#غادة_بدر: 300 ألف كرسي للقهوة على وجه السرعة

كتب بواسطة: غادة بدر في . القسم سياسة

 

 

 

البورصة المصرية تسجل "رقما تاريخيا" ..
أعلى رقم في تاريخ البورصة منذ نشأتها !!

ليه ايه اللي حصل ؟؟

السعودية تغلق مكاتب الجزيرة بكافة أنحاء المملكة ؟؟؟

كمان !! ... طيب قولي ليه ايه اللي حصل

بأختصار وبدون الدخول في تفاصيل حياة الناس الكُمل ... قناة الجزيرة تعلن:

عاجل | وكالة أنباء البحرين: البحرين تقطع العلاقات مع #قطر وتسحب بعثتها الدبلوماسية من #الدوحة

عاجل | وكالة الأنباء #السعودية: السعودية تقطع العلاقات الدبلوماسية والقنصلية مع #قطر

عاجل | وكالة أنباء الإمارات: الإمارات تقطع العلاقات الدبلوماسية مع #قطر

طيب ومافيش حد جاب سيرة مصر ؟؟؟

تفتكروا ده نسميه أيه ؟؟ احتقار ولا ملناش عازة ولازمة عند قطر ؟؟؟
عموما ده مش لب الموضوع .. المهم أن أحنا كمان قطعناهم ... هيييييه يالا بلا قرف.

وبعد لحظة تفكير وتحكيم العقل قلت لنفسي ... بلا قرف أزاي يابت ياغادة ؟؟؟ وم ساعتها ما بقتش عارفة افرح ولا الطم.

افرح اننا قطعنا علاقتنا بأبن الموكوسة تميم، اللي كل شوية يحرق دمنا بتعمده اهانة مصر ... ومحدش يقولي ده بيهين رئيس الدولة ... لان رئيس الدولة هو اللي بيمثل وطنك سواء شئت ام ابيت ايها المصري الأصيل.

ولا الطم على ال ٣٠٠ الف مصري اللي مش عارفين مصيرهم ؟؟

طيب قولت لنفسي بت يا غادة ما تعملي زي الخنزيرة وتنزلي بيان ... مارأيك في قطع العلاقات مع قطر ؟؟ هل انت مع ام ضد؟؟

اول واحد قابلته قالي:
طبعا مع .. بصي يا هندسة السعودية عندها حق ... قطر مررت للحوثيين خرائط تصل حدود اليمن بالطائف السعودية وأماكن الارتكازات الأمنية ... أنتي عارفة غير اللي كانت بتعمله في مصر قطر كانت بتعد لانقلاب ضد الاسرة الحاكمة داخل السعودية ... ده اقل واجب معاهم بصراحة قطر ذودتها قوي.

واحد تاني بعيد النظر قالي: دي تحالفات امارتي مع امريكا وإسرائيل ضد قطر والإخوان والثورات مفهومة طبعا يا هندسة.

اخينا ده قالي: انتي بتهرجي هو في حد ضد القرار !!! ... طبعا أنا مع مع مع وكمان سقفلي يا جدع.

ولكن صديقنا الاخواني المفكر نظر لي بأشمئزاز وقال: فتحي معاياه دماغك شوية ولو ان ده صعب على واحده زيك ... وزير خارجيه قطر اعلنها صراحة ... ان هناك مخطط امريكى لتقسيم قطر ... وانا بصراحة شايف ان معاهم حق.

في واحد من اصدقائي كتب:
#تميم حبيبى نام بدرى علشان بكرة فى مفاجأت حلوة ... ليبيا طلبت اجتماع عاجل لمجلس الامن وبتجهز ملفاتها اللى بتدين قطر بدعم الارهاب وكمان مدعومة بتسجيلات وأسماء تمت مراقبتهم علي مدار ثلاث أعوام، وستقدمها لمجلس الأمن ومحكمه العدل الدوليه ،، اه والله زى مابقولك ادخل نام بقى !!!

من الاخر يا هندزة تميم ابوه هيضربه بالجزمة

صديق اخر متدين بطبعه قالي: هو في حد ممكن يبقى ضد ده ؟؟ ‏رابطة العالم الإسلامي بجلالة قدرها اعلنت تأييدها لقطع العلاقات مع قطر‬.

صديقتي الفيلسوفة وزميلة الدارسة قالت ... قرار قطع العلاقات مع #قطر_بنت_ال... متزامن مع نصر اكتوبر قلم من المخابرات المصريه #لاسرائيل_بنت_ال... الاتنين وجهان لعمله واحده زى الارجوز لاترى المؤدى للدور الاصلى له. ومتزامن مع 5 يونيه 67 وكانها رساله ان الهزيمة لن تتكرر مره اخرى... فهمتي بقى.

واخيرا اقراء الخبر:

#عاجل..#اليوم_السابع| #مصر تغلق أجوائها وموانئها البحرية أمام كافة وسائل النقل القطرية

#قطع_العلاقات_مع_قطر

بصراحة يا جماعة ... والله ما فهمت حاجة

بس كل اللي فهمته ان في ٣٠٠ الف مصري مغترب بقالهم كام يوم مشفوش النوم ..
كل اللي فهمته ان في عائلات مصرية لديها التزامات عائلية ... اقساط ... مصاريف جامعات ... عائلات لديها اولاد طلاب يدرسون في المدارس القطرية ... جفاهم النوم لأنهم لا يعلمون مصيرهم ..

كل اللي فهمته ان في الالافات من العائلات المصرية كانوا يستعدون لحزم امتعتهم لقضاء الإجازة الصيفية بالوطن مع احبابهم وعوائلهم ... واليوم يجدون انفسهم حائرون فقد تغيرت كل خططهم لأنهم لا يعلمون، هل لو سافروا سيتمكنون من العودة لأعمالهم وحياتهم العادية بعد انتهاء الاجازة الصيفية، في ظل قطع العلاقات الدبلوماسية وغلق مصر لاجوائها وموانيها البحرية امام كافة وسائل النقل القطرية؟

وعلى فكرة انا مش مع ضد والله ... لحسن تحسبوني منهم ... كما اني اعلم علم اليقين ان مصر اكثر دولة تضررت من قطر .. ولكن يا أصدقائي ..

انا بصراحة يهمني الانسان قبل اي شىء ... واضع نفسي وانا من لديها التزمات ومصاريف في الكثير من الاوجه الضرورية ... اغلبها ليست بترفيهية فكلها تتمثل في مصاريف علاجات باهظة التكاليف ممتدة الاجل او مصاريف دراسة ابن يتلقى تعليمه بالخارج ولازال في منتصف الطريق... او او .... اضع نفسي في نفس الموضع وافكر وافكر فيجافني النوم.

وعلشان خاطري بلاش حد يقولي ان وزيرة الهجرة فى مصر بتقول: عدد العمالة المصرية فى قطر 300 الف ... واحنا مستعدين نوفر لهم فرص عمل فورا لو رجعوا ... طيب بذمة ابوك أنت مصدقها ؟؟

معقولة برضه !!! ... اكيد الوزيرة قررت تستورد 300 الف توك توك او هتستورد ٣٠٠ الف كرسي لقعدة القهاوي خصيصا للمصريين العائدين من دولة القطر.

غادة بدر