فضيحة نائب #محافظ_القاهرة فى جراج #الترجمان

كتب بواسطة: فادى رمزى في . القسم سياسة

 الباعة الجائلين الذين تم "شحنهم" من وسط البلد ومناطق اخرى لارض الترجمان يستحقون بلا شك ان يتولوا مواقع المسئولية فى محافظة القاهرة .. فهم باسلوب تفكيرهم الفطرى يتفوقون بمراحل على كل من اصدر هذا القرار وقام بتنفيذه ... بل أنهم اكثر حكمة من الكثير من المطبلاتيه الذين فرحوا بقرار ترحيل هؤلاء الباعة بدون ان يتوقفوا لثوانى لتفهم خطورة تلك القرارات الفوقية العشوائية.

فى زيارة لنائب محافظ القاهرة للترجمان لاحظت الآتى:

1- "طالب عدد من الباعة الجائلين بالترجمان بإنشاء إدارة لتنظيم السوق وأوضح سعيد امام بائع متجول بشارع طلعت حرب ان هناك عشوائية فى تسكين البائعين وطالب بأن يكون هناك افتتاح رسمى للسوق وان يسبق هذا الافتتاح حملة ترويجية تشارك فيها كافة وسائل الاعلام ويتم من خلالها دعوة رموز المجتمع لهذا الافتتاح لتشجيع المواطنين على الذهاب للشراء من السوق"

تفكير تسويقى وتنظيمى رائع يا سعيد ؟ ... انت عارف ان مافيش ولا مسئول مر بخاطره مثل هذه الفكرة؟ ... انت بائع متجول ولا عندك دكتوراه زى د. جلال مصطفى محافظ القاهرة؟

2- "قال اشرف فؤاد بائعللجوارب: على مدار 12يوما منذ افتراش ارض الترجمان لم اقم بتحصيل جنيه واحد ولدى 3 أبناء فى المدارس وحتى الآن لم أقم بشراء مستلزماتهم التى يزيد سعرها على 2000 جنيه ... ويشير إلى انه من المحتمل الا يدخل أولاده المدارس هذا العام بسبب ضيق ذات اليد"

بس انت بتساعد على تقدم مصر يا عم أشرف .. ولاد ايه دول اللى تدخلهم مدارس، هيشتغلوا ايه يعنى بعد ما يتخرجوا ؟؟؟ فى مصر للطيران ؟؟.. ياعم قعدهم فى البيت وخليهم يشتغلوا على توك توك ولا فى ورشة ميكانيكى احسن واكسب لك ولهم ... وبكده تبقى ساهمت فى التخفيف من ميزانية التعليم وكثافة الفصول.

3- "قال محمد ايمن عبد التواب نائب محافظ القاهرة للمنطقة الغربية انه جار إنشاء مظلة إضافية لجراج الترجمان بمساحة 4000 متر مربع وأضاف انه تم تزويد السوق بسيارة مياه  للشرب حمولة 20 طنا وجار عمل دورات مياه لخدمة الباعة ورواد المكان"

هو سيادتك انت واللى مشغلينك مافكرتوش تعملوا الحاجات دى قبل قرار النقل ليه ؟؟ .. كنت متوقع انهم هيقفوا طول اليوم من غير زباين ولا دورات مياه كمان !!! ... طب الزباين وارزاق انما البى بى والكاكا على دماغ الفساد والفشل، يعملوا فيه ايه، يعيدوا تدويره ؟؟؟

وايه حكاية عربية الميه دى ؟ ... هم هيصبوا خرسانة ؟؟ ده فى الولعة دى مية العربية هتبقى فى سخونة الحمم البركانية؟ ... كان هيحصل ايه يعنى لو جهزتوا المنطقة بالمظلات والحنفيات ودورات المياه والحملات الترويجية المتزامنة مع اجراءات نقلهم .. مش بترد ليه؟؟ ما ترد يا بيه؟؟

4- "قال نائب المحافظ عندما واجهوا إحدى البائعات قائلة انا جوزى عيان وبصرف على اربع عيال وتشتكى من عدم استلام دولاب خاص لوضع بضاعتها فرد عليها قائلا: اقعدى وافرشى وامسكى فى مكانك بايدك وسنانك لحد ما يحلها ربنا"

فهمت انت ما ردتش ليه ... لأنك مسئول فاشل يا سعادة البيه ... الرد ده ما يردوش الا مسئول فاشل ولا يستحق هو و اللى مشغلينه السلطة والجاه اللى متمتعين بيها ... اى بائع "جاهل" من دول يقدر يحل مشكلة الباعة الجائلين بطريقة علمية تنظيمية انضف بكتير من طريقتكم الفاسدة الفاشلة التى لا تحترم اى آدمية وتساعد على تفاقم المشكلة.

تحية واجبة ومخلصة للمواطن المصرى المطحون الغلبان اللى مازال محتفظا بفطرته سليمة وبمفهومية عالية تمكنه من ان يعرف اصل وفصل اى مشكلة ويطرح حلولاً بسيطة وفعالة لحلها.

ربنا لا تؤاخذنا بما فعل السفهاء منا ...

احرقهم بجاز وسخ ياربنا حضرتك.

فادى رمزى

لمطالعة الخبر المنشور فى الأهرام يوم 3 سبتمبر اضغط هنا