات

 

مشهد 1

- الماتش لازم يتلعب ما يتلغيش

- رقبتى يا فندم

- لا بعد الشر عليك ... رقبة الأوباش دول اللى عايزين يقتحموا الاستاد

- بعينهم يافندم ... بس هو فيه الحقيقية شوية خسائر كده

- بتقول ايه؟؟ ... الأستاد جراله حاجة

- لا طبعا يافندم ... معقولة ده انا افديه بدمى

- امال خسائر ايه نشفت دمى

- منهم يا فندم .. من صفوف الأعداء ... فيه 3 - 4 – 5 ييجى  20 ضحية منهم كده .. مابين قتيل ومصاب

- طب ودى خسائر دى؟ .... فيه دم طرطش على الأستاد؟

- لا يافندم الاستاد ده طاهر وهيفضل طول عمره طاهر

- عفارم عفارم

- ومذيع الماتش اشاد بدور الأمن

- أصيل والله

- ومسئولين اتحاد الكرة مبسوطين ان المباراة وصلت لبر الأمان

- عال عال عال ..

- واللعيبة لعبوا عادى ولا كان فيه حاجة

- طبعا بيجروا ورا اكل عيشهم ... طب قولى بالمناسبة الماتش خلص كام كام

- 1:1 حضرتك

- كويس برضه

- هو حضرتك زملكاوى ولا اهلاوى

- هههه .... انا؟ .... انا بابا يلا

 

----

مشهد 1 (مكرر)

- الماتش لازم يحصل فيه قلق ما صدقنا سمحوا للجمهور بالدخول

- رقبتى

- لاااا رقبتك ايه ... رقبتهم هم .. احنا بعيد

- هو حصل زى ما توقعنا وكان فيه خساير كده

- بتقول ايه؟؟ ... حد من شبابنا حصل له حاجة؟

- لا طبعا يافندم ... معقولة ؟؟؟ دول دمهم اغلى من البلد بحالها

- امال خسائر ايه نشفت دمى

- منهم يا فندم من صفوف الأعداء ...

- طيب هى دى خساير برضه ؟ دى مكاسب الحمد لله.

- طبعا يافندم العملية نضيفة زى كل عملياتنا

- عفارم عفارم

- ومذيع الماتش جه يكحلها عماها واشاد بدور الأمن

- هههه .... خدمنا والله تلاقيهم مبهدلينه على الفيس بوك وتويتر

- وطبعا ماجاش فى بالهم يلغوا الماتش ومبسوطين اوى انه اتلعب

- عال عال عال .. طب قولى الضحايا كام من هنا وكام من هنا

- فيه عربيات شرطة اتحرقت وييجى 50 ضحية بين قتيل ومصاب

- هايل جدا

- بس تفتكر مين هيشيل الدم ده؟ الوايت نايتس ولا الشرطة؟

- هههه .... مش فارقة ... المهم مايبقاش احنا

--

مشهد 2 (منقول من سيناريو بورسعيد)

- انا نازل يا ماما بقى رايح الماتش

- بدرى كده يابنى

- علشان نعرف ندخل دى التذاكر على القد وانتى عارفه

- طب ما تتفرج عليه هنا احسن بدل البهدلة

- لا يا ماما ماينفعش ... اسيب الزمالك كده لوحده فى ماتش زى ده ... ادعيلنا بس نكسب

- ربنا يابنى يعوض تعبكم خير

- اشوف وشك بخير ... احتمال اتاخر على فكرة

- هستناك يا حبيبى ... هستناك ومش هنام غير لما اتطمن عليك ... هو انا ليا غيرك يابنى.

---

تمت

والى اللقاء فى عمل اخر 

(ملحوظة: اختر المشاهد التى تعجبك من المشهد 1 و1 مكرر، ولكن يظل مشهد 2 هو الحقيقة المرة مهما تقرر)

 

فادى رمزى