#غادة_بدر تفتح ملفات الرئاسة "السبايسي" (1)

كتب بواسطة: غادة بدر في . القسم سياسة

 

 

يمكن لأننا كنا داخلين على عيد فمحبوش يكسروا بخاطري في الأيام المفترجة ... فقد فاق تشجيع اصدقائي كل توقع لي إلى درجة انهم في زحام حفل المباركة والدعم نسوا ان يسألوني عن البرنامج الأنتخابي لحملتي الرئاسية (اقرا المقال السابق) .. انا قلت خير وبركة ... وكمان هو يعني السادات ولا مبارك ولا السيسي كان عندهم برامج انتخابية ... ده حتى الوحيد اللي كان عنده برنامج كان مرسي وخده طائر النهضة معاه وطار ... فواضح كدة أن اللي بيمشي حاله في البلد دي هو اللي مسلم قلبه لربنا وماشي "اللاوي" كدة زيي.

دل عدم اصرار أصدقائي على معرفة برنامجي الأنتخابي على أنهم بالفعل متعطشين للتغيير مهما كان ... فشعرت أن داخلهم ينمو شعور المواطن الذي يقف على حافة الطريق وامامه منحدر وفي نهاية المنحدر حلة كبيرة فيها مية مغلية غليان الجحيم ... والجحيم هنا ينتظر الشعب كله بلا أستثناء، وعلى فكرة لن يفرق بين سيساوي وأخواني أو مسلم ومسيحي أو ثورجي وحزب كنبة ... وهكذا ولأول مرة نجتمع سويآ على قلب الجحيم وبأس المصير.

المهم انا طبعآ ارتحت نفسياتي وقلت في نفسي "هنيالك يا غادة" ... ده ايه الشعب الفلة ده، ده ولا شعب بمبوزيا العريق ... وبما اني قديمة في لعبة الافلاس فمخططي في أدارة الدولة كان سهل وبسيط وسبق له النجاح في عدة شركات سابقة سبق لي العمل بها ... قبل أن تغلق أبوابها للأبد.

طبعا كلكم تعلمون انني في الأساس أعمل كمهندسة تخطيط ومتابعة وتحكم في التكاليف، قبل أن تظهر علي أعراض وهوس الكتابة، كانت بدايتي مجرد مهندسة صغيرة ولكن بعد جهد وتعب حصدت حصيلة تعب السنين وتم ترقيتي الي منصب مديرة للقسم. وبحكم موقعي كمديرة جاورت مديرين لبعض الشركات التي عملت بها، وشاركتهم أيضآ القرار والرؤية (هو القرار ماكنش لى بالضبط بس على الاقل كنت شاهد عيان).

كانت بعض هذه الشركات على وشك الافلاس والغلق بالضبة والمفتاح، وعايشت هؤلاء الأبطال وهم يحاولون انقاذ الشركة من الهلاك والنفاذ بها من جحيم الغرق ... وبصراحة الجماعة "ما قصروا" بالمرة ... فقد عاصرت المديرين وهم يسعون الي شراء مناقصات حكومية معلوم معدومية ربحيتها ... ثم يتم تسعيرها بسعر تنافسي يقل عن التكلفة الحقيقية للمشروع، وحتى يكون هناك ضمان الفوز بالمناقصة لابد من ان يقوم المدير العام في اخر لحظة، بعد تقفيل المناقصة، بوضع بصمته بنسبة خصم اخيرة على المناقصة.

قطعا وبدون اي مقدمات ترسو المناقصة على الشركة، فالتقييم هنا مالي فقط وليس على إمكانيات الشركة في العمل أو النجاح ... وبعد ان يتم توقيع العقد يتم صرف الدفعة المقدمة وقيمتها تكون في حدود من عشرة الي عشرين في المئة من قيمة المشروع ... هنا بقى ييجي المدير العام الفهلوي بعد استلام الدفعة المقدمة بتسديد جزء من مديونة الشركة القديمة، وهكذا تصرف الدفعة المقدمة كلها على تسديد مديونة مشاريع أخرى متوقفة، ولا يتبقى منها ولو جزء صغير للصرف على المشروع الجديد. ونظرا لسوء الادارة في المشروع الجديد، والخصم الذي تم من قبل المدير لضمان الفوز بالمناقصة، تكون النتيجة الحتمية ... الخسارة الفادحة للمشروع الجديد.

نظرية تلبيس العمم تضمن اطالة عمر الشركة بعض الوقت وليس كل الوقت ... فهي تضمن أن تظل الشركة، أثناء فترة ادارة المدير، واقفة وثابتة ومستمرة ... ومن الممكن ايضا ان تحقق ارباح ورقية ... خمس سنوات وتجد المدير فص ملح وداب ... يترك مكانه لغيرة ويترك ارث الديون المتزايدة المستترة لمدير اخر.

ويبدأ المدير العام الجديد بلعب لعبة تلبيس العمم ... وفي النهاية يتم غلق الشركة بعد أعلان أفلاسها وتسريح جميع الموظفين ... عاصرت هذه القصة تقريبا على ما اتذكر في ثلاث شركات على الاقل لن إذكر أسماءهم خوفآ من المساءلة القانونية.

المهم .. بما انني اصبحت ضليعة فى لعبة تلببيس العمم، وبعد ان رأيت أنكم شعب بومبازي يرضى بالقليل، قررت ان نلعب سويا لعبة تلبيس العمم .. وممكن كمان نلعب كيكة على العالي أو الغميضة.

كان يوم الخميس من أسعد أيامي ... فقد ظل اصدقائي طيلة امسية يوم الخميس يرسلون لي كومنتات كلها دعم وتحفيز ومباركة بالفوز المستقبلي، ولكن بعد ان اطمئن بالي وهدأت نفسي صحوت يوم الجمعة بعد احلام سعيدة ... قلت اطل طلة على مقالي واشوف اخبار مريديني أيه ... ففوجئت بكومنت من احدى اصدقائي ... في حقيقة الأمر لم يكن كومنت واحد بل عريضة تتكون من سبعة كومنتات، كل كومنت يتكون من مجموعة من النقاط ... وكان أجمالي مجموع النقط ثماني وعشرين نقطة كلها تدور حول ماذا تفعلي في الملف الفلاني لو بقيتي رئيسة.

حاولت اختصار النقط بقدر الإمكان ولكن لأهميتها لم أتمكن ... والأن إضع بين أيديكم أسئلة الشأن الداخلى لصديقنا المهندس محمد :

١- الإخوان المسلمين هاتعملي معاهم ايه؟؟ وتحديداً القادة المعتقلين وعلى رأسهم مرسي. هاتخرجيه ولا هاتسيبيه للقضاء اللي شايف انه خاين وعميل ؟ هاترجعيه رئيس ولا هاتعمليه وزير ولا ها تنفيه ؟؟ والسيسي لما تكسبيه هاتسيبيه ولا هاتسجنيه ؟؟ وهاتعملي ايه في الناس اللي شايفين انه دبح وقتل ومش هايسيبوكي الا لما تحاكميه ؟؟؟ ولا هاتشكريه على انه خلصك من الأخوان ومشكلته ان فشل في التنميه والتطوير؟؟

٢- حسني وعز وجمال والعادلي والبارتيته دي كلها اللي خدت براءات، هاتعملي معاهم ايه ؟؟ هتقولى خلاص مافيش مشكلة القضاء أساس الحكم وهو ده العدل.

٣- الإرهابين في سينا هاتفضلي تحاربيهم وتحرقي الأخضر واليابس هناك ... ولا هاتنسي أرواح الشهداء وتتكلمي معاهم ونقلب الصفحة ونبدأ مع بعض من جديد؟؟

٤- الميادين هاتعملي فيها ايه؟؟ ... هاتفضلي قفلاها بالضبة والمفتاح ولا هاتفتحيها واللي عايز يروح أهلاً وسهلاً؟؟ وانتي أدرى بالشعب اللي ماهيصدق يلاقي حته واسعه وبحري وفي وسط البلد، وخصوصاً والجو جميل ... وطبعاً كل يوم هايزيدوا وصوتهم يعلى ومطالبهم تزيد وبكره الصبح عايزين وعايزين ... وانتي لامؤاخذه ماعندكيش مصباح علاء الدين ولا خاتم سليمان وهما طبعاً مستعجلين وعايزين وعايزين ....
وهايطلعوا فورا بشعار (يسقط يسقط حكم النسوان)

٥- الشرطه هاتقوليلهم خليكوا زي ماكنتم ايام حسني؟ وأضربوا الناس على قفاها؟ ولا زي أيام الثورة وخدوا على قفاكم؟؟ ولا زي دلوقتي ماتضربوش الناس على قفاها اضربوهم بالشلوت كمان؟ ولا هاتغيريهم وتجيبي شرطه استيراد ؟ علماً بانهم متربيين على كده ماينفعش يتغيروا لا في يوم ولا في شهر ولا في سنة.

٦- الجيش هاترجعيه ثكناته؟؟ عشان يبتدي يجهز على رواقه في الإنقلاب عليكي ؟؟ ولا هاتعملي زي شجرة الدر وتتجوزي قائد القوات ؟؟ وطبعاً ده ماينفعش لأنك متجوزة ... ولا ها تغيري برده الجيش وتجيبي جيش استيراد؟؟

٧- القضاه اللي حالفين اليمين هاتحيليهم على المعاش ولا القاضي اللي يحكم حكم على هواكي يبقى أميزنج وعادل؟؟؟ واللي يحكم بحاجة تانية يبقى فاسد ولازم يروح يصيف ؟؟ والناس اللي جوا السجن بأحكامهم هاتخليهم ولا تطلعيهم؟

٨- الشعب الغلبان اللي مابيشتغلش وبيحب قعدة القهوه واللت والعجن ؟؟ هاتجبيلوا الشغل على القهوة ولا هاتوديله القهوة لحد الشغل ؟؟؟ وهاتعملي ايه في اللت والعجن ؟

٩- هاتعملي ايه في المدرسين اللي عايزين حد يدرسلهم لأنهم أصلاً ضعاف ؟؟ وهاتسمحلهم يدوا دروس وأولياء الأمور تشحت ولا هاتمنعي الدروس والمدرسين يشحتوا ويمتنعوا عن التدريس ؟؟؟

١٠- البلطجية والشمحطجية وأرباب السجون، الذراع الخفي، هاترجعي تسجنيهم ولا هاتأهليهم ولا هاتدفعي وتستخدميهم ؟؟

١١- مصادر الدولار هاتعملي فيها ايه ؟؟؟ ناخدهم كدة حاجه حاجة :
السياحة ... هاترجعيها ازاي ؟؟؟ ولو رجعتيها وواحد ابن ستين في سبعين فجر نفسه في كام واحد من اخوانا الخواجات، رجعت ريما لعادتها القديمه واضربت السياحة.

قناة السويس ... هاتعملي فيها ايه ؟؟ واخبار فلوس الناس اللي حفروا بيها الترعه ايه؟ وهي ترعة ولا حاجة كويسة ؟؟ هاتقولي للناس ايه ولما دخلها ينزل والناس تاكل وشك هاتعملي ايه ؟؟

تحويلات العاملين بالخارج ... هاتعملي ايه ؟؟؟ هاتخلي الناس تتنازل عن حقها فى أنها تبيع شقاها بالعملة الصعبة بأعلى سعر ازاى ؟؟ ومع احترامي لكل الحلول الغير تقليدية من جمارك سيارات وأراضي الى أخره، فإنها حلول غير جذريه ومسكنات فقط ... أما الحلول الجذرية هى ان الناس تشتغل وتصنع وتزرع وتصدر وتبطل تستورد الكاتشب والمايونيز وحتى السجادة اللي بنصلي عليها، كلها أمور تحتاج لوقت لا تملكيه مع شعب لا يعرف صفة الصبر وتخليه يضحي بالجلوس على القهوة والرغي والثرثره في ومناقشة قضية هو انقلاب تركيا بجد ولا تمثيل.

١٣- اللي هايتهموكي بالكفر والزندقه وحاجه من اتنين يا تتحجبي ياتمشي غير مأسوف عليكي، هاتواجهيهم وتحاربيهم ولا تهادنيهم. و ورحمة ابوكي ياشيخة ماتردي عليه بانك هاتناقشيهم لأنك أول واحده عارفه انهم مش هايسمعوكي واحتمال يرجموكي.

١٤ – ها تكمليها قروض ولا ها تمتنعي خلاص كفاية شرفي وسمعتي ؟؟ وتحكمي على الناس بحكم صعب انهم والعياذ بالله يشتغلوا.

١٥ - الإعلام المصري الفشيخ من أمثال احمد موسى ولميس وعمرو والشلة، دي هاتعدميهم ولا ها تشغليهم وتعلميهم الشعار الجديد نموت نموت وتحيا غادة؟؟

١٦ - هاتكملي على الدستور الحالي ولا هاتعدليه؟ وهتختاري مين رئيس الوزارة؟ هاترجعي محلب ولا هاتجيبي شاب صغيوووور ؟

١٧ - اخبار الحريات ايه ؟؟ هاتسبيها بحري ولا هاتحكميها ؟؟ يعني الدين مثلاً، اللي عايز دين يعتنقه هو حر يعني ؟؟ لو حد عايز يتشيع هو حر ؟؟ ولا بس اسلام ومسيحية ؟؟ واخبار العلاقة بينهم ايه ؟؟ زي ما هي ولا ناوية تفتحي الملف ده ؟؟ ولو مسلم اتجوز مسيحية وهاجت الدنيا ها تحضري فرحهم ولا ها تحضري جنازتهم؟؟

وبقية الحريات اخبارها ايه ؟؟

اللي عايز يعمل قنوات دينيه ويدعو الناس لدرجة التطرف ها تسيبيهم هما أحرار ولا تحطلهم قوانين ؟؟ ده أه وده لأ ؟؟ واللي يخالف هاتعملي فيه ايه ؟؟ هاتكتفي بقفل القناة ولا السجن؟؟

١٨ - هاترجعي توفيق عكاشة وقناة الفراعين ولا هاتفضل مقفولة؟؟

١٩ - انتخابات مجلس الشعب، لو الناس اختارت اللي معاهم فلوس وصوتهم عالي وطلع المجلس من عينة مرتضى وبكري وغيرهم، وطلعلك مجلس رسمي منتخب "شت" ... هاتعملي ايه ؟؟

٢٠ - هاتعملي ايه في الناس لو فضلوا متمسكين بالكنبة؟؟ هتوصللهم ازاي ؟؟ هاتكسبي ثقتهم ازاي دول مش ناقصين ولا مستعدين يتضحك عليهم عاشر ؟ ماصدقوا رجعوا الكنبة ومش هايسيبوها تاني ابداً.

٢١- ايه بقى مشاريعك القومية ؟؟؟ مليون وحدة ولا اتنين مليون وحدة ؟؟ عاصمة ادارية جديدة ولا عاصمة اقتصادية جديدة؟؟

٢٢- اخبار الفساد ايه ؟؟؟ الناس اللي بقوا تقريباً الشعب كله واللي مستنين الميتين جنية الفكة هاتعملي معاهم ايه ؟؟ والفساد الكبير المدعوم بالدولة العميقة واللي يقرب منه يتحرق، هاتقربي منه وتتحرقي ولا هاتسبيهم يسترزقوا ؟؟

--
عزيزي مهندس محمد قطعا لدي من الإجابات الكثير للرد على أسئلتك ... كان ابسطها ان لدي فكر بسيط على قد حبي لوطني وهي تحويل دولتنا المصون الي دولة مؤسسات ... ناس كتير مش فاهمة يعني اية مؤسسات وكتيرا منكم سيباغتوني بالرد: طيب يا هندسة ما الدولة كلها مؤسسات ... لا طبعا مش ده القصد ... ولكن المقصود ان تكون لدينا حكومة منتخبة ورئيس وزراء شعبي واشهار أحزاب، وكلها ضمن محاولات للوصول إلى نظام ديمقراطي متكامل تكون فيه السيادة للأمة.

دولة المؤسسات يا أصدقائي هي التي يكون فيها فصل تام بين المؤسسة التشريعية والمؤسسة القضائية والمؤسسة التنفيذية والقانون هو الذي يفصل بين تلك السلطات، وهنا نقصد بالقانون المبنى على الدستور او الوثيقة التي نالت ثقة الشعب وفق آلية استفتاء او تصويت برلماني متفق عليه.

هزيدكم من الشعر بيت ...
من فوائد دولة المؤسسات ... شفافية السلطة وتنظيمها وتحديدها وفق اطار معروف مسبقا، دون اللجوء الى التكهنات أو عملية الأرتجال في تحديد المسئوليات والسلطات. يعني من الأخر المؤسسة هي الشيء الثابت والبشر هم المتغيرون ... والقانون فوق الجميع ... والعدالة والمساواة هى أساس الحكم.

وبالتالى يجب ان تبنى الدولة على مؤسسات وليس على أفراد أو حزب.

مهندس محمد ... الأفراد والأحزاب يزولون أما المؤسسات فتبقى بعدهم ولأجيال كثيرة . السياسي الذي يتعامل مع الدولة كملكية خاصة له يقضي على مقومات بقائها. فزوالها بزوال مالكها. وبالتالى يجب أن تستند سلطة الحاكم على جملة معايير ومفاهيم وقيم وقوانين مجردة عن الفرد أو عن أي هيئة اجتماعية لها نفوذ على مصير الدولة والمواطنين ... من الاخر كدة ان المؤسسات هي التي ستقوم بالإجابة وايجاد حل لكل أسئلتك الكريمة.

وبما اني طول عمري ديمقراطية وأفضل الحوار المفتوح فسأترك المجال للقراء ولأصدقائي للرد عليك ليأكدوا لك ان هناك حلول لهذا الوطن تمكنا من الخروج من عنق الزجاجة.

في انتظار ردودكم على اسئلة المهندس محمد الناصح ..

خليك أيجابي ورد عليه

غادة بدر