#غادة_بدر تتساءل: هل عواد باع أرضه ولا صانها ؟

كتب بواسطة: غادة بدر في . القسم سياسة


مقالتي اليوم تختلف عن كل المقالات السابقة، فاليوم سأنتهج منهجآ جديدآ ألا وهو إقتباس بعض أراء أصدقائي على الفيس بوك عن مشكلة عويصة أنقسم عليها الشعب المصري كعادته ... هل تيران و"صنافير مصرية أم سعودية. وأتحدى أن يكون غلب المصريين قد سمعوا عن هاتين الجزيرتين قبل الزيارة الأخيرة للعاهل السعودي للقاهرة. وهكذا تحول كل شعبي في ليلة وضحاها إلي علماء فى الجوغرافيا.

كنت قد أتخذت قرارآ بألا أشارك في هذه الملحمة المصرية وأكون من المقاطعين، فالعبد لله يعرف قدر نفسه جيدآ، فلم أكن يوما من خبراء الطبوغرافية ... او حتى من محبي مادة الجغرافيا .. ولكني أضطررت للخروج عن صمتي بعد ان هاجمتني وأستفذتني بوستات أصدقائي على الفيس بوك.

بعد أن أنهيت كتابة مقالتي الأسبوعية، التي كانت بعيدة كل البعد عن الهري والنكت اللي ماليين البلد، وبعد تتبعي لأراء أصدقائي في مشكلة الجزيرتين، حسيت أنه من المؤكد والأكيد أننا رايحين في داهية لا محال له... وان البلد دي مش هيقوملها قومة تاني خلاص.

قطعت المقالة الأولى حتت ورمتها للعصافير وتملكتني فكرة جنونية ... لما لا أضع بعض من بوستات أصدقائي المثقفين ولاد الناس الطيبين على الفيس بوك أمام أعينكم، يمكن تقدروا الوضع اللي بقينا فيه.

قررت أن أنزل أتمشى في الفيس بوك وأنتقي بعض البوستات من زملاء المهنة، لنرى معآ كيف يفكر مهندسي هذا الوطن في وطنهم ... وهكذا ستكون سطوري القادمة هي خلاصة بوستات أصدقائي.

مبدئيا لم تكن البوستات كلها ذات إتجاه واحد، وهذا يعزز نظرية الأنقسام الوطني الحزمبولي حتى بين إبناء الخلفية المهنية الواحدة، وهكذا تنوعت البوستات ما بين مؤيد لقرار النظام ويهلل بأن عواد صان أرضه، ونوع أخر معارض لقرار النظام ويتهم بأن عواد باع أرضه ... ونوع جديد ظهر في الأونة الأخيرة مش عاجبه اللي حاصل من شعبه في أرضه.

هنبداء بالبوستات المساندة للنظام
صديقنا المحموق كتب الأتي:
"هو المتخلفين اللي بيقولوا السيسي بيبيع ارضه
انتم متخلفين للدرجة دي؟؟ مصدقين نفسكم يعني؟؟
بالك يعني لو هو عمل كده الجيش هيسيبه؟؟
كفاية نهيق علينا بقي
دا انتم عالم ولاد وسخه واللى مش عاجبه الغى ام الفريند انت ماشترش دماغى"

صديق أخر علق على كلمات هيكل في كتاب حرب الثلاثين سنه... سنوات الغليان المؤيد لأن الجزيرتين سعودتين
"القصة كلها شوية مرتزقة او منبوذين
بيتاجروا بالموضوع
دم الشهداء
تراب الوطن
وقاحة مفرطة
اذا ارضهم ياخدوها
حتي حدود مصر البحرية في كل خرائط العالم تقع غرب الجزيرتين منذ قديم الازل"

أما صديقنا الثائر فقد كان له رأي أخر
"اللي فاكر إن قرار اعادة ترسيم حدود ده ممكن السيسي ياخدو منفرداً يبقى مش عارف قيمة البلد اللي هو بيحمل جنسيتها، السيسي وكل الرؤساء اللي حكموا مصر باستثناء الخروف اللي كان مرؤوس من المرشد عندهم اختراع اسمه مجلس أمن قومي وعندهم مستشارين لن يؤخذ قرار بهذا الثقل بدون ما يمر عليهم ، كلمة مصر مش عزبة اللي انت واخدها لبانه في حنكك دي إحنا بنحاول نقنعك بيها من 30 يونيو بس انت اللي مصمم تشم كوله ومش متخيل أضرارها على صحتك"

أما البوستات التي تكره النظام عمى

كتب صديقنا:
"فى النظم الفاسدة كل حاجة مباحة
الدم والارض والعرض!!
المهم النظام يعيش!!"

صديقة أخرى كتبت التالي بعد تشيرها تويتة بالأنجلش لدكتورة قانون دولي
"دكتورة قانون دولي و متخصصة في النزاعات مندهشة من اخلاص المصريين في التعريص للحاكم لدرجة اجتهادهم المضني في محاولة اثبات ان الجزيرتين سعوديتين"

تويتة من الأخ هشام علام اللي أنا معرفش مين ده أساسآ بس لقيت ناس كتير مشيراها – فقلت أحطهالكم ... "لو بذلت الدولة المصرية نصف جهدها الذي تبذله الآن لإثبات عدم أحقيتنا في جزيرتي تيران وصنافير، من أجل إثبات حقنا في الأموال المهربة والمجمدة في الخارج، لحصلت مصر على مليارات الدولارات التي تُغنيها عن انحناء الظهر والتنطع على أبواب الخليج".

أما عن بووووووووستات الأعتراض على الشعب اللي هو أحنا يعني كانت كالتالي:
صديقي الذي أحترم رأيه كثيرا وأقدره..... كتب
"ابو ام ريجيني على ابو ام صنافير على ابو ام الاخوان على ابو ام السيساوية على ابو ام اللي خايف على البلد على ابو ام الحكومه على ابو ام الإعلام على ابو ام الثورة على ابو ام النشطاء على ابو ام الهري على ابو ام الفتي على ابو ام إسرائيل على أبو أم إيران على ابو امي ... ايه كم الخرى ده .. يارب النت يفصل عن البلد كلها
روحوا شوفوا السوريين اللي في مصر بيعملوا ايه وحجم شغلهم بقى اد ايه علشان تعرفوا مدى الخرى اللي احنا فيه.
50% من الشعب بيثبت أن الجزر مصرية
( احنا الوطنيين خايفين على أرضنا )
والسيسي باع ارضه
50% من الشعب بيثبت أن الجزر سعودية
( احنا الوطنيين عمرنا مافرطنا في ارضنا )
والسيسي صان أرضه
والحقيقة أن 100 % من الشعب فتاي بيهري فاضي
عايز يفرض وجهه نظره
عايز يطلع الطرف الآخر غلطان
مفيش ولا واحد همه مصلحة بلده اد ماهمه يطلع اللي ادامه غلطان ويبقي هو اللي صح حتى لو على حساب أن البلد تتحرق."

واحد تاني لقيته كاتب عن مصر في ثوبها الجديد
"الموقف اتغير يا برايز ، الاسلاميين بيشيروا فيديوهات عبد الناصر ، والثوار بيشيروا فيديوهات مبارك ، والسيساوية بيشيروا تويتات عمرو حمزاوى"

صديق قديم أخر كتب الأتي....
"كدة واضح ان 90 % من الشعب المصرى خريج مكتبات قسم خرائط ووثائق .
و 10%الباقيين قسم مساحة طبوغرافية ."

واحد تاني معدي كتب....
"فى الماتشات 90 مليون محلل كروي
فى الحرب 90 مليون خبير استراتيجي
فى الاقتصاد 90 مليون خبير اقتصادي
الجديد اكتشاف 90 مليون خبير ترسم حدود بحريه....
عن الشعب المصري اتحدث.... كم انت عظيم يامصري"

صديق أخر محترم جدآ برضه قرر أن ينتهج منهج جديد ويحلل الموقف من جميع الأوجه وطالب بالشفافيه... كتب التالي:
"فيما يتعلق بالجزيرتين
ارى في ما يرى العاقل ان الموضوع لمن لا يملك المعلومات الكافيه في دولة عسكريه لا تتمتع أبداً بالشفافيه
هناك احتمالين
الأول
الجزر مصريه ويجب ان يطلب مجلس الشعب أسباب تنازل القياده العسكريه أوبيعها في صفقة إقتصاديه للسعوديه ويجب ان تعلن تلك الأسباب للشعب وهو صاحب القرار بإستفتاء شعبي
الثاني
الجزر سعوديه ويجب أن يطلب مجلس الشعب أسباب أحتلالها وأدعاء كافة القيادات والحكومات السابقه ملكيتها وظلمها للدوله الشقيقه السعوديه طوال هذا الوقت
وأخيراً يبقى سؤال مشروع لكل مصري وهو لماذا الأن ولماذا أثناء الزياره ولماذا مع الأعلان على الجسر
وصبح على مصر بجنيه
وصبح على السعوديه بجزيره"

واحد تاني صاحبنا هو مش فريند مع صديقنا اللي فوق... ولا على صفحته بس لقيت بيرد عليه من غير ما يقرا كلامه...
"شفافية دي ممكن تتفرج عليها في قناة التت وانت قاعد بتضرب بوظه مع المدام بالليل، عندنا في حكم العسكر مافيش شفافية طول مانت البعيد حمار وعندك إسهال معارضه ومش عاوز تتعالج منه.
#شفافية_دي_تبقى_خالتك"

وأخيرآ حتى تكون المقالة خفيفة على قلوبكم فأسختم بالفقرة الكوميديا أو بمعنى أصح بوستات الكوميديا
صديق أخر بس لسانه فالت شويتين استحملوا علشان خاطري.....
"التايم لاين عندي بقي عامل زي حصة الجغرافيا بتاعت أولى ثانوي ، وانا كنت باكره الجغرافيا في الفتره الحساسه دي ، كنت هاري نفسي مجلة الكواكب وطبيبك الخاص ، ماتشوفولنا سيرة تانيه غير محن الجزيرة ده عشان القعدة تبقى بفايده ."

وهذا منقول عن صديقنا المغترب الذي أضاع عمره هدر.....
"دانا عمري كله ضاع في الغربه على أمل ارجع في آخر أيامي اشتري قيراطين في صنافير ازرعهم واعيش بيهم ، منك لله ياسيسي طب كنت خد صنافير وسيبلي تيران طه .
#الإنكيلاب_باع_صنافير_واحنا_دقينا_عصافير"

دي خلاصة لبعض أراء أصدقائي المهندسين على الفيس وبالأضافة إلي الأجتهادات التحليلة لهم كان هناك البعض الذي فضل تشير المقالات المكتوبة عن رأي جمال عبدالناصر ورأي هيكل ورأي السفير السابق لمصر في السعودية.... ورأي حسني مبارك... ورأي... ورأي....

هتسألوني طيب وأنتي أيه رأي سعادتك في هذه المهزلة الوطنية.. هارد عليكم وأقولكم أنا رأي أن حلايب وشلاتين جزيرتين سعوديتين ..

كنت في مرة كدة من قيمة كام سنة فاتوا سمعت أن نهاية العالم هتكون في سنة 2012... ساعتها اتخضيت وافتكر كمان أني ألتزمت في أداء كل فروضي الدينية على أساس أن أخرتي قربت وبعدة كده نسيت وعشت حياتي ولكن يظهر كدة التفسير الوحيد اللي عندي للي بيحصلنا دلوقتي ان 2012 كانت فعلآ نهايه العالم وأني مت وشبعت موت . و احنا دلوقتي عايشين في الجحيم وبئس المصير.

أأسف لورود الكثير من الكلمات البذيئة والخارجة في هذا المقال وأقسم بأن كل هذة الكلمات قد وردت بالفعل على ألسنة أصدقائي مهندسي هذا الشعب وليس من سواقين التكتك... فهذا هو أنتم يا سادة يا كرااام – ومرحبآ بكم في وطنكم الجديد فلا تخجلوا من أنفسكم

محدثتكم من جزيرة تيران
غادة بدر