إلى #محافظ_الإسكندرية: كواليس ما حدث .. فى افطار موسوعة جينيس

كتب بواسطة: فادى رمزى في . القسم اهم خبر


السيد محافظ الإسكندرية ..

بالتأكيد تابعتم سيادتكم ما حدث من فوضى خلال الفعالية التى اقيمت على الكورنيش، والتى كان الهدف منها الترويج سياحيا للاسكندرية من خلال تنظيم اطول مائدة افطار فى العالم كما قيل. ونظرا لفداحة الأمر فقد رايت انه من واجبى ان أعرضعلى سيادتكم هنا الاسباب الحقيقة لحدوث تلك الفوضى، وذلك بصورة مباشرة وواضحة وسلسة حتى تصل لسيادتكم الرسالة كاملة ..

بص يا برنس ..

من كام يوم كده موظفين البلدية فى الاسكندرية قفشوا راجل بياع على قد حاله واقف بعربية عليها بضاعته يسترزق على ناصية من النواصى .. راحوا هاجمين عليه ونزلوا فيه ضرب واهانة وتكسير فى عربيته رغم دفاعه المستميت للغاية عنها ... فهى "فيما يبدو" اللى طلع بيها من الدنيا، مش واقف بيها لتمضية وقت الفراغ بعد انتهاء عمله فى مصر للطيران او هيئة الطاقة الذرية.

الفيديو موجود فى اسفل المقالة ... اتفرج علي اتعس 9 دقائق ممكن تشوفها فى حياتك .. 9 دقائق تعالت خلالها كلمة "حرااااااام" من حنجرة الرجل اكثر من مرة ... شوف كده وقولى وقع الكلمة دى خلى قلبك يقف من الحسرة كام مرة.

الراجل ده طبعا مخالف ... بس هو فى نفس الوقت شايف مخالفين كتير اوى اوى، وفى ملايين مش ببضاعة ما تكملش الف جنيه، و واخدين اراضى مميزة ومساحات كبيرة لسنين مش واقفين على ناصية فى شارع جانبى كام ساعة للحر والقرف متحملين ... وبيتم التعامل معاهم بمنتهى الحنية وبيدوهم علشان يوفقوا اوضاعهم بدل المهلة .. مهلتين .. تلاتة .. اربعة .. اصل الدولة قلبها رهيف اوى معاهم لانهم "فيما يبدو" هم نور عينيها.

طبعا سيادتك نزلت بنفسك وازلت ادوار مخالفة .. انما مافيش ولا "مخالف" اتعرض لربع اللى اتعرض له الراجل ابو عربية كارو ده ... كمان فيه قرارات ازالة لم تنفذ وفيه اللى اتنفذ ورجع المخالف ابن المحظوظة بنى تانى بعدها .. ماهو الفساد عندنا بيتقشر فقط مش بيتحش من جذوره مطلقا ... ده طبعا غير ان المخالف "عدى خلاص" مش محتاج ولا محوووج ولا بيتعرض للذل من حد ابدا.

هتقولى طبعا ايه علاقة الكلام ده باللى حصل وقت الإفطار .. اقولك انا ..

تخيل معايا هذا البائس ... بتكلم عن الراجل اللى البلدية مرمطت بكرامة امه الارض طبعا ... اسم الله على مقام سيادتك ... تخيل هذا البائس بقى قرر يحضر حفل الافطار ده. جعان ياعينى، سواء بسبب الصيام او الاحوال الاقتصادية واو الاتنين مع بعضهم، المهم انه جعان وطالع عين امه من اللى حصل له ... وحاسس باهانة ومش عارف ياخد حقه ... كمان مش عارف هيعمل ايه فى باقى عمره.

البائس المتجول ده ... اسم الله على حس سيادتك ... اللى كل يوم بيجر عربيته رايح جاى لمسافة غالبا اطول بكثير من طول مائدة افطار جينيس تلك ...  لقى الاكل اتأخر .. نص ساعة .. وهو جعان ... والناس ابتدت تهتف "جعانين .. جعانين" ... عندهم حق ماهو الدنيا صيام، شوف حالة سيادتك كده او اصدقاءك من اعضاء نادى سبورتنج لما بيضرب المدفع بيبقوا متلهفين على الميه والاكل ازاى.

الراجل البائس استنى .. استنى ... عربيات الاكل جت ولقى الاكل مش مكفى الاعداد اللى قاعده .. طبعا شاخدلى بالك ان لسه علامات ضرب بتوع البلدية معلمة على جتته .. وكلمة "حرااااام" لسه سخونتها جارحه حنجرته وطعمها المر قابض على روحه والحسرة على ضياع عربته عاصر قلبه ... الراجل البائس ده تفتكر المتوقع انه يعمل ايه ساعتها ؟

اسم الله على نباهة سيادتك ... هينفجر .. صح كده ... يبقى ساعتها العيب على مييييين؟ ... قول انت بقى؟؟

طيب .. هتقولى كان فيه بلطجية ... واخوان مندسين ... اوكى ... وارد طبعا ... بس هو ده ماكانش وارد فى بال سيادتك مثلا وانت بتوافق على تنظيم يوم زى ده؟ ... هو حضرتك ما حضرتش مصر خلال السنوات الماضية؟ طب ماعندكش دش او حتى مركب وصلة؟

مافكرتش ان يبقى فيه تواجد امنى مثلا يمنع "الوحشين" من اى تيار او جهة واعوان الفاسدين اللى حاسبينك مش تبعهم، ودى حاجة حلوة على فكرة ممكن تتفشخر بيها بس لازم تعمل حسابها ... وتمنع قوى الشر دى من انها تبوظ الليلة او تهيج الجموع او يثير اعوانها الفوضى باى صورة؟؟

هو سيادتك ما كنتش بتفكر فى ده ؟؟ ... موسوعية جينيس بس اللى كانت شاغلة بالك كل ده؟

طبعا فيه ناس حوالين سيادتك بيقولولك "شعب همجى .. مش ذنبك" ... حضرتك ممكن تقولهم كده وانت مشمر وبعلو حسك:

"حوش حوش النظام والتحضر اللى بيخر منكم فى الاوبن بوفيهات فى الافراح .. خصوصا عند بوفيه الجمبرى والسومون فيميه يا معفنييييين" ..

ايوة قول لهم كده ... اصل اللى يتنطط على الغلبان البائس المحتاج اللى طالع تلاتة مياتين امه، ومع ذلك بيبقى غاية فى التحضر واحترام النظام فى موائد الرحمن العديدة المنتشرة فى كل حتة، وعمره ما هجم على قوافل توزيع شنط رمضان مثلا، مع انهم بيدخلوا معاميع المناطق العشوائية ... ده يستاهل ضرب ما اخدوش بياع متجول من موظفين البلدية.

ياريت يا سيادة المحافظ تتعلم من اللى بينظموا القوافل وموائد الرحمن ازاى بيشتغلوا بدون بروباجندا وبينظموا الشغل بجهود بسيطة ولكنها مخلصة ... ومش بيتنططوا على الخلق ولا يقولولهم تعالوا هنتصيت على قفاكم .. اقعدوا .. كلوا .. ولو اتأخرنا فى الاكل ما تفتحوش بقكوا.

اعتقد الرسالة وصلت يا سيادة المحافظ .... وكل جينيس وانت طيب يا اكسلانس.

اسيبك بقى تتفرج على الفيديو .. هو هاى ديفينيشن على فكرة ..

مش كصورة بل كمرايا كاشفة لواقع مر موجود فى بلدنا.

فادى رمزى