#هالة_الرحالة فى منيل الروضة لحد ما تلاقى المعونة

كتب بواسطة: هالة الرحالة في . القسم ريبورتاجات و حوارات

 

(أنا دكتورة بيطرية وغاوية سفر، وبحب اكتشف الاماكن الجميلة فى مصر، خصوصا غير المعروفة واللى مش محطوطة على الخريطة السياحية. وبالتحديد المحميات الطبيعية اللى بعشقها ... وبالتالى قررت انى اروح الاماكن دى واصورها، واحكيلكم عنها)

قمت بزيارة اكثر من شركة سياحية وتحدثت مع الزملاء و المقربين و الاصدقاء، وذلك من اجل الاهتمام بالسياحة البيئية بصفة عامة وبالتحديد تنظيم رحلات سفر للمحميات الطبيعية.

منهم من أعجبته الفكرة وأيدها بشدة ومنهم من قدم الاعتذارات للاهتمام اكتر بالرحلات الترفيهية، على الرغم من انه من السهل ادراج الجانب الترفيهى فى الرحلات الذاهبة للمحميات فأغلبهم بجانب أماكن تصلح للسياحة الترفيهية. مثلا بعض من سألتهم اشار الى حرارة الجو كسبب لعدم الذهاب ... مع ان أغلب المحميات توجد بجانبها شواطئ او مزارات اخرى ... يعنى مش هتبقى الرحلة محمية بس.

اما عن الشركات السياحية فمنهم من طلب التسويق لاكثر من ايفنت خاص بالشركة قبل ادراج البرنامج  اللى طلبته الخاص بالسفر الى المحميات !!! ... او انى على الاقل اجمع 50 فرد عشان يطلعوا رحلات للمحميات.

طبعا علشان اجمع عدد هيستغرق وقت طويل، والمشكلة ان معظم الشركات السياحية غير متعاونة ... يعنى مفيش تخفيض على الرغم انى بقولهم انى بكتب عن احلى اماكن فى بلدى وبنشرها علشان توصل فى كل حتة وده ترويج للسياحة وهم هيستفادوا أكيد.

اقترح على اصدقائى التوجه الى المقر الرئيسى لبيوت الشباب، علشان  قالوا ان الاقامة فى بيوت الشباب ارخص وبكده ممكن تتغطى المصاريف لان رحلاتهم مخفضة. .. سالت عن الرحلات فى المقر وكل مرة يقولوا نفس الرد ... ان العدد كامل، مع ان الايفنت ماكملش يومين تقريبا من ساعة الإعلان عنه ... طبعا الرحلات بتتحجز للحبايب قبل ما الايفنت ينزل على الصفحة الرسمية ... ولقيت ان كتير على الصفحة بيشتكوا من الموضوع ده. 

المهم اتكلمت مع المسئول وقال ان الاعضاء المشتركين ببيوت الشباب كتير، قلت له انا كنت هنا قبل كده وقلت انى بكتب عن المحميات، قالى انتى معاكى كارنية صحفية و لا اعلامية، قلت له انا بكتب فقط فى موقع مجلة اليكترونية عن جمال بلدى، ومش صحفية.

احتد النقاش وصوته ارتفع وفى اخر الكلام قال لما يبقى فيه ايفنت تانى هنكلمك !!

خرجت من المكان ودمى محروق، المشكلة ان مش كتير بيتعاونوا ... و اللى عايز يتعاون بياخد وقت طوييييل جدا فى التفكير، وده اللى بيعوق التطوير فى امور كتير ... اهدار الوقت فى التفكير المبالغ فيه بيعطل سرعة الانجاز.

طبعا كان فيه اقتراحات تانية ان يكون فيه راعى للفكرة او المبادرة دى يغطى السفر والمبيت وباقى امور الرحلة الى المحميات ... وده اكيد هيخلى ناس كتير تنضم او تتطوع تطلع.

بعد كل الحوارات والكلام و النقاش ده روحت النيل ... ما هو محمية برضة ... وعرفت ان جزر نهر النيل بلغ عددها 114 جزيرة، وتمتد على طول المجرى الرئيسي للنهر، وهى تسمى محميات جزر نهر النيل.

على طول المجرى الرئيسي للنهر من أسوان قناطر الدلتا 95 جزيرة، ومنها جزيرة الروضة ... ومن اشهر معالمها قصر يسمى "قصر المنيل" أو قصر "الأمير محمد على" و"قصر المانسترلى" ... وهو قصر أثري يعد تحفة معمارية، وهو ما تبقي من مجموعة بنائية قام بإنشائها حسن فؤاد المانسترلى باشا. أما مقياس النيل فكان بيستخدم لقياس منسوب الفيضان وعلى هذا الأساس يتم تحديد الضرائب في كل عام زراعي.

دى بإختصار تعتبر اهم المعالم فى جزيرة روضة المنيل ... لكن للمقال بقية الأسبوع القادم ... ده لو ربنا ما اكرمنيش ولقيت رحلة طالعة محمية.

أسيبكم بقى واريح شوية ... والأسبوع القادم نبدأ رحلة تانية ..

هالة صالح

ده اسمى اللى فى البطاقة، انما اسم الشهرة: "هالة الرحالة"

أسيبكم مع الصور وبعدها شوية معلومات علمية عن كهف سنور

  • 2015-04-06_17.34.38
  • 2015-04-06_17.35.00
  • 20150402_142509
  • 20150405_144605
  • 20150405_145900
  • 20150405_150014
  • 20150405_150338
  • 20150405_150417
  • 20150405_150714
  • 20150405_150806
  • 20150405_151119
  • 20150405_151141
  • 20150405_151242
  • 20150405_152246
  • 20150405_153124
  • 20150405_162657
  • 20150405_164602
  • 20150405_165124
  • 20150405_170054
  • 20150405_171712

Simple Image Gallery Extended