جواز صالونات

كتب بواسطة: محمد السمليهى في . القسم بوسطة

 

salon-mariage

فى ليله حلوه وهنيه تم العرس و كان جواز صالونات بالمعنى الدارج عندنا فى مصر

- لم تكن تحبه بالقدر الكافى و لكنها فضلت تكوين اسره مستقره و رؤيه قصه الحب اللى تتمناها فى بنتها مع صديقها فى الجامعه
- اما هو فكان راسم عليها من زمان و –مدبقها – فى الرايحه و الجايه و كان لا يراها الا زوجه المستقبل

على جانب اخر كان ابن عمها يريد ان يتزوجها هو الاخر و لكن النصيب حكم بهذا الشاب بالاضافه الى تفضيل البنت لهذا الشاب ايمانا منها ان زواج الاقارب مضر و عواقبه قد تكون جسيمه

جاء يوم العرس فى وسط ترقب الاقارب و الخلان لهذ اليوم العظيم و احقاقا للحق فقد رضخ ابن عمها للأمر الواقع و تمنى لها الخير و كان شاف برده لنفسه عقد عمل و سافربرا
و بعد ان اصبح الامر واقع رات هى كفتاه الى ان تكون الى حد ما متكيفه مع وضع زوجها و طباعه الى حد ما بما لا يخالف الطريقه التى تربت عليها و طباعها و جعل هناك توازن بين الوضعين

لكن الزوج الهمام اراد ان يدبح لها القطه من البدايه فى رؤيه منه الى ان احكام قبضته منها قد يؤدى الى اريحيه كان يراها مستقبلا

و بعد شهر العسل اللى عدى بسرعه جدا وسط مباركات و تهنئه من جميع العائلتين و اللى شافو انها الزيجه المثاليه .. لكن العروسين كانت لهما اراء غير ذلك الا وهى :
العريس معملش حاجه من اللى وعد العروسه بيها بس كان تبريره ان فلوسه و جهده كلها خلصت وهو بيجهز نفسه و انها لازم تستحمله
هى بقا و عيلتها كانو شايفين انو لازم يسعدها و يحققلها اللى وعدها بيه وان الرجوله تحتم عليه كده علشان هو وعد من الاول
لكن بطبيعه اى واحده مصريه طيبه رضيت بالامر الواقع و قالت تستحمل طالما انه الوعد الاساسى و العام ليها من الاول انه قالها بالفم المليان ( انا احمل لك الخير ) ده غير انه مدفعش مهر قد كده !!

مرت سنه على الزواج و هو على هذا الحال لا يفى بوعد يرى انه لاحكام قبضته عليها ان يعطى مفتاح البيت لاخواته و اقاربه و انه عادى لانهم منه و هى كانت برده بتستحمل .. كانت بتكتشف انه فى كلام انه ناوى يبيع غرفه الصالون و الحمام و المطبخ للجيران علشان يوسعو على نفسهم و ساكته برده و مستحمله ...
لحد ما فاض بها الكيل و قبل ما تبدا تشتكى لاهلها و اقاريبها منه -و اللى بدورهم كانو واخدين بالهم ان حالتها بقت مش ولا بد و بتدهور - طلبت منه انها تخرج معاه فى مكان رومانسى يحتفلو بعيد جوازهم فرد عليا ببرود انه مش فاضى يوميها لكن ممكن نخليها قبلها بيومين كده وافقت و قالته هختار مكان رومانسى .. لكنه رد ببروده اكبر و قالها هنلاقى رومانسيه فين اكتر من بيت العيله و فى وسط اهلى و عشيرتى

وافقت المغلوبه على امرها و بدا هو بالحديث و لما يترك لها مجال للكلام سوى سؤال سالته فى البدايه "مش كفايه كده مشاكل و انت لازم تغير معاملتك معايا و تبدا تشركنى فى حياتك و نحقق اللى كل يوم حلمنا بيه فى مشروعك اللى قولتلى عليه ؟" وكانت الاجابه وابل من السباب و المعايره و كلام لا يمت للمنطق بصله مؤكده ان جوازه منها كان شرعى و وواجبه ن تطيعه فى كل ما يطلبه ثم قال لها ماذا كنتى تريدين ؟ الزواج من ابن عمك السوابق اللى سافر برا علشان عنده قضيه ؟ و لا فاكره ان ليكى حد يسندك و قال كمان على اتنين بلطجيه قرايبها واحد من المنصوره و واحد من الشرقيه و عايرها انه بيصرف من جيبه ... لا و مرتبه زاد على عكس المتوقع ...رجعت يا عينى البنيه من الخروجه يائسه بائسه محبطه و قررت تحكى لاهلها اللى حصل و انها كفايه سنه و انها يا اما تتطلق منه او تخلعه .. و راح رايح ابوها بصفت كبير العيله يكلمه وانهم زى ما دخلو بالمعروف يخرجو بالمعروف الا انه كابر

فقررت تخلعه... و فعلا صدر اسرع حكم خلع بعدها بيومين فقط بخلع العريس من العروسه ..
و حصل خناقات بين اهله و اهلها جامده و كلهم شايفين انهم صح .. اهله شايفين انهم يرجعو لبعض و اهلها شايفين اننا ندور على عريس تانى تكمل معاه
و المظلوم الوحيد هو العفش اللى بيتكسر كل شويه من الخناقات .. هو بقا يستنجد بناس ترجعهاله عافيه و هى مش دماغها الا الواقع الجديد و مش عاوزه عفش تانى يتكسر علشان هو ماضى على القايمه ...........

بس. المقال خلص .. ايه كنت مستنيله نهايه؟؟؟ .. اجيبها منين البلد اصلا كلها مش عارفه لها نهايه و لا عارفين مين اللى صح .. زعلت انى شبهتك بالعفش انت و اللى بيموتو .. عادى اهو العفش احسن من انك تبقى خاين و بلطجى ..
احنا ما بين الاقصاء .. او التصالح و المشاركه و ده بيودى لحته انك خاين او اخوان او طرى

لكن فى راى يظل اهم 3 مبادئ لابد ان نسير عليهم ولا يتغيرو:
يسقط كل من خان .. فلول عسكر .. اخوان
طول ما الدم المصرى رخيص يسقط يسقط اى رئيس
جواز الصالونات من اخطر العادات الاجتماعيه فى مصر

محمد السمهيلي